JEREMIYA 17 - BAIBEL (BSI)

Juda Xine eno Aghimepu

¹ AMPEU no pi, “Juda lo akemiqo, nongu xine ye ayino shikeu pesu yepe qhipuani; tiye hira kumtssu pesu nongu mlolo eno nowu akumlla khache chekulo kihepuku puani.

^2-3 Nowu timiqoye asubo phivilo ngo atoghi kutsuqalo eno aluzalo naghuto kutsuqalo Ashera lholiu ghenguno akumlla kiptia ngo jumichi shipuakeulo mlla cheni. Nonguno noyeghiqhalo axine shivekeqo kumtsu ghenguno ino noghumi pelo nowu kinikulu ngo pekutsukishe puakeu jeli ikhi suwuve pe nani.

⁴ Nonguye ino ayeghi nongu tsu keu qhivetsu kepu shi nani eno ino nongu pelo nonguno kiumu mthano akeu yeghilo noghumiqo qepe nani, kughengu iloghuye ami toike eno tiye alhokupuju iqu ananike.”

Piqhikeu Jeli

⁵ AMPEU no piani, “Khuuno ilauno tsughusu wuveni keno ino tipau kileve nani. khuuno timi shou pukhuveni, thiveni kuau timi kumto pukhuni keno ino tipau kileve nani.

⁶ Timi tipauye asayeqhalo asuminipho toike, qhaikeu alo thu ipeghi akeshi, kiumu ipeghi chemokeu amiti yeghilo akeshike. Pa lauye kiumu akivi ipeghilu chemoe.

⁷ “Ikemu khuuno ipukhuni keno ino timi tipau kumghatsu nani.

⁸ Paye asubo lakhi aghokiti phivilo thuwu ake toi eno azulo akuhu qupuwu akeu toike. Shukuthuikeu tsala ighi pinamu musaighu chemoe, kughengu tipau nipaye akuxu shi acheni; Kughono tsughu moveni keno tiye amloksa shichemo, tiye axathi pithi achenike.

⁹ ‘Khuuno timi mlo ithikuthu luni kya? Tiye kutau kumtsu nguno pishikiqhiu ke; tiye vimo kutuke.

¹⁰ Ni, AMPEU no timi kukumsu lheju eno timi mulo ijoju cheni. Pututano mlachekeu kiqi lono ino milakhikhi peithaju cheni.’

¹¹ Timi khuno amikuchokumo pisa lucheni keno paye aghau lakhino pano yikhuqhimo keu yikhu khophe akeu toike. Pa kuxu ahelo aphi lono pawu kinikulu puhave nani, eno ashekhalo paye kiumu kumoveno kughuzumi lakhi toive nani.

¹² Nichinekiye ajekipi kuka lakhu lakhi, abothu lono naghuto kuchuqulo ghopesu akeu toike.

¹³ AMPEU, noye Israil wu lajupuke; Oqhivekemi kumtsu kujo mzavepe nani. Ayeghi mukhulo aje yepuku puakeu toi panonguye hauve nani, kughengu panonguno no, AMPEU, akuxu zupuki qhiveke.”

AMPEU Kukuphu Khu

¹⁴ AMPEU, ishipivilo eno niye atho putholughi viluve nani; ihakholuvelo eno niye xaluve nani. Noye ino sheqhe chekeuke!

¹⁵ Timiqono ivilo pike, “AMPEU no nilau shikichi chekeqo huye khile ani kya? Pa pelo itehino tipau xapughi julo pilo!”

¹⁶ Ikemu AMPEU, niye khilemu ovilo panoqo shou kutsakungokeu puku tsulepi tsuyikhomo pimoke; niye panoqo shou shiluksa tsala ighipenishi puamoe. AMPEU, nono hipau ithi anike; imutsu lono pikeuye kiu keno nono ithi anike.

¹⁷ Ilau akuighupu shikevilo; kughou akupuna ighini keno nono ixakulupu-a ke.

¹⁸ Ishikighime chekemiqo shou kujomzave kepu pukutsulo, ikemu ipelo kujomzavepe kevilo, AMPEU. Panoqoye akuighupuno chhivepelo ikemu ishikumsa kevilo. Panoqo shou kutsakungokeu sughilo eno panoqo kutsa piniyivetsulo.

Sabat Ikhikulu

¹⁹ AMPEU no ivilo pi, “Jeremiya, wuno Timiqo Khagholo itsa pesu asheshulo, tiye Juda lo kukamino aphughi vechesu ipe ilochekeu ake; tipa thiuno Jerusalem lo akikha kutau kumtsulo wulo.

²⁰ Juda lo kukami ngo Jerusalem lo kughuna akemi eno akikha hipaqolo ilokemiqo vilo ino kiu pini keno inilo pilo.

²¹ Panoqo vilo pilo, ike pano likhi pano kuxu kimiye cheni napiaye panonguye Sabat pinyenilo akho pukepu kumoe,

²² momu Sabat pinyeniye panoqo kilono kiumu xapusu ipe kepu kumoe. Ino panoqo puasu vilo ahza tsukeu toi panonguye Sabat loye mla kepu kumoe; tipa tsala akimthe shi ikhilu masake.

²³ Panoqo puasuno itsa initsumo momu amlo tsuqhiyikeu shimoe. Tishinike zuqhu panonguno kuthovilo auve; igholumove eno ilauno shikalu keu kuhae.

²⁴ “Timi hipaqo vilo pilo, panonguye izah kutsu kumtsu papelu masake. Panonguye Sabat lo aphughi hipau kikhaqo vechesu kiu khomu xapu ilo kepu kumoke. Sabat ye akimthe tsala lakhi shi ikhilu masa eno akumla kiumu shikepu kumoe.

²⁵ Tishianguno panoqo kukami ngo sakiphemiye Jerusalem kikhaqolo ilolu nani eno David no ayehkipe kuka akeu qhemi alunanike. Juda lo akemi ngo Jerusalem lo akemiqo kumtsa puzu panonguno khurkulu ngo khurshi shou ikulu nani eno Jerusalem phughi pulhapuju timino chhitoi alunani.

²⁶ Juda lo taun akeqo lono eno Jerusalem sukumxalo akemi timiqono ighi nani; Benjamin lughi bocho kudauno, naghuto sumxape akeu kudauno, naghuto qo kudauno eno Juda apeu kudauno timiqono ighi nani. Panonguno iAchine kilo akuchopu pitimllakeu kumllaghoqo pesu ighi nani.

²⁷ Ikemu panonguye ighokulu shi masake eno Sabat ye akimthe tsala lakhi shi ikhilu masake. Tipa tsalaniye panonguye kiu khomu xapusu Jerusalem kikhaqo vechesu wumoni, kughengu panonguno tishiaye, ino Jerusalem kikhaqolo ami suvetsu nani. Amino Jerusalem lo akighikiqo pitileqhive nani eno khunomu tipau ghapinhemla nanike.”