JEREMIYA 13 - BAIBEL (BSI)

Phepheyikeu Chhekha phi

¹ AMPEU no ivilo wuno chhekhaphi hami isala qhulopi pike eno tipaqo pepu lopike; ikemu pano ivilo azu loye tipaqo pepu kevilo pike.

² Ike ino tipaqo qhupuzu pepuke.

³ Tileno AMPEU tsa akiniu ghi ilau ighi eno pi,

⁴ “Eufrati ghokilo wulo eno atuqu gholo akighipe lakhilo chhekhaphiqo kusupe qhivelo.”

⁵ Ikehu ino wupuzu Eufrati phivilo tipaqo kusupe qhive.

⁶ Ado hami thiuno AMPEU no ivilo Eufrati lo ide chile wupuzu chhekhaphiqo luwulo pike.

⁷ Ike ino ide chile wu eno khipa-alo kusupe qhikeno tipa-a phulu keulo ino tipaqo jukelo tipaqoye shipsa khave aghi eno kitilamu alokeu kuhave aghike.

⁸ Tileno AMPEU no itaghi iputsa. Pano ishi pi,

⁹ “Ino hikithipu shi Juda qhekuza ngo Jerusalem qhekuza kuloghi kutsalevetsu nanike.

¹⁰ Timi lhoksa hipaqoye igho lumo kepi miliveke. Panonguye pulhapujulo kuthovilo eno kusakughashi achenike eno kutau lhouqo mlla eno qe achenike. Tishi kehu chhekhaphi hipaqo kitilamu alomovekeu toi panonguye tipaphi shive nani.

¹¹ Chhekhaphino achita lo tsu-tsu khapulu keshi Israil ngo Juda lo akemi pelo ilau tsuqukhoilu peni shikeu kumsupu ake. Ino hipau shikeuye panonguye iwu timi shiche peni eno akishe agigihu ilau sughi peniyeke, ikemu panonguno igholumoke.”

Atsayiji Tughuko

¹² AMPEU Alhou no ivilo pi, “Jeremiya, Israil lo akemi vilo atsayiji tughuko kumtsulo atsayiji chhitoi sulo pilo. Panonguno, atsayiji tughuko kumtsu atsayiji chhitoi sumasakeu panonguno ithi ani kepi khochile nani ke.

¹³ Tileno noye panoqo vilo ishi pilo, ‘AMPEU no ishi pike, julo, ino ayeghi hipaulo kughunakuami kumtsu kukami David laghami, achinemi, tungkupmi eno Jerusalem lo kuami kumtsu atsayiji shokumzuno chhitoitsu nani.

¹⁴ Tileno muchomi na lhothemi pinamu ayeghi tughuko toi lakhino lakhi shou ino panoqo vedaqhi nani. Niye amlo ighiqhiyi keu momu amloksa kiunomu ilakhamlano ino panoqo kutsaqhi nanike.’ ”

Aqhekuza shou Kichikeu

¹⁵ Israil lo akemiqo, AMPEU no piveake! Aqhokighe shilo eno pa tsa inilo.

¹⁶ Pano akuzu sughi miphi lono eno nonguno naghutolo kupuxa pukulu miphi lono; Nonguno akuvu laju akeu pano pesu akuzu kutho shivetsu miphi lono nongu Lhou AMPEU gihulo.

¹⁷ Ikemu nonguno initsumo aye, Nongu qhekuza ghenguno ino kusuuno qa nani; Ino kukhu kimjishi qa nani eno inhezuno qoipeghi nani kughengu Alhou wu timiqoye akughumi shi sawuveni ake.

¹⁸ AMPEU no ivilo pi, “Akukau nga paza pama vilo akuka lakhu lono iqighilo pilo kughengu pama wu jukivipu kutsuqhoye pama kutsu lono ikiqivae.

¹⁹ Juda lo apeu akeqo taunye aghumino bothape le ani; timi khumu tipau vechesu panoqo lau wulu amoe. Juda lo akemi kumtsu halepuwuve keulo sawuvae.”

²⁰ O Jerusalem, julo! Oghumiqoye ahuu kudauno iqi cheni! Nongu pelo jukuto peniaye pichetsu cheni, nowu timi nonguno jupesu qheza chekeqoye khile ani kya?

²¹ Kughono nongu shompami kepi nonguno kumsu chekeqono nongu leluve eno nongu shou ayehpe aye nonguye kiu pinani kya? Nonguye totimino punua kelo toi aghime kusu shi nanike.

²² Kushiye hikithipu kumtsu nongu lau shi ani - kushiye nophimini suxuvetsu eno nongu sazuvetsu kelapi nonguno iniju aye tiye nongu xineye shishe kije kushuwa ghenguno ke.

²³ Ethiopiamiye pa yiko tsubuikeu kililuve nani kesha, momu angushuno pa yikolo aye yetamghuyi keu shipuhalu nani kesha? Tishilu kepushiaye, nongu alhoksa likhi shichekemi ghi achipiu kiu keno shinikeu shikalu nanike.

²⁴ Asayeqha mulhuno aghijini fupewuve keu toi AMPEU no nongu haleve nani.

²⁵ Hipauno nongu saje shinikeu pano pike. Pano nongu pesu hi kithipu shinikeushi kughathavae kughengu nonguno pa kumsumove eno kichileu lhouqo shou pulubeke.

²⁶ AMPEU ampino nongu phimini xalevetsu nani eno nongu pesu akukujopu shipe qhinani.

²⁷ Nonguye pano jumithiche keu thime shi aghikeu pano ithuluvae. Nonguno timi lakhino pa kusami nipu juminekeu momu khurshitsuno aqu pape keshi naghutoqolo inapughami lhouqo lau wukeu eno aluzalo wukeu pano nongu ithuluvae. Jerusalem lo akemiqo, nongu hakusapu shivae! Nonguye kughono muqhamiqhiyi nani kya?