JEREMIYA 36 - BAIBEL (BSI)

Baruk no Likuzu Kaku Phisu

¹ Josiya nu Jehoiakim no Juda lo akukau shikeu ampe abidiulo AMPEU no ivilo pi,

² “Likuzu kaku lakhi lupuzu tipaulo Israil ngo Juda eno ashiayehqo kumtsu ghili ino ovilo pivekeu yesulo. Josiya no akukau shiake ghulokilo ino atughushi oputsakeu lono ishi kutolo ino ovilo pivekeu thwokha kumtsu yesulo.

³ Ishiake, kughono Juda lo akemiqono ino panoqo shou kutsalekeu kumtsu sughiniye kutope akeu chilunikeno panonguye panoqo laghi lhoksa qhiveno ideighive luvike. Tileno ino panoqo lhoksakugha eno panoqo xine pevetsu nanike.”

⁴ Ikehu ino Neriya nu Baruk kupuzu AMPEU no ivilo pivekeu kumtsu pa vilo kithikiyi shi pitsu. Baruk no tipau kumtsu likuzu kaku shou yepukuve.

⁵ Tipathiu ino akukutsu tsa hipau pesu Baruk tsuke: “Niye Achineki alou ilopemo mitheve ake.

⁶ Ikemu kughou timiqono hi ighinikeu ghulokilo kumvu niye akelo niye opelo tile wupenishi anike. Noye likuzu kaku asutsa qhemghai shipuzu phisulo tishianguno AMPEU no ivilo pikeu eno ino ovilo apasu shi pitsukeu panonguno chilu penike. Noye timi kumtsuno nono phisukeu chilukepua lono hipau shilo eno tiye Juda lo akemiqo pututa taun lono ighikeqono akelono tipau shilo.

⁷ Ishiake panonguno AMPEU lau inikhu puzu panoqo laghi lhoksa lono ideighi luvike, kughengu AMPEU no pa loghu kighide eno pa xukighide pesu timi hipaqo shikichiveake.”

⁸ Ike Baruk no ino pa vilo shilopi piveke toi Achinekilo AMPEU tsa phisu.

⁹ Juda lo Jehoiakim no akukau shikeu ampe apunguu aqhi atokuulo timiqono AMPEU lopu lunishi kelauno kumvu ke. Kumvukeu tipauye Jerusalem lo akemi kumtsu eno Juda lo taunqo lono ighikemi kumtsuno ikhiluake.

¹⁰ Tilehi timi kumtsuno iniake lono likuzu kakulo ino pikeu pesu Baruk no phisu. Pano Achinekilo tipau shike, Safan nu kughakilo Gemariya chebo lono phisuke. Pa cheboye kughaki lashoulo Achineki Hukikha Akithe ikulola phivilo ake.

Likuzu kaku Phisu

¹¹ Gemariya nu Mikaiya pasuye Safan ke, pano AMPEU no pikeu Baruk no likuzu kaku lono phisukeu chiluve.

¹² Tipathiu pano akukau kighiki kudau wuve, tiye kugha kuthalo akiyeuno achekeu chebo kijemiqo kumtsu kuhono kuptsa keu ake. Kughakilo akiyeu Elishama, Shemaiya nu Delaiya, Akbor nu Elnathan, Safan nu Gemariya eno kijemi kutami kumtsu tilehi akhake.

¹³ Mikaiya ye Baruk no timiqo vilo phisukeu pano kiu chilu keno tipaqo kumtsu pesu panoqo vilo pike.

¹⁴ Tileno kijemiqono Nethaniya nu Jehodi eno pasuno Sheleniya eno pasu akuthuuno Kushi, ike pa puwu puzu Baruk vilo pano timiqo lau phisu akeu likuzu kaku pesu ighilo pikelo, Baruk no likuzu kaku panoqo lau pesu ighi.

¹⁵ Panonguno tileno pi, “Iqalo eno likuzu kaku nivilo phisulo.” Ikehu Baruk no tishike.

