JEREMIYA 38 - BAIBEL (BSI)

Aqohlo Jeremiya suve

¹ Matan nu Shefatiya, Gashur nu Gedaliya, Shelemiya nu Jehukal eno Malkhiya nu Pashur noqono ino timiqo vilo

² AMPEU no ishi pikeu pesu piachekeu chiluve, “Khunono aphughilo ngo auveni keno aghukishi momu akhuava eno kusukini lono thina nike. Ikemu khuno aphughi lono ipeve puzu Babilonmi lau liqhipe suveni keno tipaqoye heqhipithivemo nanike; paye pa kuxu likhimu pukhaluniake.”

³ Ino timiqo vilo AMPEU no pikeu highi piake. “Ino aphughi pesu Babilonmi ghushimi tsuveni cheni eno tipaqono hipau khasupe leluve nani.”

⁴ Tileno kijemiqono akukau lau wuno ishi pi, “Timi hipau pithive masae. Hikithipu tsa pikeu lono pano aphughi alou ghushimi akeqo mlo kulotivetsu ani eno pano aphughi alou ngo akeqo laughi tikithipu shianike. Paye pukaputsa puzu timiqo kuphumo puzu panoqo ghuzaqhi ke likhi shiauvae.”

⁵ Akukau Zedekiya no khochile, “Tishiaye, tiye alo ani , nonguno pa shou kiu shinikeno shilo; niye nongu lakhamlavae.”

⁶ Ike panonguno ikughape akighi lono Akukapuu Malkhiya zukikhe qoh akukau kilo kughaki khagho lalo akeulo suve. Aqoh tipaulo azu kuhae eno aniba likhi ake niye tipau alou nephoilove.

⁷ Tishiepimu, Sudanmi Ebedmelek, shoko shivetsu kemi akukau kilo mula achekeuno kijemiqono ikugha pesu aqohlo suvekeu chiluve. Tipa ghulokilo akukauye Benjamin khagholo atsakugha nike kuhoake.

⁸ Ikehu Ebedmelek no tilau wuno akukau vilo pi,

⁹ “Akughushuu, timi hipaqono kiu shive akeno tiye pimi anike. Panonguno Jeremiya kughape azukikhe qohlo supuani, tilau paye akhuamzuno thinia putsake, kughengu aphughilo achuqupu kuhave ake.”

¹⁰ Tileno akukauno Ebemelek vilo timi kuthu pa gholo sawuno ino thimphi lono aqoh lono isunhephe penike ahza tsuve.

¹¹ Ike Ebemelek no timiqo sasu akukau nhemgha hekutsu chekeu chebolo wuno aphimini aqa hami lupuzu akighi lono ilau kitipiqike.

¹² Pano ivilo aphiaqa tipau pesu ichishiqholo qhilo pike tishianguno akighi pelo iledaqhi pemoniyeke. Ino titoi shike,

¹³ eno panonguno aqoh lono isunhepheve. Tipathiuye ikughape kughaki khagho lalo qhike.

Zedekiya no Jeremiya Kukutsu Iniju

¹⁴ Ghuthu lakhi loye akukau Zedekiya no Achineki ikulola akuthuulo isasu pa lau ighipe eno pano ishi pi, “Niye ovilo kiu kela inijuni chenike niye opelo kuchou tsa ivilo pitsu penishi anike.”

¹⁵ Ino ishi khochile, “Ino ovilo kuchou piaye nono ipithive nanike eno ino akukumsu pesu otsuaye noye khilemu amlo tsuqhiyi ikhilumo nanike.”

¹⁶ Ike Akukau Zedekiya no kusuuno ivilo tushoqhi ghi pi, “Xuakeu Lhou, akuxu ningu tsukeu Lhou pesu ino ashoqhi shianike niye khilemu opithimoke momu opithinishi akemi ulo okughape sutsumoe.”

¹⁷ Tileno ino Zedekiya vilo Aqokitikhi MPEU, Israil Lhou no kiu pikeno tipau pike, “Nono Babilon kukau kijemi lau qhoi liqhi pesu tsuveaye okuxu pukha luve nani eno aphughi hipauye pitilevemo nanike. Noghi eno obolomi ghi puxupe qhitsu nani.

¹⁸ Ikemu nonguno qhoi liqhipe suvemoaye hipau phughiye Babilonmi lau tsuveni cheni eno panoqono hipau pitileve nani eno noye panoqo launo povemla nanike.”

¹⁹ Ikemu akukauno ishi khochile, “Niye nighakhumi khunoqono Babilonmi lau posuwuve keno tipaqo musa anike. Niye tipaqo ulo suvetsu puzu pishipiyi nani keniake.”

²⁰ Ino pa vilo pi, “Noye panoqo lau kughape tsuvemo nanike. AMPEU tsape aghokulu shi ikhilulopi ino oqhuiniju ani; tishiaye oghenguno kumu kumo nanike eno okuxuye puxutsu nanike.

²¹ Ikemu AMPEU no kungunhetsu lakhi lono ipiyeve ake nono qhoi liqhipe tsuve nikeulo mopiaye kiu shiveni cheni keno ipiyevae.

²² Kungunhetsu lono ino ithulu ke Juda lo akukau kighikilo totimi aghikeqo kumtsu Babilon kukau kijemiqo lau saipeve cheke. Panonguno wuchekelo kiu tsa pisusu wuchekeno inijulo: ‘Akukau shompami kuchouno pa sakughuzu ke, panonguno pa shou ayehpeke. Itehiye pa pukhu anibalo xesuluvae, pawu shompamiye pa qhivae!’ ”

²³ Ino highi pikuphake, “Owu totimi ngo atianuli kumtsu Babilonmi lau saipeve nani eno no ampi ghi panoqo launo povemla nani. Noye Babilon kukauno akughumi shi sawuve nani eno hipau phughiye ayeghi kutolo pitileqhive nani.”

²⁴ Zedekiya no ishi pichile, “Timi khuu pelomu kuptsakeu hipau ithi pekevilo, tishiaye okuxuye akumsapu kuha nanike.

²⁵ Kijemiqono ino oputsa pikeu chiluve aye panonguno ighi puzuno ikujono kuptsakeu tsa iniju nani. Nono panoqo vilo thwokha kumtsu pive aye, panonguye opithivemo kepi tushoqhi nanike.

²⁶ Panoqo vilo vejoi noye ivilo akughushi kithe eno tilano thive pemonike ivilo qhuiniju akepi pilo.”

²⁷ Tipathiu kijemi kumtsu ighi puzu ivilo inijuthuve, ike akukauno ivilo pilo pikeu tho pesu ino panoqo vilo pi. Panonguye tilehi kiumu shi mlave kughengu akukau ikujono kuptsakeu khunomu chilumoke.

²⁸ Ike Jerusalem khasupe leluvemoke tsala kutolo niye akukau kughaki kikhalalo qhipe puache.