JEREMIYA 27 - BAIBEL (BSI)

Jeremiya no Kuokhasu Pepu

¹ Zedekiya nu Josiya no Juda kukau shiluve kethiu ado kushuwa womo puzu AMPEU no ivilo

² ashiyiko kighi ngo asu hektalukeu pesu kuokhasu mulano ikuolo pepulo pike.

³ Tishi puzu AMPEU no ivilo Edom, Muab, Amun, Tur eno Sidon lo kukami lau asutsa tsu puwulo pike, tiye Jerusalem lo Akukau Zedekiya juniye pututa yeghilono lashikami ighikeqo vechewo pipuwulo pike.

⁴ Aqokitikhi MPEU, Israil Lhou no ivilo panoqo pelo pututa kukau vilo AMPEU no pikeu pipenike ahza tsulopike,

⁵ “Ikuka kumto kije pesu ino ayeghiqha ngo timi lhoxu eno ayeghilo xuakeu lhoxu kumtsu lhophetsuke; eno tipau pesu khuu khumu ino kishelukemi tsucheni.

⁶ Ashiayeh hipaqo kumtsu pesu iqeu, Babilon kukau Nebukadnezar kuka qholo qhitsu keuye inoke, tughashi ghi pa qepeni keushi ino qhitsuke.

⁷ Ashiayeh kumtsuno pa qe nani, eno pa shiayeh ikiqinikeu ghuloki ighimoke kutolo panonguno panu ngo pa tianu qe nani. Tithiuno pa shiayehno ashiayeh kumtomi ngo kukami kijemiqo qewuve nani.

⁸ “Ikemu khipau shiayeh momu khipau kukaqhano pa yehkipe qholo ngomoni keno, ino aghukishi, akhuava eno kusukini pesu tipa shiayeh ghimeqhi nani, tiye Nebukadnezar no tipau qhoi kutsalevemoke kutolo tishi nani.

⁹ Nowu tungkupumiqo pina momu khuu khumu pano asamouno momu kithimi ghungu kusaghikeu lono momu kuduu lono ighinikeu ghili ashe-azu shi pitsulu nani kepi picheni keno tipaqo tsa ini kevilo. Panongu kumtsuno nongu vilo Babilon kukau qholo ngo kevilo pichenike.

¹⁰ Panonguye nongu pishiqhi anike eno noyeghi lono putosuu sawuve peniye kughu auveake. Ino nongu hapheveno kutsaleve nanike.

¹¹ Ikemu ashiayeh khipaqono Babilon kukau qholo ngoluveni keno, tileno ino tipau pelo pano yeghilo ngoalu, tile alu chilu eno tilehi kughuna lu pe nani. Ni, AMPEU no piqhiveake.”

¹² Ino tipatho lono Juda lo Akukau Zedekiya vilo pike, “Babilon kukau qholo ngoluvelo. Pa eno pawu timiqo qelo tishiaye nonguye xulupe nanike.

¹³ Kushiye no eno owu timiqoye aghukishi lono momu puqumiyekeu lono momu kusukini lono thiani kya? Tiye AMPEU no pikeu tsake, khuno shiayeh no Babilon kukau qholo ngomoni keno tipanoqo shou shinikeu pivae.

¹⁴ Tungkupmi khunoqono nongu vilo pa qholo qhoi phesuve tsu kevilopi lakhani keno tipaqo tsa initsu kevilo. Panonguye nongu pishiqhi anike.

¹⁵ AMPEU no piveake paye panoqo puwu puamoe eno panonguye pa je lono nongu vilo akimiki tsa pianike. Ike pano nongu hapupove nani eno nonguye heqhi pithive niake, nongu ghi eno nongu vilo akimki tsa hipaqo piakemi tungkupmi ghi pithikhave nanike.”

¹⁶ Tileno ino achinemi ngo timiqo vilo AMPEU no pikeu pesu pike: “Tungkupmi khunono achinekilo akini pekutsu puakeu Babilon lono itheno suchile sughive nani kepi picheni keno inikevilo. Panonguye nongu vilo mikikeu tsa pianike.

¹⁷ Panoqo tsa inikevilo! Babilon kukau qholo ngovelo eno nonguye xulupe nanike! Kushiye hipau phughi pesu hexalepini kumqo puakeu shiapeni kya?

¹⁸ Panonguno kuchouno tungkupmi keaye eno panonguno itsape pecheni aye, panongu pelo ivilo, Aqokitikhi MPEU vilo Achineki lo akini pekutsu puakeu eno Akukau kilo akeu Babilon lo pewu pemo nike inijupelo.”

^19-20 (Akukau Nebukadnezar no Juda kukau Jehoiakim nu Jehoiachin, Juda, Jerusalem lo atou shi saphe chekemiqo Babilon lo sawuve ke ghulokilo; pano atsukuchoqo ngo alazayi zutughuko, mishikulu eno achinekilo tinhemgha kutau hamiye pano qhivetsuke.)

²¹ “Ni, Aqokitikhi MPEU, Israil Lhou no kiu piani keno inilo, achinekilo akini pekutsupua keu gholo hami qhipuatsua eno Jerusalem lo kukamiqo kilo qhipuatsu akeu vehu inilo:

²² Tipaqoye Babilon lo pewuve nani eno ino tipau shou imlo tsuqhiyi kumsulumo ke kutolo tilau ache nani eno hipa alo sughi no qhi nani. Ni, AMPEU no piqhiveake.”