JEREMIYA 33 - BAIBEL (BSI)

Lajupu Shoqhi Kutau

¹ Kughakutha bocholo ikughape akughu shipe pua kelo AMPEU tsape itaghi ilau ighi.

² AMPEU khuuno ayeghi mla, khuuno tipau lhophe eno tipau pesu tipa-alo qhikeno, pano iputsake. Pa je AMPEU ipikeuno ishi pike,

³ “Ikulo eno ino okhochile nike; akumzapu ngo akichiqhi kepu thime nono kitilamu mthano achekeu pesu ino ovilo pinike.

⁴ Ni, AMPEU, Israil Lhou no pianike Jerusalem lo akeqo eno Juda kukau kighikiqoye ghapho pinyive nani. Babilonmino ayeghi tope shipuku puakeu sasu aghu shinike ipekeu adouke.

⁵ Tipau shiayeh ino iloghu kighide lono khuno hekuluqhini cheni keno tipaqo kithi kumono aphughi chitoi keu likhi shiniake.

⁶ Ino aphughi hipau launo tsughusu wuvekeuye tipaulo timiqono alhoksa jeli shikeu ghengunoke. Ikemu ino aphughi hipau ngo tile akemiqo shipivi nani eno vithai akeulo panoqo sachile saghi nanike. Panoqo lau iquighai keu ngo sushokulu lukumkhashi ino piye nani.

⁷ Ino Juda ngo Israil pesu kinikulu shitsu nani eno panonguye puzuu kishi akeno titoi ino panoqo xaqhepuku kithe nani.

⁸ Panonguno ishou axine shikeu ino panoqo qhu kimthetsu nani, ino panoqo xine ngo panonguno hebidekeu peivetsu nani.

⁹ Jerusalem ye ilau alokivi, agigihupu eno akijivilo kepu puki shive nani; eno ino Jerusalem lo akemi qo lau akivipu jeliqo shikeu ngo aphughilo ino kinikulu shilupekeu ayeghiqhalo ashiayeh kumtsuno chilu puzu panonguye musa ighuve nani.”

¹⁰ AMPEU no pi, “Timiqono piakeuye a-a hipauye asayeqha toike, tipaulo timi kuhae momu tipaulo tughashi lhoxu ngomovae. Panonguno piakeu tiye achipike; Juda lo taunqo eno Jerusalem laghilaqoye yenguyeleivae; timi mu lhoxuqomu tilehi kuha. Ikemu a-a hipaqolo nonguno itaghi

¹¹ alokivi ngo alokiqishi ighakeu sutsa eno kulakupu ghulhu lokivi sutsa chilu nani. Timiqono iAchine ki lo shikimthi kumllagho peighikelo alephekeu nonguno chilu nani; panonguno ishi pinani, ‘Aqokitikhi MPEU lau shikimthi tsulo, kughengu paye aloke eno pa kikimiyeye lhokta kutolo acheni!’ ” “Ino ayeghi hipau pesu puzuu toi kinikulu shipe nani. Ni, AMPEU no piqhiveake.”

¹² Aqokitikhi MPEU no pike, “Ayeghi hipau asayeqha toikeu lakhi eno khilehi timi momu tughashi lhoxumu kuhakeulo itaghi bherikhemino pano bheriqo sawuno muzalu kepu tsuni anani.

¹³ Naghutolo taun akeqolo, naghuto kuxalo, Juda apeu kudaulo Benjamin lughi bocholo, Jerusalem kumxalo aphulo eno Juda lo taun akeqolo bherikhemino itaghi pano bheri kihikithe nani. Ni, AMPEU no piveake.”

¹⁴ AMPEU no pi, “Ino Israil ngo Juda lo akemiqo lau tushokiqhi shipuakeu shikuputsu nikeu ghuloki cheni.

¹⁵ Tipa ghulokilo David laghami amikucho lakhi akukau shipenike ino kishelu nani. Akukau tipauno aghakhu kumtsulo kiuno achipi eno kuchou keno tipau shi nani.

¹⁶ Juda ngo Jerusalem lo akemiqoye xapheluve nani eno sushokululo xulu nani. Aphughiye ‘AMPEU no Ni Xakulu-u’ ipi ku nani.

¹⁷ Ni, AMPEU no tushoqhi anike pulhapujulo David laghami lakhino Israil lo akukau shiachepe nani

¹⁸ eno Levi laghamino pulhapujulo achinemi shipuzu iqe nani eno akipti kumllagho, athi kumllagho eno aghashipe imllachepe nani.”

¹⁹ AMPEU no ivilo pike,

²⁰ “Ino pucho tsala ngo putho tsala sasu puloshoqhi shivae, tishianguno panonguye pulhapuju panoqo do achipi lono ighi cheni; eno tipau puloshoqhiye khilemu kubovemlake.

²¹ Tipau paphi lono ino iqeu David sasu puloshoqhi lakhi shiveake, tiye pulhapujulo pa laghami pelo akukau shiche penikeu eno ino Levi laghami gholo achinemi sasu ino puloshoqhi lakhi shivae tiye panonguno pulhapuju iqe che nani; eno puloshoqhi tipaqoye khilemu kubolevemla nani.

²² Ino iqeu David laghami ngo Levi lagha gholo achinemi alau ikowolupe nani, tishikehu atsutsulo ayepuqo kihikhamlake toi momu azughi mukulo asaye lothi kihi khamlake toi panoqo kihikhamla nani.”

²³ AMPEU no ivilo pi,

²⁴ “Timiqono hishi pi akeuno ino Israil ngo Juda pama, hi akibo kini kisheluve keu pamaye ino pevea kepi timiqono kishi piani keno nonguye ithiama? Ikehu panonguno iwu timiqo shou mithi keu lono jupuku cheni eno panonguye ashiayeh lakhi kepi kihi chemoke.

²⁵ Ikemu Ni, AMPEU no pucho tsala ngo putho tsala sasu puloshoqhi shipuamo kenapiaye eno ayeghi ngo atsutsu ghasupe nike ino ayezah mlapuamo kena piaye,

²⁶ niye Jakob laghami ngo Iqeu David peve nike eno David laghami lakhi kishe pesu Abraham ngo Isak eno Jakob laghami shou ayehpe pemoni cheke. Ikemu iwu timiqo shou ino kimiye qhiyi nani eno itaghi panoqoye kinikulu shipe nani.”