JEREMIYA 3 - BAIBEL (BSI)

Amikuchokumo Israil

¹ AMPEU no pi, “Timi lakhino pa nipu sasu ixave aye eno lino pa launo wuve puzu kutami nipu shive aye paye li sachilelu kithe mlake. Tishiaye, tipa yeghi qhoi shipixive niake. Ikemu Israil, nonguye alojipumi kutomo auve puzu itehiye ilau ideighi nishi ani kesha?

² Atoghi kutsuqalo jupukulo. Nonguno kusalhami toi zumokeu-a khile ani kya? Arabmino asayeqhalo timi heqhi nike miqe khe akeshi nonguno ala phivilo alojipumi khe acheni. Nongu salhano ayeghi shipixi khave ake.

³ Tighenguno tsutsughu suchileluvae eno ghixu tsutsughu ighimovae. Ikeghi nonguye kusalhami lakhi ju kimihike; nonguye akukujo kuhamitheke.”

⁴ “Itehiye nonguno ivilo piani, ‘Noye nipuke eno ino itimi shiaphi lono noye ikimiye achenike.

⁵ Noye alhokuthu lo amlo idemo nanike; noye ashekha kutolo aloghu idemo nanike.’ Israil, nonguno tishi pike ikemu nonguno toluke thaqhulo alhoksa kumtsu shicheni.”

Israil ngo Juda ye Xachileighi masake.

⁶ Kughou Josiya no akukau shi akeno AMPEU no ivilo pike, “Noye Israil amikucho kumou totimi huno kiu shikeno noye ithulu akema? Liye ilauno wuve puzu atoghi kuchuqu kumtsulo eno asu minipho jeli qholono kusalhami toi mlaitha achenike.

⁷ Lino hipau kumtsu shive kethiu liye mutsuqheino ideighi nani kepi ino kumsuake. Ikemu liye ilau ideighimoveke eno litsunipu amikucho kumou Juda no tipau kumtsu ithuluake.

⁸ Ino Israil kughuxave keu eno li puwuve keu Juda ghi ithuluvae, kughengu lino ilauno tsughusu wuve puzu kusalhami shiuveke. Ikemu Israil tsunipu amikucho kumou Juda ye musamoe, li ghi kusalhami lakhi shive

⁹ eno kitilamu kujomo mitheve. Lino ayeghi shipixive eno lino atu ngo asubo mllakeu lono kutuqhalimi shiveke.

¹⁰ Hipaqo kumtsu shive kethiuno, Israil tsunipu amikucho kumou Juda ye amlo kuchopuno kumono xaide ilau ideighike yeh shike. Ni, AMPEU no piqhi ani.”

¹¹ Tile AMPEU no ivilo pikeuno Israil ye pa launo tsughusu wuve peniu liye amikucho kumou Juda nguno akiviu pike.

¹² Pano ivilo wuno Israil vilo pilo pike, “Amikucho kumou Israil, ilau ideighilo. Niye kimiyekinike eno amlo idemo nani; niye alhokupuju oshou amlo idemo nanike.

¹³ Okuyiqu likhi ithichilelulo eno noye AMPEU oLhou shou hebideve kepi ithilulo. Asu minipho kumtsu qholono nono inagha lhouqo lau owu kikimiye tsuve eno noye ino ahza tsukeu papelumove kepi piphevelo. Ni, AMPEU no piqhi ani.

¹⁴ “Amikucho kumomiqo; nonguye iwuke. Aphughi lakhikhi lono ino nongu milakhikhi luni eno alagha lakhikhi lono mikinini luni eno ino Zion Toghilo sachile saghi nanike.

¹⁵ Igholukemi ayehkipemi ino nongu tsunani eno panonguno alokutsu eno ithitoikeu lono nongu shou ayehpe nani.

¹⁶ Kughou tipa yeghilo nonguno kutomo shiveni keno, timiqoye iwu Puloshoqhi Bohu ghili kughamove nani. Panonguye tipau kumsukepu shimove nani momu kumsumlave nani; panonguye tighi avehupu shimove nani momu panonguye tipau kutau lakhi shipe qhimove nani.

¹⁷ Kughono tipa tsala ighini keno Jerusalem ye ‘AMPEU kuka lakhu’ ipi kunani, eno ashiayeh kumtsu imllanike tilehi kumqo nani. Panonguye pano mlo lhoksa eno kuthovi keu mlono panoqo vilo pikeu shikide kithe move nani.

¹⁸ Israil ye Juda gholo pekuqhave nani eno panongu kumtsa ahuu ayeghi akeu kudauno halepuwuve keu lono ighini eno ino nongu puasu lau amheghipu shi tsukeu yeghilo ide ighi nani.”

Alhou Wu Timino Ajulho mlla

¹⁹ AMPEU no pi, “Israil, niye opesu inu shipenishike eno ayeghi kivi otsunishi ani, ayeghiqhalo ayeghi jukiviuke. Niye opelo apuh kepi iku penishike eno ilauno khilemu tsughusu wuve penishimoke.

²⁰ Ikemu amikucho kumo nipu toi noye ilau amikucho shi achemoke. Ni, AMPEU no piqhi ani.”

²¹ Naghuto toghiqolo asutsa lakhi chilu. Hiye Israil lo akemino qa ani eno qhuiniju anike, kughengu panonguno axine shikeu kuxu xuke eno pano Lhou AMPEU kumsumaveke.

²² Xaideghilo, AMPEU launo wuvekemi nongu kumtsu ighilo; pano nongu shipivi nani eno nongu pesu amikucho shitsu nani. Nonguno ishi pilo, “Iye, ninguye AMPEU lau cheni kughengu paye ni Lhou ke.

²³ Nino naghuto toghilo asu atu mllakeuno kiumu nikuphuluni chemoe. Israil kukuphuye niLhou AMPEU lau likhino ighi cheni.

²⁴ Ikemu Baal akukujopu lhou mllakeu lono nitsu aqu, anu anga noqo, kha-ghi ghuloki lono nipuasuno mlla chekeu kumtsu puhakhave tsuake.

²⁵ Ninguye akukujo launo ihozuno shikuputhano ninhaluve pelo. Ningu eno nipuasuqoye pulhapuju niLhou AMPEU zulo axine shi chenike. Ninguye khilemu pa zah kutsu papelu chemoke.”