JEREMIYA 39 - BAIBEL (BSI)

Jerusalem Puhave

¹ Zedekiya no Juda lo akukau shikeu ampe atokuu aqhi achighiulo Babilon lo Akukau Nebukadnezar no pawu ghushimi kumtsu sasu ighi puzu Jerusalem leighike.

² Zedekiya no akukau shikeu mpe chighi aqhaqhiu aqhi abidiu eno atsala atokuni aphughi putupuakeu huye tulepho iloghive.

³ (Kughou Jerusalem leluve keno Babilon kukau wu kijemi kumtsu Khagho Amtau lo ighi puzu pututa-alo ngolukhave; tipaqo gholo Nergal Sarezer, Samgar Nebo, Sarsexim eno itaghi kutami Nergal Sarezer ghi ighi puzu ngoluve.)

⁴ Titoi shivekeu akukau Zedekiya ngo pawu ghushimi qono ithulukeulo panonguye putho lono aphughi qhiveno pove nike pukaputsae. Panonguno akukau xali ghutu laghi kudauno cheve puzu aphughi putupuakeu jolha kini kikime kikha vechesu wuve eno Jordan khila kudau posu wuve.

⁵ Ikemu Babilon ghushimino panoqo hasusu ighive eno Jerikho phivilo akhila lono Zedekiya kughaluve. Tipathiu panoqono Zedekiya sasu Akukau Nebukadnezar lau sawu, paye Hamat lughi kudau Ribla phughilo aghike, tileno Nebukadnezar no Zedekiya shou hitoi kughakutha shivetsu.

⁶ Ribla lo akelo Zedekiya no ju apulaghi pano Zedekiya nuliqo ghiqhi pithive eno Juda lo kijemiqo ghi pano ghiqhi pithive.

⁷ Tipathiu, pano Zedekiya nhethi lejovetsu eno Babilon lo sawu kepushi ayi kichhe pesu pa tshupe qhive.

⁸ Tishive puzu, Babilonmino akukau kighikiqo ngo timino achekeu ki pitileqhive tsu eno Jerusalem putupuakeu tule qhivetsu.

⁹ Ashekhashi ahza kutsuu akijeu Nebuzaradan no aphughilo khunoqo qhipuaghi keno eno khunoqo pa lau poighive puzu pa gholo akeno tipaqo kumtsu kumtsa Babilon lo akughumi shipe nike sasu wuve.

¹⁰ Timi ighono kumlhomi, aki alu kuhakemiqo khamiye pano Juda ghakhulo qhive eno pano atsayilu ngo aluqo pesu panoqo tsuveke.

Jeremiya Kuqhopuwuve

¹¹ Ikemu Akukau Nebukadnezar no ahza kutsuu akijeu Nebuzaradan pelo ahza hipau tsupenike pipuwu:

¹² “Wulo eno Jeremiya phuju puzu akivishi pa tucho hijulo. Pa shou bupuku kevilo ikemu pano kiu kiu shinishi aghini keno tipau pa ghenguno shitsulo.”

¹³ Ikehu Nebuzaradan no akijeu akiqhiu Nebushazban ngo Nergal Sarezer eno Babilon kukau wu kijemi kutamiqo kumtsu sasu kumtsa puzu

¹⁴ akukau kughaki kikhala lono isasu ighivepe. Panonguno Gedaliya pelo itucho hiju penikeu shi pa qholo iqhive. Paye Ahikam nuke eno Safan ye pasuke, ino akilo wo tolumoke kutolo pa pelo akivishi ihejupenikeu shike. Ikehu niye tilehi timiqo gholo auveke.

Ebedmelek ghenguno lajupu

¹⁵ Ikughapesu akukau ki kughakilo akughu shi akelo AMPEU no ivilo Sudanmi Ebedmelek vilo

¹⁶ Aqokitikhi MPEU, Israil Lhou no ishi piani pilo pike: “Ino puzuuno shiniepi piveke toi, niye aphughi hipau shou kutsakungokeu sughini kethono kinikulu sughini chemoe. Hipau shiakelo noye tipau pinike tilehi anani.

¹⁷ Ikemu ni, AMPEU no osusho nani eno noye nono musa akeu timi ulo suvetsumo nanike.

¹⁸ Ino okughape akivishi qhi nani eno opithimo nanike. Noye aghukishi lono okuxu pukhaluve nani kughengu nono ipukhubeke, Ni, AMPEU no piveake.”