JEREMIYA 18 - BAIBEL (BSI)

Jeremiya no Alikishiu lau wu

¹ AMPEU no ivilo pi,

² “Alikishiu kilo iqilo, tilano ino itsa pe otsunike.”

³ Ikehu ino tilau wukelo alikishiuno pa ligha pesu ayeghili mla aghikeu ithulu.

⁴ Kughou pano aghani pesu mla akeu yeghili shipusave nikeno pano aghani tipau pesu pagho pulou shighi ayeghili kutau kughulhoveke.

⁵ Tileno AMPEU no ivilo pi,

⁶ “Alikishiuno aghani pesu kiu shive keno niye nongu Israil lo akemiqo pesu kiu kiumu shive nikeu ichipiuke kumo kesha? Alikishiu ulo aghani akeu toi nonguye iulo anike.

⁷ Kughokughomu ashiayeh momu akukaqha lakhi ino nhuveni keushi, kuboleve nikeu shi momu kutsave nikeu shi ino piakelo,

⁸ ashiayeh tipauno alhoksa kudauno tsughusu wuve aye ino kiu shini pipuakeno niye shimove nani.

⁹ Ashiayeh lakhi momu akukaqha lakhi ino shosu momu xaqheniye ani,

¹⁰ ikemu ashiayeh tipauno ihebide alhoksa shiwuve aye, niye ino shiniepi pivekeu shimove nani.

¹¹ Tishiaye, itehiye Juda lo ngo Jerusalem lo akemiqo vilo niye panoqo shou akumou shinikeu pughupe ani eno panoqo ghimeqhi nikeu kutope anike pilo. Panoqo vilo axine shikeu kuxu qhivelo pilo eno panongu laghi kililuve eno panoqono shichekeu kililuvelo pilo.

¹² Panonguye ishi khochile nani, ‘Ninguye kilini chemoe, kushiye kili ani kya? Ninguye nino shinike thaqhu kuthovi eno alhoksa shi ache nanike! ’ ”

Timiqono AMPEU Milive

¹³ AMPEU no piani, “Thime tikithipu puzuu shipepuani kemo keno ashiayeh kumtsu vilo inijulo. Israil lo akemiqono akumou kuchou lakhi shiveake!

¹⁴ Libanon tuxu qhemghaikeulo murasu kuhaveju akesha? Tipau naghuto lono ighikeu ghoki qhayivejua kesha?

¹⁵ Ikeghi iwu timiqoye ikumsumave ani; panonguno asu atu julho lau tsungqui keu pitikumna cheni. Panonguye wukepushi akeu lalo kupuxalu ani, panonguye puzuu laghilo che chemovae. Panonguye alaghila lo kumono lavelalo wuveake,

¹⁶ Panonguno hipau yeghi pesu jukichi kepu eno pulhapujulo jukimthipu shive tsuake. Tipau veche wuchekemi kumtsuno jukichipe kutuxoxoke. Panonguno akumzaqhiyi kelauno akutsu kunguke.

¹⁷ Ino iwu timiqo pesu panoqo ghumi zulono hapiye pighi nani; kipela mulhuno ayeghi mukhu fupewukeu toi nani. Ino panoqo lau izupo kugho puwovetsu nani; kughono kutsakungokeu ighini keno niye pano kuphumo nanike.”

Jeremiya Pithivenike Kuchughu

¹⁸ Tileno timiqono pi, “Jeremiya shou kiuala shiveni nolo! Achinemino pulhapuju ayezah nikutsu nani, alokutsumino kumsukulu nitsu nani eno tungkupmino Alhou tsape pesu asheshu nanike. Ningu pa ghekucho keu tsa pi pukuni nolo eno pano kiu pinikeno lakhimu initsumoni nolo.”

¹⁹ Ikehu ino ishi inikhuke, “O AMPEU, ino kiu piani keno inilo eno ighumiqono ighili kiu piani keno inilo.

²⁰ Akivi ghenguno alhoksa lochileni kesha? Ikeghi panonguye ipelo veqhi ilo penike aqoh lakhi chhupuanike. Ino panoqo ghengu kishi olau ighino ovilo pikeno kumsululo, tishianguno opelo aloghu kighide shi panoqo peitha pemoniyeke.

²¹ Ikemu itehiye O AMPEU, panoqo tianuli pelo akhuava shi thive pelo; panonguye aghukishi lono pithive pelo. Totimiqo pelo panoqo kimi ngo atianuli puhave pelo; kiptimiqo pelo kusukini lono thive pelo eno lhothemiqoye aghukishi lono pithive pelo.

²² Zuleno heqhi buqhi kemi loji panoqo kilo puwulo eno panoqo pelo musa ighu kelauno igha penike. Panonguno ipelo veqhi ilopenike aqoh lakhi chhu puani eno imeluniye alichhe shipuanike.

²³ Ikemu AMPEU, panonguno iheqhi pithiveniye kumqukeu kumtsu nono ithi ani. Panoqo lhoksa kipimi qhitsu kevilo momu panoqo xine akipimi ikhivetsukeu shi kevilo. Panoqoye ozulo halepinyi tomove pelo eno ologhu kighidelo panoqo kutotsulo.”