JEREMIYA 37 - BAIBEL (BSI)

Zedekiya no Jeremiya Qhuiniju

¹ Babilon kukau Nebukadnezar no Josiya nu Zedekiya pesu Jehoiakim nu Jehoiachin kuka alo Juda kukau shivepe.

² Zedekiya ghi pawu kijemi ghi eno timiqo ghi AMPEU no atsape khipau itsukeno tipau gholumoke.

³ Akukau Zedekiya no Shelemiya nu Jehukal ngo Maaseiya nu achineu Zefaniya ilau puwu eno nishiayeh ghenguno AMPEU niLhou lau inikhutsu penike ivilo inijupeke.

⁴ Niye akughukilo suvemphike eno timiqo gholo vejoi iqho iqilu acheke.

⁵ Babilon ghushimino Jerusalem bothasupe ake, ikemu kughou tipaqono Ijip ghushimiqoye Ijip lughi hechevea pi chilu keno panonguno shothi wove.

⁶ Tileno AMPEU, Israil Lhou no ivilo

⁷ Zedekiya vilo pilopike, “Ijipmi ghushimino okuphuniye alalo cheake, ikemu tiye pano ghakhulo idewove nani.

⁸ Tipathiuye Babilonmino ideighi nani, aphughi le nani eno tipau khasupe leluveno tipau pitileqhive nani.

⁹ Ni, AMPEU no okutughu anike olikhi opishiqhi ghi Babilonmiye ideighimo nani kepi kumsu akevilo kughengu panonguye ighini putsake.

¹⁰ Nonguno Babilon ghushimi kumtsu shou toluveno izavekemi likhi qhiveno panoqo phikilo azua dape aghive pe kepushi namu timi tipaqono itaghi ithughiveno aphughi hipau ayeghilo pitile qhivenikeu shiaphike.”

Jeremiya Akughushive

¹¹ Babilon ghushimino Jerusalem lono shothi wove kughengu Ijipmi ghushimiqono kupunu cheakehu.

¹² Ike niye Jerusalem qhive puzu Benjamin lughi bocholo wuniye shiveke eno tilau abolomi mheghi isaje akeu pighiluve niye shike.

¹³ Ikemu ino Banjamin khagho tokelo ghushimi tilehi aghukhe shi akemiqo shou akijeu no ilakhaluve, pa jeye Iriya ke, paye Selemiya nu eno pasuye Hananiya ke. Pano ivilo pi, “Noye hipa-a qhive puzu Babilonmi lau wuchenike!”

¹⁴ Ino khochile keuno, “Tishimo thono! Niye qhive no poveniyeke kumoe.” Ikemu Iriya no itsa initsumono ikughaluve eno kijemiqo lau sawuve.

¹⁵ Tipanoqoye ishou aloghu ideve eno ighaqhi puzu kughakilo akiyeu Jonathan kilo khathasupe qhivenikeu ahza tsuve, paki pesu akughuki shiveke.

¹⁶ Niye ayeghiqhou achebo lakhilo suve eno tilau ado kushuwa qhiveke.

¹⁷ Athiuno akukau Zedekiya no ikupuwu, eno tilau akukau kilono pano lomotsa shi ivilo ishi iniju, “AMPEU launo atsape kiuala ani ma?” “Anike!” ipi ino khochile eno highi pikuqha, “Noye Babilon kukau ulo suvetsuni cheni.”

¹⁸ Tipathiuno ino iniju, “Niye oshou momu owu kijemi ngo timi hipaqo shou kiu lhoksapu mulape puani keno noye ikughape akughukilo sukepu shive kya?

¹⁹ Owu tungkupmi khunoqono ovilo Babilon kukauye oleghimo nani momu ayeghi hipau leighimo nani kepi pichekeqoye kiu shikhave akya?

²⁰ Itehiye, O Akughushuu, ino oqhuiniju akeuno itsa ini tsulo eno ino ovilo kiu pinikeno tipau shilo. Kishimoake, Jonathan kilo akughu shipenike itaghi tilau ipuwu kithetsu kevilo. Nono tishiaye niye mutsuqheino tilano thiniake.”

²¹ Ike akukau Zedekiya no ikughape akukau kilo kughaki bolo ikhathave nikeu ahza tsuve. Niye tilau ache eno tsala kipetsulo asho kumlaki lono ashopa lakhikhi itsuche, aphughilo asho kuhamitheveke kutolo tishiche.