JEREMIYA 20 - BAIBEL (BSI)

Pashur sasu Kutsala

¹ Kughono Imer nu Pashur achineu Achinekilo kijemi atouno ino hipaqo pesu asheshu keu chilu keno,

² pano iheqhipe nike eno Achinekilo Benjamin Khagho lashouto phivilo ayikichheno phepe qhipe nike pano ahza tsuke.

³ Thanau, Pashur no ayikichhe lono ikuqhopheve kethiu ino pa vilo ishipi, “AMPEU ye oje Pashur ku-tsumoe. Pano oje otsukeuye ‘Aqha kumtsulo shikumsakeu.’

⁴ AMPEU ampino piveake, ‘Ino okughapesu olikhi oshikumsa eno oshompami shikumsa kepu shitsu nani, panoqo kumtsu aghumi zutano ghiqhivekeu nono ithulu nani. Ino Juda lo akemiqo kumtsu Babilon kukau kuka qholo qhi nani; khamiye pano akughumi shipe nike sawuve nani eno kutami qoye pithive nani.

⁵ Ino pano ghumiqo pelo aphughi hipau lo kinikulu akeu kumtsu xulepuwuvepe nani eno tipaulo tinhemgha eno amheghi kumtsu sunhe kicheluvepe, Juda lo kukami qono kinikulu pekutsupua keu ghi eno tiye Babilon lo thwokha xapuwuve pe nani.

⁶ Pashur, no eno nokibolomiqo ghi kughaluveno Babilon lo sawuve nani. Noye tilano thive nani, tiye okusami nono khunoqo vilo akimiki kumzapu pichekeno tipaqo kumtsu gholo qhove nani!’ ”

Jeremiya no Muchho

⁷ AMPEU, nono ipishiqhike, eno ipishiqhi putsake. Noye inguno akuka kumtouke, eno nono itheqhivae. Kumtsuno ithaigha ani, atsala kupujulo niye panoqo zukutunupubo shiauvae.

⁸ Kugho kughomu niye ighamuku asheshu puzu, “Ghiqhi heqhikeu!Kutsapiniyikeu!” ipi ino piacheni. O AMPEU, otsape shikeu ghenguno atsala kupuju icheqhi, ithaghaqhi anike.

⁹ Ikemu kughono ino, “Niye AMPEU kumsumaveni eno paje lono khilemu pimoake,” ipini keno, otsa huno ami toi ilolo pitiqhi auve cheni. Ino pukaputsa otsa tipau tsuqupe auveniye shicheni, ikemu tipau suchilepe auvemlake.

¹⁰ Timi kumtsu ghano, “Aqha kumtsulo Akuighupu shivae! Ayehkipemi vilo pano ishi anikepi piveni nolo!” ipi chhu chhushi pikeu ino chilue. Ikusami kuchou ghi ino ikiqivekeu kheauvae. Panonguno pike, “Ishiake pa muquqhive luvike, tishianguno ninguno pa kughalu puzu amukhu lunike.”

¹¹ Ikemu AMPEU nono ikudau ani, akumto eno akughushu shi anike, eno ishikighime akeqoye tomove nanike. Panonguye alhokupujulo kujomza kepu shive nani kughengu panonguye tokulupu tsa kuhae. Panoqono kujo mzanikeuye khilemu kumsumamlake.

¹² Ikemu Aqokitikhi MPEU, noye kuchoushi timi ijoju cheni; panoqo mlolo ngo akukumsulo kiu ani keno nono ithi ani. Tighenguno ighumi shou nono amukhu lukeu ipelo ithulu pelo, kughengu ino kiu ghenguno xua cheni keno oulo qhivetsuake.

¹³ AMPEU lau alephelo! AMPEU sheqhelo! Pano alhoksami kuka lono qodape akeqo sunhephelu cheni.

¹⁴ Ipunukeu tsala musuinive tsulo! Izano ipunukeu tsalani mughamove pelo!

¹⁵ Timi khuuno ipuh lopivi tsu ghi, “Noye anu kiptimi ithuluvae!” ipi keu sutsa pa lau sughi keno timi tipau musuinive pelo.

¹⁶ Timi tipauye, aphughi khipaqo AMPEU no kimiyemono kutsaleve keno tipaqo toive pelo. Pa pelo inaqheno sukeu ghugha chilupe eno puchouno aghukishi kutughukeu sutsa chilu pelo;

¹⁷ Kughengu ipunu mphi lono pano iheqhi pithivemoke. Tishi aye iza poye ikumo kuqho-a shiveni cheke.

¹⁸ Kushiye ipunuqhi apekela? Shiluksa eno amlo ghime likhi shiapeniye kesha? eno kujomzakeu lono ikuxu shekha shipeniye kesha?