JEREMIYA 35 - BAIBEL (BSI)

Jeremiya ngo Rekhabami

¹ Kughou Josiya nu Jehoiakim no Juda lo akukau shiakeno AMPEU no ivilo pi,

² “Rekhaba limiqo lau wulo eno panoqo putsalo. Tishino panoqo sasu Achineki chebo lakhilo sailoghi puzu atsayi ji pesu panoqo piyejulo.”

³ Ikehu ino Rekhaba limiqo kumtsu, Jeremiya ijesho nu Jazaniya, pasuye Habzaniya ke, pa eno pa thikuzumi eno anuqo saighino

⁴ Achinekilo sawuke. Ino panoqo sasu Igdalia nu tungkupu Hanan khophemiqo chebolo iloke. Achebo tipauye Shalum nu Maseiya, Achinekilo kijemi akhotou shiakeu chebo shouke eno tiye kijemi kutamiqo chebo kupunuloke.

⁵ Tile ino ajukhu ngo alilo atsayiji chhitoi suwo Rekhabami zulo qhitsu eno panoqo vilo ino ishi pi, “Atsayi ji ta shojulo.”

⁶ Ikemu panonguno ishi khochile, “Ninguye atsayiji shochemoke, nisu Jonadab, Rekhaba nuno nivilo pikeuno ningu pina nitikughuko namu aji khilemu sho kevilo pike.

⁷ Pano nivilo pikeuno aki mu shi kevi momu alu namu chi kevilo eno atsayilu pighi kevi momu tipaqo qhu kevilo pike. Pano nivilo ahza tsukeuno pulhapuju aphikilo achelopike, tishianguno ninguno inami kumlhoshi achekeu yeghi hipaulo ninguye ngolu chekepu shilo pike.

⁸ Ninguye Jonadab no nivilo akukutsu-tsa tsukeu kumtsu papelu achenike. Ninguye khilemu aji shochemo eno ninipuqo pina nitianuli kiptimi totimi namu sho chemoe.

⁹ Ninguye ngokepu ki namu shipe qhichemoe, ninguye aphikilo acheni eno ninguye atsayili pina, alu na, athi namu pighichemo ke.

¹⁰ Ninguye nisu Jonadab no ahza tsukeu thwokha kumtsu qhoyi papelu achenike.

¹¹ Ikemu kughou Akukau Nebukadnezar no aghakhuqha haleghi keno ninguye Babilon ghushimi ngo Siriya ghushimi launo wuveniaye Jerusalem lo ighinikeu shi kuptsaveke. Highenguno ninguye Jerusalem lo achenike.”

¹² Tileno Aqokitikhi MPEU Israil Lhou no ivilo Juda ngo Jerusalem lo akemi timiqo lau wuno pilopike,

¹³ “Ni, AMPEU no nongu vilo iniju anike nonguye kushiye itsa inimopi eno ino akukutsu tsukeu papemo pikya?

¹⁴ Jonadab tikughukomiqoye pano aji shokevilo pi ahza tsukeu papelu acheni eno ishi tsala kutolo panonguye khunomu aji shochemoe. Ikemu niye nongu putsa acheni eno nonguye ipapelumoke.

¹⁵ Ino tamono nongu lau iqemi tungkupmi kumtsu puwu acheni eno panonguno nongu vilo nongu laghi lhoksa pheveno kiuno achipi keno tipau shilopi cheni. Panonguno nonguye kutau lhouqo mllapemo eno qepemo nike kutughu acheni, tishianguno ino nongu eno nopuasuqo tsukeu yeghilo xuache peniyeke. Ikemu nonguno ino pikeu initsumoe momu ilau amlo tsukeu kuhae.

¹⁶ Jonadab tikughukomiye pano puasuno ahza panoqo tsu keu papelu ikemu no timiqoye igholumoke.

¹⁷ Ike, ni Aqokitikhi MPEU, Israil Lhou no itehiye nongu Juda ngo Jerusalem lo akemiqo shou kutsaleveni keu ino tushoqhi puakeu kumtsu sughini cheni. Ino hipau shinikeu shiani kughengu ino nongu putsa keulo nonguno itsa initsumoke, ino nongu kukelo nonguye ikhochilemoke.”

¹⁸ Tileno ino Rekhaba laghami vilo Aqokitikhi MPEU, Israil Lhou no pikeu pesu ishi pi, “Nonguye nosu Jonadab no ahza nongu tsukeu papeluke; nonguye pano akukutsu tsa tsukeu kumtsu papeluke eno nonguye pano ahza nongu tsukeu thwokha shi chenike.

¹⁹ Tighenguno, ni Aqokitikhi MPEU, Israil Lhou no tushoqhi anike Rekhaba nu Jonadab ye iqenikeulo pa laghami gholo kiptimi lakhimu kuhavepe keu shi pemo nani.”