JEREMIYA 23 - BAIBEL (BSI)

Ighinikeulo Lajupu

¹ Ayehkipemi khunoqono AMPEU wu timiqo kutsave eno haleve keno tipaqo shou AMPEU wu kughakuthapu kiutoi akumsapushi nani kela!

² Hiye AMPEU, Israil Lhou no pawu timiqo tuchomujo kepushi puachekemi ayehkipemi ghili pitsukeuke: “Nonguye iwu timiqo tuchomujo chemoe; nonguno panoqo haleve eno hapupoveke. Itehiye, nonguno alhoksa mlakeu ghenguno ino nongu ghimeqhi nani.

³ Ino khipaqo yeghilo iwu timi halepuwuve keno ghupe puaghikeqo tikudauno hekutsukumqo nani eno ino panoqo sasu pano kialu yeghilo saide ighi nani. Panonguno atianuli kutomo shi nani eno timi kutomo shive nani.

⁴ Panoqo tuchomujo penike ino ayehkipemi susupe qhi nani. Iwu timiqoye musa momu ighu kithepemo nani eno niye panoqo ghime kithemo nani. Ni, AMPEU no piqhiveake.”

⁵ AMPEU no pi, “Akukau shipe nike David tikughuko lomi amikuchomi lakhi ino kishelu nikeu ghuloki wocheni. Akukau tipauye alokutsushi eno kiuno achipiu akuzupu keno tipau aghakhu qhachho ayehpe nani.

⁶ Kughou pano akukau shini keno Juda lo akemiqoye sushokulushi anani eno Israil lo akemiqoye iqughai xulu nani. Pa pesu ‘AMPEU ye Ni Xakuluu ke’ ipi ku nani.”

⁷ AMPEU no piani, “Timiqoye hinguno hilauye ikugha pesu ashoqhi shikeulo ‘Xuakeu Lhou, Ijip yeghi lono Israil lo akemiqo saipeghi keuke’ ipi pimonikeu ghuloki cheni.

⁸ Tishinike zuqhulo panonguno ikugha pesu ashoqhi shikeulo ishi pinani, ‘Ahuu akeu yeghi eno ayeghi kutau khilehi ino panoqo halepuwuve keno tipaqo kudauno Israil lo akemi sasu ighikeuye xuakeu Lhou ke’ ipi nani. Tileno panoqoye pano yeghilo kughunalu nani.”

Tungkupmi ghengu Atsape

⁹ Tungkupmi ghenguno: Imloye ipopinyivae eno niye khokhoshi itha anike. Niye shokumzumi lakhi toi ani, timi lakhi ajino vekughuzuve keu toivae. Hiye AMPEU ghengunoke, tiye pa kimthe tsaqo ghengunoke.

¹⁰ Aghakhuye AMPEU lau amikuchoshi xuchemo kemino chhitoivae; Panonguno akuxu lhoksa shi xuacheni eno pano kuka pepusa acheni. AMPEU no musuinikeu ghenguno ayeghiye mloqa ani, eno asutsaniye ighuiveake.

¹¹ AMPEU no piani, “Tungkupmi ngo achinemiqoye Alhou kumthamike panonguno Achinekilo alhoksa shiaghi kelono ino tsuquluvae.

¹² Panonguno pulachekeu laghiye phepheyi eno zumoike; Ino panoqo shou kutsakungo keu sughini; panoqo ghime nikeu tsalaye wocheni.

¹³ Samaria lo tungkupmi xine ino ithuluvae: panonguno Baal jelono piacheni eno iwu timi sakughuzuveke.

¹⁴ Ikemu tinguno akusa akusau Jerusalem lo tungkupmino shikeu ino ithuluvae. Panonguno salha cheni eno miki cheni; Panonguno timiqo achipikumoulo shikuphu acheni, tighenguno milakhimu alhoksa shimokeu kuhae. Ighenguye, panongu kumtsu Sodom ngo Gomora lo akemi toi alomo keqoke.

¹⁵ ‘Ikehu, ni, Aqokitikhi MPEU no Jerusalem tungkupumi ghenguno hipau pitsu ani: Panoqo pelo chupenike ino khumtsayi keu tsuni tsu nani eno tughu yepe nanike, Kughengu panonguno ayeghiqhalo Alhou sumsamo keu pesu nhakha woke.’ ”

¹⁶ Aqokitikhi MPEU no Jerusalem lo akemiqo lau pike, “Tungkupmino kiu pikeno ini kevilo; panonguye kichileu lajupu pesu nongu lolo chhitoi sutsu anike. Panonguno kumsulukeu pesu nongu vilo piani kethono ino kiu pikeno tipau pesu piamoe.

¹⁷ Ino kiu pikeno tipau initsumo kemiqo vilo panonguno piachekeuno tipanoqoye kumtsulo akivi shi anani kepi cheni. Panonguno hebide kuthovi ache kemiqo vilo kutsakungo keuno khilemu panoqo shou ikughimo nani kepi piachenike.”