¹⁶ Baruk no tipau phisuve kelauye panonguno kutuxoxo lakhino lakhi kuju puzu Baruk vilo pi, “Ninguye akukau vilo hipau pesu kutughuve masae.”

¹⁷ Tithiu panonguno pa vilo ishi iniju, “Noye kishi puzu hipaqo kumtsu yelu keno nivilo pilo. Jeremiya ye ovilo hipau ashekichishi pitsu kesha?”

¹⁸ Baruk no khochile pi, “Jeremiya no hipaulo akeu tsa lothi kumtsu ivilo apasu shi pisutsuke eno ino likuzu kakulo shihi pesu hipau yesuke.”

¹⁹ Tileno panonguno pa vilo pi, “Jeremiya okujoye wupuzu itshuuve masake. Okujono khile ani keno khuu pelomu ithipe kevilo.”

Akukauno Likuzu Kaku Pitive

²⁰ Kijemiqono likuzu kaku pesu kughakutha-alo akiyeu Elishama chebolo qhive eno akukau kughakutha bolo wuveno tilauno thwokha kumtsu pesu akukau vilo lheve.

²¹ Tileno likuzu kaku sughi penike akukauno Jehudi puwu. Pano Elishama chebo lono tipau pesu ighi eno akukau vilo ngo kijemi tile pa suhope puthugho akemi kumtsu gizu lono tipau phisu.

²² Tiye susu tsala kighikilo ami phivilo iqa ake.

²³ Jehudi no tipau ala-ala shi yesukeu kuthu bidi phitave kelo akukauno azutachi pesu tipaqo ghatha puzu amilo tipau vesuveke. Likuzu kaku kumtsu qhoi pitikhaveke kutolo pano tishi auveke.

²⁴ Ikemu akukau na momu pawu kijemi namu tipau chilukemi khunomu akumsa shimoe momu amlo imekeu michi shikeu kuhae.

²⁵ Elnathan ngo Delaiya eno Gemariya noqono akukau vilo tipau piti kevilopi qhuiniju kemu pano tipaqo tsa phitsumoke.

²⁶ Tileno pano akukapuu Jeramel ngo Azriel nu Seraiya eno Abdil nu Shelemiya vilo ni eno iwu akiyeu Baruk ikujo kughalupe nike ahza tsuke. Ikemu AMPEU no ikujo pesu kughutshuve.

Likuzu Kaku kutau Yelu

²⁷ Ino Baruk vilo apasushi pisukeu likuzu kaku akukau Jehoiakim no pitivetsu kethiu, AMPEU no ivilo

²⁸ likuzu kaku kutau lupuzu atughiu kakulo akeu kumtsu tipaulo yepe qhilopike.

²⁹ AMPEU no ivilo akukau vilo ishi pilo pike, “Nono likuzu kaku pitivetsuke eno nono Jeremiya vilo kushiye Babilon kukau no ighi puzu ayeghi hipau kutsa leve nicheni eno tipaulo timiqo ngo lhoxuqo pithikhaveni cheni ke ipi yesu kelapi inijuke.

³⁰ Tighenguno itehiye ni, AMPEU no no akukau Jehoiakim vilo pianike, opolo kughukomi lakhimu David kukaqhalo ayehpemo nani. Okithikumoye khalau vepheve nani eno pucho tsalalo tipauye tsukinheno phuqhi nani eno puthono avutsano ghaqhi nanike.

³¹ Nongu no axine kumtsu shivekeu ghenguno ino opolo kughukomi ngo ow kijemiqo ghimeqhi nani. Noghi eno Jerusalem ngo Juda lo akemiqo ghi ino kutughukeu tsalo amlo sumoke: ike ino kutsakungo keu pesu nongu shikichi akeu kumtsu nongu shou ino sughi nani.”

³² Tipathiu ino likuzu kaku kutau lakhi pesu iwu akiyeu Baruk tsuve eno ino apasushi pisukeu thwokha kumtsu pano yepe qhive. Likuzu kaku atughiulo akeu thwokha kumtsu pano tipaulo yesuluve eno atsape titoikeu ino pa vilo pikeu kumtsu yesuve.