JEREMIYA 12 - BAIBEL (BSI)

Jeremiya no Kighinikile

¹ AMPEU, ino osasu itsa kugha- kepu pesu kutsala aye, Noye achipiu shiaghive nani putsake. Ikeghi niye osasu kuchou xakutha vehu kigheve masavae. Kushiye kusakughamiye shishe kinikulu shipe kya? Kushiye amikucho kumomino ikukithelupe kya?

² Nono Pano shosuke eno pano- nguno akuhu qusu; thu ipeghi eno axathi pithi cheni. Panonguye pulhapuju opi pivi acheni Ikemu panongu muloye olauno putou acheni.

³ Ikemu AMPEU, nono ni ithi ani; ino kiu shikeno nono ithulu acheni, eno niye kishi okimiye cheni keno nono ithi ani. Bheri ghiqhiveniye akeshi timi lhoksami hipaqo sunhekiti sawu- velo panoqo ghiqhive kepu ghuloki tomoke kutolo panoqo ghukhe shialo.

⁴ Niyeghiye ado khitotohi qhai anani kya? eno aluza kumtsulo khitotohi thizummuyi anani kya? Lhoxu ngo aghauqoye thi ayeake, tiye ni-timiqono kixikila ke ghenguno, “Ninguno kiu shiani keno Alhou ye ithulu achemoe,” ipi pichekemi timiqoke.

⁵ AMPEU no pi, “Jeremiya nono timi sasu pokuxu kelo lhove aye, noye kishi puzu khurshiqo sasu pokuxuluni kya? Nono aqalo thotsu puthughomla aye, Jordan phivilo aghasalo noye kishiveni kya?

⁶ Othikuzumi, nobolomi kuchou thotsu ojechuveke ohakuqo qhikeulo panongu ghi chhosuke. Panonguno ashou toi oputsa pinamu noye panoqo pukhu kevilo.”

Timiqo Jupe AMPEU Mlokusa

⁷ AMPEU no pi, “Niye Israil phevae; Niye ino kishelukeu shiayeh qhivae. Ino kimiye chekemi timiqo pesu pano ghumi ulo phesuve tsuake.

⁸ Ino kishelu kemiqono aghasulo abongushu toi ihebideke, panonguno ijupesu ighake, ikehu ino panoqo jumithike.

⁹ Ino kishelu kemiqoye aghau lakhi toike aluquno aqha kumtsu lono vehake. Tughashiqo kulo eno aghulhulo supe nike ighilo pilo!

¹⁰ Inaghami ayehkipemi kutomono itsayilu kutsavetsuke; panonguno ilu neda qodavetsuke; panonguno iyeghi jukivi pesu asayeqha kughulhove tsuke.

¹¹ Panonguno tipau pesu asa itsumo- keu-a kughulhove tsuke; tiye igizulo kughukughalei ani, eno khunomu jukutoju tsumoe.

¹² Asayeqha qhemghaike toghi kathasu leluniaye kutsakungoni kemi ighi ani. Ayeghi kumtsu kutsape nike ino aghukishi puwu ani; timi khumu iqunei xumla nani.

¹³ Iwu timiqono athi xusu ikemu alupi pekutsuluke; panonguno akaghashi mlake ikemu kiumu ithumlae. Iloghu kighide ghenguno pano tuxatini ghi pithimoveke.”

Israil Cheaxumi Kumghanikeu

¹⁴ AMPEU no pi, “Niye Israil cheaxumi khunoqono ino iwu timi Israilmi tsukeu yeghi shipusave keno tipaqo shou kiuala pikepu ani. Timi lhoksa kughami hupaqoye ino pano ghakhu lono ikhisawuve nani asubo akuhu lono nhuve keshi nani, panoqo launo ino Juda hakholuve nani.

¹⁵ Ikemu panoqo ikhisawuve kethiu ino panoqo shou kimiye qhiyikeu anani. Ino ashiayehqo lakhikhi pututa yeghi eno pututa ghakhulo saideghi nani.

¹⁶ Tipathiu panonguno amlo kuchopu pesu iwu timiqo chineyeh ikhilu eno panoqono, ‘AMPEU no xuanike’ ipi tushoqhi aye, puzuu panonguno Baal jeku ghi tushoqhi keu iwu timi shika che kemu tithiuno panongu ghi iwu timi muqo shilu anguno kinikulu shi nanike.

¹⁷ Ikemu ashiayeh khunono agho lumoni keno tileno ino tipau shiayeh qhoi nhuve nani eno tipau kutsave nani. Ni AMPEU no piqhiveake.”