¹⁸ Ino pianike, “Tungkupmi hipaqo lakhimu AMPEU wu tuqhou kukumsu ithianike kumoe. Panoqo gholo lakhimu pa tsape chilu chemo momu vethalu chemoke, momu pano pikeulo initsu chemo momu amlo tsuqhiyikeu kuhae.

¹⁹ Pa loghuye pasapagha lakhike, amlhu kumgha lakhike, tipauno kixikilami kutsu shou pidepukhu nanike,

²⁰ pano kiu shiniye kutopesu ani keno shikhave moke kutolo tiye tavemo nani. Ighinikeu tsalalo pawu timiqono hipau thebei vethalu nani.”

²¹ AMPEU no pivae, “Niye tungkupmi hipaqo puwu moke ikeghi panonguno wuke. Niye kiu tsapemu panongu tsumoe, ikeghi panonguno ije lono picheni.

²² Panonguno iwu tuqhou kukumsu ithike aye panonguno iwu timiqo lau itsape pesu asheshuni cheke eno iwu timiqo pelo panonguno akuxu lhoksa shi xuachekeu eno kixikila ghili panonguno shichekeu qhiluvepeni cheke.

²³ “Niye aqha kumtsulo achekeu Lhou lakhike eno a-a lakhilo likhi achemoe.

²⁴ Timi lakhimu ino pa ithumlape nike itshukulupu shimlake. Niye kungugha ngo ayeghi shou aqha kumtsulo ani kepi nonguye mtha kesha?

²⁵ Tungkupmi hupaqono kiu pikeno, panonguno ije lono akimki tsa pikeu eno panoqo samouno ino itsape pesu panoqo tsuveakepi pichekeqo kumtsu ino ithianike.

²⁶ Tungkupmi hupaqoye pano likhi panono akimki iqiphekeu pesu ado khitohi iwu timiqo sapimi anani kya?

²⁷ Panonguno asamo pikeuno iwu timiqo pelo ije kumsumavelu nani kepi panonguno kumsuke, tiye panoqo puasuqono ikumsumaveno Baal lau wuveke toi.

²⁸ Tungkupmi khuno asamo pumoani keno tipauye asamo likhi kepi pive kepuke, ikemu tungkupmi khuno itsape chiluni keno tipau tsape amikuchoshi asheshutsu kepuke. Aghijini ye athicho sasu kiu kimghi kulupu ani kya?

²⁹ Itsapeye ami lakhi toike, eno atuqu hephopinyilu chekeu ayihesu lakhi toike.

³⁰ Tungkupmi hupaqo khunono lakhino lakhi tsa ikhilu puzu itsapeke pi asheshu cheni keno tipaqo shou ino moepi anike.

³¹ Noghi tungkupmi khunoqono pano likhi pano tsa picheni puzu atsa tiye ilauno ighikeuke pi picheni keno niye tipaqo shou ghi moepi anike.

³² Ni, AMPEU no kiu piani keno inilo! Niye tungkupmi khunoqono pano samo picheni eno tiye akimkino chhitoikeu pi acheni keno tipaqo shou ino moepi anike! Panonguno asamo tipaqo pipuzu panoqo kimki ngo panoqo qhekuza pesu iwu timiqo sakughuzuke. Niye panoqo puwumoke momu panoqo vilo wulo pimoke eno timiqo kiumu kuphulu anike kumoe. Ni, AMPEU no piqhivae.”

AMPEU Makho

³³ AMPEU no ivilo pi, “Jeremiya, kughono iwu timi lakhino momu tungkupmi lakhino momu achinemi lakhi no ovilo, ‘AMPEU tsape ye kiu kya?’ ipi inijuaye noye ishi pilo, ‘Noye AMPEU makhoke eno pano noikhipe peve nanike!’

³⁴ Iwu timi na tungkupmi momu achinemi namu, ‘AMPEU makho’ ipikeu tsalothi peitha aye, ino pa eno pa kibo ghimeqhi nanike.

³⁵ Tishinike zuqhulo, milakhikhino pa kusami eno pano sholokumi vilo ishi iniju kepu, ‘AMPEU no kiu khokichile tsu nani kya? AMPEU ye kiu pikya?’

³⁶ Tishiaye panonguye khilemu ‘AMPEU makho,’ ipikeu tsalothi peitha kepu kumoe, kughengu milakhi nomu tipau peitha aye, ino itsape pesu pa shou amakho kuchou lakhi shipe nanike. Timiqono xuakeu Lhou, Aqokitikhi MPEU, panoqo lhou tsalothi suchighive anike.

³⁷ Jeremiya, nono tungkupmiqo vilo ishi inijulo, ‘AMPEU no khokichile kiu otsu kya? AMPEU ye kiu pikya?’

³⁸ Panonguye ino ahza tsukeu hebide puzu ‘AMPEU makho’ tsalothi peitha aye tileno panoqo vilo,

³⁹ ino panoqo sunheqhe puzu ilauno putosuu vepuwuve nani, panoqo ghi ino panoqo ngo pano puasuqo tsupuakeu phughi kinikujo kutholeve nani.

⁴⁰ Ino panoqo shou alhokupujulo kujochekepu eno kuthakughapu khilemu kumsumave mlakepu sughi nanike.”