JEREMIYA 31 - BAIBEL (BSI)

Aghakhulo Israilmi Ideghi

¹ AMPEU no piani, “Ino Israil lo alaghami akeqo kumtsu Lhou shiluvenikeu ghuloki wocheni eno panonguye iwu timi shive nani.

² Asayeqhalo timi khunoqono akithi lono poluve keno tipaqo shou ino kupuqhiyikeu ake. Kughou Israilmiqono akulho qhinishi kutu keno

³ ino putosuuno panoqo lau ipeghi piyeke. Israil lo akemiqo, niye pulhapuju nongu kimiyeke, ikehu iwu iqemokeu kikimiye pesu ino nongu lau piyechephike.

⁴ Itaghi ino nongu xaqhepuku kithe nani. Itaghi nonguno amuqu lebo ikhilu puzu alokivi launo ilhe nani.

⁵ Itaghi nonguno Samaria toghiqolo atsayilu chi nani, eno khunoqono tipau chini keno atsayilulo ipeghikeu panoqono chulu nani.

⁶ Kughengu, aghukhemino Efraim tolono ishi asheshu kupuwunikeu tsala wocheni: ‘Ningu Zion lo iqhoni nolo, AMPEU, niLhou lau wunike!’ ”

⁷ AMPEU no piani, “Israil, ashiayehqo gholo akijeu ghenguno alokivishi alephelo. Nonguno shekiqhe le phelo, ‘AMPEU no pawu timiqo xaluvae; khunoqo qhipuaghi keno pano xapheluvae.’

⁸ Ino ahuu kudauno panoqo saghi nani eno ayeghi shekha kudauno panoqo hekutsu kumqonike. Anhethi kighichemi ngo aphi au kinitave kemino panoqo gholo ighi nani, Mishibei akemi ngo pununiye akemiqo ghi ighi nani. Panonguye ashiayeh kije lakhi shi ighi nani.

⁹ Iwu timiqoye qasusu ideighi nani, ino panoqo sachile wochekelo inikhu ghi ighi nani. Aghokiti kudau ino panoqo kichepiye nani, panoqo pelo kupuxalumo kepu alaghi kumdulo sawu nani. Niye Israil lau apuh lakhi toike, eno Efraim ye inu akichiuke.”

¹⁰ AMPEU no piani, “Ashiayehqo, itsa inilo, eno putosuu azughi phivilo itsa pesu asheshulo. Ino Iwu timiqo haleveke ikemu ino panoqo hekutsu kumqo nani eno bherikheuno pawu bheri loji khekuto keshi ino panoqo khe nani.

¹¹ Ino Israil wu timiqo phepuwuvae eno ashiayeh kuloghi lakhi launo panoqo xaluvae.

¹² Panonguno Zion Tolo ighi puzu alokivi launo ale phe nani eno ino kumsagho tsukeulo azukuvu shive nani kumsagho tipaqoye athi, atsayiji, oliv teli, bheriqo ngo amshiqo. Panonguye azu akivishi suchekeu ghutu toive nani; panonguno avehupu shikeu kumtsu aluve nanike.

¹³ Tileno ilimiqono ilhe puzu alokivi shi nani, kiptimi lhothemi ngo mucho-mino alovi nani. Ino panoqo lokughunotsu nani eno panoqo mlo kughujuye alokivi shikitheve nani, pano mloksaye amlo kiqi shive nani.

¹⁴ Ino achuqupu kinikulu pesu achinemi shepichhitsu nani, eno iwu timiqono avehupu shiakeu kumtsu ghapiqitsu nani. Ni, AMPEU no piveake.”

Israil shou AMPEU Kukupu

¹⁵ AMPEU no piani, “Rama phulo asutsa lakhi chiluke, amlo itapinyi qakeu sutsa. Rachel ye li tianuli ghenguno qa ani; tipanoqoye kuhavae, eno liye alokughunotsu nikeu milive ani.

¹⁶ Okuqa tavelo eno onhezuqo isuvelo. Nono atianuli ghenguno mlakeu kumtsu asaxu tsumono puwuve-keu shimoke; Panonguye aghumi yeghi lono ide ighi nani.

¹⁷ Nongu ghenguno ighinikeulo lajupu ani; otianuliye aghakhulo ide ighi nanike. Ni, AMPEU no piveake.

¹⁸ ‘Israil lo akemino amlo ghimeshi pikeu ino chilu, “ AMPEU, ninguye lhoxu chhikughuvumo keu toive Ningu sachile saghivelo; ninguye olau xaideghinike kutope ani AMPEU niLhou.

¹⁹ Ninguno olauno tsughusu wuveke, ikemu ninguye kighithe olau xaideghi nishi anike. Nono nighimeqhive kethiu, ninguye amlo ghime lono akutsu pishiqholuveke. Ninguye kujokighiyiveke kughengu ninguno alhothe shiakelo axine shiveke!”

