JEREMIYA 24 - BAIBEL (BSI)

Khughuthi Ashoghi Kini

¹ Achineki zulo khughuthi ashoghi kini qhi puakeu AMPEU no ipiyeke. (Hiye Babilon kukau Nebukadnezar no Jehoiakim nu Juda kukau Jehoiachin Jerusalem lono Babilon lo akughumi shi sawuve kethiuno ke. Jehoiachin gholono Juda lo sakiphemi atshamgha shikithimi eno shitsashi akumla shithikemi ghi sawuve.)

² Ashoghi atughiu loye itheno nivekeu khughuthi akiviqo ake; lakhiuloye alomovekeu, chusakeu khughuthi ake.

³ Tileno AMPEU no ivilo pi, “Jeremiya, noye kiu ithulu ani kya?” Ino ishi khochile, “Khughuthi ithulu anie. Akiviqoye ighono alo ani eno alomove keuye ighono alomoke, chunikeu ighono alomoe.”

⁴ Ike AMPEU no ivilo pi,

⁵ Ni, AMPEU, Israil Lhou no kihilu akeuye timi Babilon lo sawuve kemiye khughuthi kivi hipaqo toike, ino kimiyeqhiyi panoqo peitha nanike.

⁶ Ino panoqo jukutope khe anani eno hipau ghakhulo panoqo sachile saghi nani. Ino panoqo shiqhepuku nani eno panoqo suthapiniyivemo nani; ino panoqo shosu nani eno panoqoye nhuvemo nani.

⁷ Panoqo pelo niye AMPEU kepi ithipeni shikeu ape nani. Tileno panonguye iwu timi shive nani eno ino panoqo Lhou shive nani kughengu panonguno amlo kuchopu tsupuzu ilau ideighi nani.

⁸ “Ikemu Juda kukau Zedekiya ghengu eno pa gholo ayehpekichemi khunoqono Jerusalem lo kuami kutamiqo khunono ayeghi hipaulo ngoauve momu Ijip lo iqesuwuve keno, hi alomo keu khughuthi, chunike chusa kutukeqo toi ni AMPEU no panoqo peitha nani.

⁹ Ino kutsakungo keu lakhi pakutakeu panoqo shou sughikeulo ayeghiqhalo ashiayeh kutami kumtsuno thughuive nani. Timiqono panoqo thaigha nani eno panoqo pesu azukutunupu lakhi shinani, panoqo thakepu shi nani, eno ino panoqo halepuwu vekeqha kumtsulo panoqo je pesu musuinikeu lakhi shi peitha nani.

¹⁰ Ino aghukishi, puqumiyekeu eno kusukini panoqo shou sughi nani tiye ino panoqo ngo pano puasuqo tsukeu yeghilo panoqo milakhimu kuhavemoke kutolo tipau shi nani.”