JEREMIYA 4 - BAIBEL (BSI)

Xachile penike Kukeu

¹ AMPEU no pi, “Israil lo akemiqo, nonguno ideighini aye ilau xaideghilo. Nonguno ino jumithichekeu julho ikhipeve aye eno ilau amikucho shi aye

² nonguye ije pesu tushoqhi nikeu achipike. Tishiaye ashiayeh kumtsuno panoqo kumghatsu penike ivilo iniju nani eno panonguno isheqhe nani.”

³ AMPEU no Juda ngo Jerusalem lo akemi vilo piani. “Nolu hokidemokeu hokidelo; nongu piti pesu asahuli gholo yisu kevilo.

⁴ Now puloshoqhi isasu shilo, niye nongu MPEU ke eno nonguye ikhipesu itsuvelo nongu Juda ngo Jerusalem lo akemiqo, nonguno tishimo napiaye nonguno axine shiveke ghenguno iloghuye ami toi iqu nani. Tipauno iqu nani eno khunomu tipau pinhemla nanike.”

Juda Leighinikeu pesu Shikichi

⁵ Aghakhuqhalo afuko kuighalo! mutsumishei shi vekipighi asheshulo! Juda ngo Jerusalem lo akemi vilo aliwo kuptu phughilo polupenike pilo.

⁶ Zion kudau ala kichepiyelo! xulu kepushi polo! munu kevilo! AMPEU no ahuu kudauno alhoksapu eno kutsakungo keu kije lakhi sughi ani.

⁷ Abongushuno pa kughutshua lono cheke toi, ashiayeh kukutsau lakhi chevae. Paye Juda kutsanike cheni. Juda lo aphughiqoye ixapiniyi qhive nani eno tipaqolo khumu kughuna move nani.

⁸ Tighenguno yeqhiye phi pepulo; eno amlo ghimeshi qanimlolo kughengu AMPEU loghu kushuye Juda kudauno hachileve mphike.

⁹ AMPEU no pi, “Tipa tsalalo kukami ngo kijemi ye amlo kumto hauve nani; achinemiye kichimamayive nani eno tungkupmiye akumzaqhiyive nani.”

¹⁰ Tileno ino pi, “Akughushu MPEU, nono Jerusalem lo akemiqo qhoi pishiqhivae! Nono pikeuno alakishi ananike pi ikemu azutakihi no panoqo ku-o diluvae.”

¹¹ Jerusalem lo akemiqo vilo asayeqha kudauno pitipuzaqhi keu mulhu panoqo shou mulhu wocheni kepi pinikeu ghuloki wocheni.Tiye amu-u likhi fusu wuvekeu mulhu kumtsha kumo nani.

¹² AMPEU no ahza tsukeu lono ighikeu mulhuye tinguno akumkau shi nani! Tiye AMPEU ampino pawu timiqo shou kughakutha pibe anike.

Aghumino Juda Suhuluve

¹³ Julo, aghumino khungkusu toi cheni. Pawu aghushi khurkulu ye miyitsu lakhi toike, eno pawu khurshiqoye aluqu nguno akumthuuke. Nighenguno ahakusapuke, ninguye thini putsake!

¹⁴ Jerusalem, oxaluvepe kepushi amlo lono axine qhuvelo. Nonguye khitotohi kutolo axine shikeu kukumsu kumsu anani kya?

¹⁵ Dan phughi ngo Efraim lo naghuto akeqo kudauno asutsa kipemino alomokeu sutsa pikulha ani.

¹⁶ Panonguno ashiayehqo kutughu nike ighi ani eno Jerusalem vilo aghumiye ayeghi putouno cheni kepi piniyeke. Aghumi hipaqono Juda lo aphughiqo shou igha ikughi nani

¹⁷ eno timino alulo aghukhe shi akeshi Jerusalem suho luve nani, kughengu tile akemiqono AMPEU hebideke. AMPEU no pivae.

¹⁸ Juda, nono kiu kuxu xucheni eno kiu kumla mla cheni keno tipauno olikhi oshou hipau sughi anike. Oxineno hipau ghime huthu tsuke; hino omlo jiputave tsuake.

Jeremiya mlo Ghime

¹⁹ Imlo ghime! Imlo ghime! Niye puqhemlavae! Imlo! Imloye kukushi itha ani! Niye inaqhoi ngosumlake; Ino afuko ghugha chilu eno aghushi sutsa chilu ani.

²⁰ Kutsakungokeu lakhino lakhi papecheni; aghakhuqha kumtsu shipusa khavetsua. Zuleno niphiki kutsakhave, tipau nhaqhi phi suxupinyivetsu.

²¹ Khitotohi aghushi kulu akeu ivilo julo pi eno afuko ghugha inilo pikya?

²² AMPEU no pike, “Iwu timiqoye mbomzuke; panonguye imthake. Panonguye itimi kughuzumi toike; panonguye ithikututa shikeu kuhae. Panonguye alhoksa shinikeulo shitsake, ikemu akivi shinikeu loye tomove cheni.”

Kutsakungo Kungunhetsu

²³ Ino ayeghi jukelo tiye ayeghi kithi pesu shipuhakhave, atsutsu jukelo tiye akuvu kuha.

²⁴ Ino naghutoqo jukelo tipaqono ithauve eno naghutoqo kumtsu no azuu athiu itha ake.

²⁵ Ino jukelo timi khumu kuhae; aghauqo ghi kumtsu yewukhave.

²⁶ Aghumaku-a yeghino asayeqha shive; tipaulo aphughiqoye shipusa hauve kughengu AMPEU no aloghu ide kehue.

²⁷ (AMPEU no pikeuno ayeghiqha kumtsu asa itsumo keu shive nani, ikemu paye tipau qhoi shipusa khavemo nanike.)

²⁸ Ayeghino mloqa nani; atsutsuno zumoleive nani. AMPEU no piveake, pano kumsaqhivae pano kughathave ake eno athiu idewovemo nanike.

²⁹ Khurshi shou chekemi ngo asuzu kipemi zulo timi kumtsuno pokhave nani. Khamino aghasulo posu wuke, khamino atuqu gholo mugho ikuke. Aphughi kumtsu kumsa qhive nani eno khunomu itaghi tilehi kughunamo nani.

³⁰ Jerusalem! Noye kutsaveni putsa! Noye kushiye huchuikeu phimini pepu kya? Kushiye achiku pepu eno onhethi nuda pusu ani kya? Noye adou lono olikhi ojukivipu shipesu ani! Olojipumino omilive ake eno oheqhi pithivenishi anike.

³¹ Totimino anga atughiu punu nikelo ighakeu sutsa lakhi toike. Tiye Jerusalem no atuthu sheku- kunokeu ghughake, lino au chhopesu, “Ighenguno ahakusapue! Panonguye iheqhiniye chenike!” ipike.