JEREMIYA 43 - BAIBEL (BSI)

Jeremiya ye Ijip lo Sawuve

¹ Ino timiqo vilo AMPEU panoqo Lhou no panoqo vilo pipenike ipuwukeu kumtsu pesu pitave.

² Tileno Hoshaia nu Azariya ngo Karea nu Johanan eno kutami aqhekuzashi akemi kumtsuno ivilo pi, “Noye miki anike. AMPEU niLhou ye Ijip lo nipelo wupemo nike eno tilau auve pemoni keu opelo pipe nike opuwu puamoe.

³ Neriya nu Baruk no opelo nishou akumou shipenike oxukuthu anike, tishianguno Babilonmi ulo ningu ikhisuve puzu panoqono ni heqhivepe momu Babilon lo sawuve peniyeke.”

⁴ Ikehu Johanan pina aghushimi kijemi momu timiqo pinamu AMPEU no ahza tsukeu gholu puzu Juda yeghilo auvenikeu shimove.

⁵ Tishino Johanan ngo aghushimi kijemi kumtsuno Juda lo timi puxupuaghi kemi kumtsu sasu Ijip lo sawuve eno panonguno timi khunoqo ashiayeh kutami gholo kohapoveno ideighi keno tipaqo ghi kumtsu sawuve.

⁶ Kiptimi, totimi, itimi eno akukau nongaqo kumtsu sawuve. Ahzakutsuu akijeu Nebuzaradan no Gedaliya pelo jukutsu penike qhipua kemiqo kumtsu panonguno sawuve eno Baruk ikujo ghi panoqo gholo sawuve.

⁷ Panonguno AMPEU no ahza tsukeu hebideve eno Ijip lo Taxpanhes phughi kutolo wuve.

⁸ Tilau akelo AMPEU tsa ilau ighi,

⁹ “Atuqu hami suwo hilau aphughilo yehpeka kikuloghi hukikha zulo atumuno pesu qhapuakeulo qhope qhilo eno Israilmi khami pelo nono tipau shiakeu ithulu pelo.

¹⁰ Tipathiu panoqo vilo pilo, ni, Aqokitikhi MPEU, Israil Lhou no iqeu Babilon kukau Nebukadnezar hipa-alo saghi nani pilo, eno pano atuqu hipaqo nono qhapuakeuqo shou pa kuka lakhu qhi nani eno akukau phiki atuquqo shou xakho nani.

¹¹ Nebukadnezar ighi no Ijip leluve nani. Timi khunoqomi kusukini lono ahakusapushi thipe nikeu shi ani keno kusukini lono thi nani, khunoqomi ahakusapu shi akughu shipenikeu shiani keno akughumi shi sawuve nani eno khunoqomi aghukishi lono ahakusapushi thipenikeu shi ani keno aghukishi lono thi nani.

¹² Ino Ijipmi lhou chinekiqolo ami suvetsu nani eno Babilon kukauno panoqo lhouqo pitilevetsu nani momu tipaqo xapuwuve nani. Bherikhemi no aphiminilo axu juvekeshi Babilon kukauno Ijip yeghi shikimtheveno tokulushi cheve nani.

¹³ Pano Ijip yeghilo Heliopolis ipikeu-alo atu pesu koghekughu shipuakeu kutsaleve nani eno Ijipmi lhou chinekiqo pitileqhive nani.”