²⁰ “Israil noye inu ino qhuchekeuke, ino kumtsu nguno kimiyekeu nuke. Kughokughomu ino oje ku kelo, kimiyeqhiyi okumsuluke. Imloye okudau acheni; niye okupuqhiyi nani.

²¹ Amchi shikeu peqhelo eno alaghi amchi shilo; nono khipala lono cheve keno tipau laghi phukithelo. Ideighilo, O Israilmiqo, nonguno qhivekeu taunlo ideghilo.

²² Nonguye ado khitohi pulumlano avehu kunacho akemi shinani kya? Ino kiukela akithe pakutakeu lakhi lhophetsu ani, totimi lakhino kiptimi susholukeu toike.”

Ighinikeulo Alokughunopu

²³ Aqokitikhi MPEU, Israil Lhou no piani, “Kughou ino timiqo pano yeghilo sachile saghini keno, panonguno itaghi Juda lo taun akeqo yeghi lo ishi pinani. ‘AMPEU no Jerusalem toghi akimtheu kumghatsu peniu, akimthe-a khilehi pano achekeualo,’ ”

²⁴ Timino Juda lo taun akeqo kumtsu kughuna nani eno tilehi alukichimi ngo bherikhemino pano bheri loji sasu anani.

²⁵ Khunoqo aghuthisu ani keno ino aghuthi puxu tsu nani eno akhuamzu lono miqemileive kemiqo kumtsu ino achuqupu pesu aghapiqitsu nani.

²⁶ Tishikeuno timiqo no ishi pinani, “Ino zuhuve puzu idathughi kelo aloponyivae.”

²⁷ “Ni, AMPEU no pianike ino Israil ngo Juda yeghi lo timi eno lhoxu pesu chhitoi tsunikeu ghuloki cheni.

²⁸ Ino panoqo nhuve, tulaqhi, haleqhi, kutsale eno tulenikelo kutokupui shike toi ino jukutokugho puzu panoqo shosuni eno panoqo xaqhepuku nanike.

²⁹ Kughou tipa ghuloki ighini keno timino ishi pikithemove nani,”

³⁰ “Tishinike zuqhulo, khunono atsaithi akiqhi chuni keno pa likhi pa hu muqu nani; pututa xine ghenguno pututano thi nanike.”

³¹ AMPEU no piani, “Ino Israil lo timi eno Juda lo timiqo sasu puloshoqhi akithe lakhi shinikeu ghuloki wocheni.

³² Tipauye ino pano puasuqo au lono sunhepe puzu Ijip lono panoqo saipevekeu ghulokilo panoqo sasu puloshoqhi aqau shikeu toimo nanike. Niye panoqo kimi toi shiakemu panonguno puloshoqhi tipau pemoveke.

³³ Puloshoqhi akitheu ino Israil lo timiqo sasu shinikeu huye hike: Ino iyezah pesu panoqo lolo suvetsu nani eno panoqo mlolo yepuku nani. Ino panongu Lhou shive nani eno panonguye iwu timi shive nani.

³⁴ Panoqo gholo khunomu pano ghakhumi vilo AMPEU ithilo ipi shikapiyeni chemoke, kughengu kumtsuno ni ithi nani, aku-amighiu lono akijeu kushu kutolo. Ino panoqo xineqo pevetsuni eno niye, khilemu panoqou kivikumo kumsupu ache move nanike. Ni, AMPEU no piveake.”

³⁵ Puchou tsalalo akuvu ghenguno AMPEU no tsukinhe kutotsuke, putholo vuqai penike aqhi ngo ayepuqo tsuke. Pano azughi xukutho puthuke eno tipau igha chenipeke; pa jeye Aqokitikhi MPEU ke.

³⁶ Pano tushoqhive keuno alhoaye kikithi hipaqo ake kutolo, titohilo Israil ye ashiayeh lakhi shi ananike.

³⁷ Atsutsu kunguu akeu mighiwo toluve aye eno ayeghi boqhaqo phuphekhaluve aye, tilehi likhino AMPEU no pawu timiqo peveni cheni, tiye panonguno mlavekeu kumtsu ghenguno. AMPEU no piqhivae.

³⁸ AMPEU no pianike, “Jerusalem qha kumtsu iphughi kepi shipuku kithe luvenikeu ghuloki wocheni, tiye Hananel Liwo ghukhea kulolauno Acheku Khagho kutoke.

³⁹ Alughiye tipau kulolauno Gareb toghi kuto eno Goa vehoke kutolo tishi ache nani.

⁴⁰ Akhila kumtsu khilehi kithimi qho cheni eno tubatuzu pele cheni eno Kidron ghokiti ahuu kudau aluqa akeqo kumtsu kipelau Khurshi Khagho kutolo ilau akimthe shipe qhi nani. Aphughi huye itaghi khilemu hepho piniyivemo momu kutsalevemo nanike”