JEREMIYA 26 - BAIBEL (BSI)

Jeremiya shou Kughanike Saghi

¹ Josiya nu Jehoiakim no Juda lo akukau shilukeu kushuwa kumolo

² AMPEU no ivilo pike, “Achineki khalalo puthugholo eno ino ovilo khunoqono Juda taunqo lono tilehi mllanike ighini keno tipaqo vilo pilopi ino ahza otsupuakeu pesu asheshulo. Tipau lakhimu qhive kevilo.

³ Ishiake timiqoye initsu luvike eno pano laghi lhoksa pheve luvike. Tishiaye ino panoqo shou pano kumla lhoksa ghenguno kutsalekeu sughiniye kughuchhope ino kumsu pu akeu kilive luvike.”

⁴ AMPEU no ivilo timiqo vilo pilo pike, “Ni, AMPEU no piveake nonguye ikukutsu tsa no tsukeu papeno aghokulu shimasake,

⁵ ino tungkupmi, iqemiqo khunoqo nongu lau puwu acheni keno tipaqo tsa amlo tsuqhiyi papekeu lono aghokulu shimasake. Nonguye khilemu panonguno pikeu aghokulu shichemoke.

⁶ Nonguno hebide auve aye ino Shilo lau kiu shikeno Achineki hipau shou shipuku nanike, ayeghiqhalo ashiayeh kumtsuno hipau phughi pesu musuinikeu lakhi shi-ghi peitha nanike.”

⁷ Achinemi ngo tungkupmi eno timi kumtsuno ino Achinekilo hipaqo tsa piakeu chilukhaveno

⁸ AMPEU no ivilo pilo pi ahza tsukeu kumtsu ino pitave kemtsa panonguno itsuquluveno ighamuku pi, “Noye hipau ghenguno pithive kepushivae!

⁹ Noye kushiye AMPEU jelono hipau chinekiye Shilo toive nani, hipau phughiye kutsave eno lakhimu hipaulo kughunamove nanipi pikya?” Tithiuye timiqono isuhupe kumqoluve.

¹⁰ Kughou Juda lo sakiphemino kiu shivekeno tipau chilukelo panonguno akukau ki lono Achinekilo posu ighi eno Akikha Akitheu lo wo ngolukhave.

¹¹ Tileno achinemi ngo tungkupumino sakiphemi ngo timiqo vilo ishi pi, “Timi hipauye pithive kepushi kugha xathavetsu kuzupu shiani, kughengu pano nophughi shou akumou piani. Nongu kini lono pa tsa chiluvae.”

¹² Tileno ino pike, “Ino Achineki hipau ngo aphughi hipau kuma shou pikeu nonguno chiluvekeu huye AMPEU no asheshu penike ipuwuke.

¹³ Nonguye nonguno xu chekeu laghi eno mla itha chekeqo kililuve masake eno AMPEU nongu Lhou ghokulu shimasake. Nonguno tishi aye pano nongu shou kutsale nikeu pipuakeu pa kukumsu kilive nani.

¹⁴ Ighenguye, niye nongu ulo auvae! Nonguno kiuno achipi kepi kumsu anikeno ishou tipau shilo.

¹⁵ Ikemu hipau mutsuqhei shilulo: Nonguno iheqhi pithive aye, nongu ghi eno aphughi hipaulo timiqo ghi pimi puamokemi heqhi pithivekeu kuyiqu shive nani, kughengu hipatsa pesu nongu kutughu peniye ipuwukeu huye AMPEU noke.”

¹⁶ Tileno sakiphemi ngo timiqono achinemi ngo tungkupmi vilo pike. “Timi hipauno niLhou AMPEU jelono niputsavae; pa heqhipithive kepu kumoe.”

¹⁷ Tipathiu, kichimi khamino puthughono timi kuhokumqo akeqo vilo pi,

¹⁸ “Hezekiya no Juda lo akukau shi ake ghulokilo Moreshet ghami tungkupu Mika no timi kumtsu vilo Aqokitikhi MPEU no ishi pikeu pesu pike, ‘Zion ye aluqa lakhi toi hokideve nani, Jerusalem ye ixalepinyiveno kiche kumqo pe puaketoive nani, Achineki toghiye aghasa lakhi shive nani!’ ”

¹⁹ Akukau Hezekiya ngo Juda lo akemiqoye Mika pithiveke kumoe. Tishinike zuqhulo, Hezekiya no AMPEU sumsave eno pa pulou shilu nike pukaputsake. AMPEU no panoqo shou kutsakungo keu sughi nikeu shi pipuakeu lono pa kukumsu kilive. Itehi ghi ninguno ni likhi nishou akumsapu kutsakungo keu sughiniye anie.

²⁰ (Itaghi kutami lakhi Kiriat-Jarim ghami Shemaiya nu Uriya no AMPEU jelono Jeremiya no pikeu toi hipau phughi eno hipa shiayeh shou pipukuke.

²¹ Akukau Jehoiakim ngo pawu ghushimi eno kijemi no Uriya no kiu pikeno tipau chilu keulo, akukauno pa heqhi pithive penikeu shike. Ikemu Uriya no tipau ghili chiluve; ike paye akumsa launo Ijip lo poveke.

²² Tishiepimu, Akukau Jehoiakim no Ijip lo Akbor nu Elnathan ngo timi khami puwu puzu Uriya saluve peniye shike.

²³ Panonguno akukau Jehoiakim lau pa sasu ideighikelo paye heqhi pithivepe eno pa phimpiye mishi kumo kuqhoalo vesuveke)

²⁴ Ikemu Safan nu Ahikam no isaphu akehu timiqo ulo heqhipithive penike ikhi phetsu move.