JEREMIYA 34 - BAIBEL (BSI)

Zedekiya lau Atsape

¹ Kughou Babilon kukau Nebukadnezar ngo pawu aghumiqo, ashiayeh jeli khunoqono pa qholo achekemiqo muqono panoqo choqhepe puzu Jerusalem ngo tipau holo taunqo le akeno AMPEU no iputsake.

² AMPEU Israil Lhou no ivilo Juda lo akukau Zedekiya lau wuno pilo pike, “Ni, AMPEU no aphughi hipau Babilon kukau ulo suvetsuni cheni eno pano tipau pitileqhive nani.

³ Noye pomla nani; noye kughaluveno pa ulo suve nani. Noye agi kinheqhi pa sasu kusholu nani eno ampino kuptsa nani; tishi puzu noye Babilon lo wu nani.

⁴ Zedekiya, noye kishive nani keno ino ovilo pikeu inilo. Noye aghu kishi lono pithivemo nanike.

⁵ Noye iquighaikeu lono thive nani eno ozuu kukami khunoqo thivea keno tipaqo kumo shi qhokelo tsungquikeu ta timiqono pitike toi, tipaphi lono oghenguno panonguno tsungquikeu ta pitikumna nani. Panonguno oshou mloqah ishi pinani,’ Ni kukauye thivae!’ Ni, AMPEU no piveake.”

^6-7 Babilon ghushimino aphughi le ake lono ino atsape hipau pesu Jerusalem kukau Zedekiya tsuveke. Aghushimino Lakis ngo Azeka ghi leake, Juda lo hikuma likhino aliwo putupuakeu phughi kutau shiake.

Aquaxemi Pishipiyi keu

⁸ Akukau Zedekiya ngo Jerusalem lo akemiqono pano timi Ibrimi aquaxemi kiptimi na totimi namu phepuwuve nikeu shi pulokilekeu lakhi shive,

⁹ tishi anguno khumu pano Israilmi lakhi pesu aquaxe shipemoni keu shike.

¹⁰ Timi kumtsu eno pano sakiphemi kumtsuno pano quaxemi pheve nikeu eno khilemu tipaqo pesu itaghi aquaxe shipemo nikeu shi pulo kileveke. Panonguno tipaqo phepuwuve,

¹¹ ikemu athiuye panoqo kukumsu kilive puzu panoqo sachile luve eno tsuyikhomo panoqo pesu itaghi aquaxemi shipe nikeu shive.

¹² Tileno AMPEU tsa ilau ighi,

¹³ Israil Lhou no timiqo vilo pipeniye ivilo pike: “Kughou ino nopuasuqo Ijip lono xaphelu eno aquaxe lono panoqo kuqhophe keno tileno ino panoqo sasu puloshoqhi lakhi shike. Ino panoqo vilo pikeuno

¹⁴ ampe tsuninilo panonguye Ibrimi khukhumu ampe tsugho panoqo qevekemiye phepuwuveni keu pike. Ikemu nopuasuqono ilau amlo tsuqhiyi keu kuha momu ino kiu pikeno tipau initsumoe.

¹⁵ Atsala kinia kuthua shiaphike nonguno nomlo kilive eno ipulou shike. Nongu kumtsuno nokusami Israilmi pheve nikeu pulokileve eno achineki khile imlla cheni keno tilehino nonguno igizu lono puloshoqhi shike.

¹⁶ Ikemu nonguno nongu kukumsu itaghi kilive eno igihumoveke. Nongu kumtsuno aquaxemi panonguno pulo ake toi phepuwuve kemiqo itaghi sachileluve eno panongu pelo itaghi tsuikhomo aquaxemi shipeke.

¹⁷ Ike itehiye, Ni AMPEU no pianike nonguno ihebide ani: nonguye nowu timi Israilmi pano gho shipemovae. Tishiaye jualo, ino kuqhokiphe pesu nongu tsuveni: aghukishi, akusukini eno akhuava lono thinikeu kuqhokiphe tsuni. Ino ayeghiqhalo ashiayeh akeqo pelo nongu shou kiu shikeno jukichi peni cheni.

¹⁸ Juda ngo Jerusalem lo kijemiye akukau kilo kijemi akeqo achinemi eno sakiphemino kumtsa puzu isasu puloshoqhi lakhi shike, tiye panonguno amshitsu lakhi kini shi xaphape qhipuzu tikuma mta lono chewughi shike.

¹⁹ Ikemu panonguno puloshoqhi kubove eno tipaulo shi nikeu shi akeu pemoveke. Tighenguno panonguno amshitsu pesu kishi shikeno ino timi hipaqo shou shi nani.

²⁰ Ino panoqo pesu khunono panoqo pithi nishi cheni keno tipaqo ulo suvetsuni eno panoqo kithi kumoye aghau ngo tughashiqono chuve nani.

²¹ Ino Juda kukau Zedekiya ngo pawu kijemiqo ghi khunono panoqo pithive nishi cheni keno tipaqo ulo suvetsu nani. Ino panoqo pesu Babilon ghushimi ulo suvetsuni, tipaqoye nongu le taveno anike.

²² Ino ahza tsunani eno panonguno aphughi hipaulo ideghi nani. Ino Juda lo taun akeqo pesu asayeqha khunomu xumlakeu toi shivetsu nani. Ni, AMPEU no piveake.”