JEREMIYA 11 - BAIBEL (BSI)

Jeremiya eno Puloshoqhi

¹ AMPEU no ivilo pike,

² “Puloshoqhi akeu tsa inijulo eno Juda ngo Jerusalem lo akemi qo vilo pilo.

³ Ike ni AMPEU, Israil Lhou no hipau puloshoqhi lo akeu tsa papemokemi shou musuinikeu lakhi betsu ani.

⁴ Tiye ino panoqo puasu sasu puloshoqhi shi keu tsake; panoqo puasu ghenguno amiphokilo ami iqu akeu toikeu yeghi Ijip lono ino panoqo sasu ipeghi kelono puloshoqhi shipuakeu huke. Ino panoqo vilo igholu eno ino ahza tsukeu kumtsu shilo pike. Ino pikeuno panonguno aghokulu shiaye iwu timi shi nani eno ino panoqo Lhou shinikeu pike.

⁵ Tishianguno ino pano puasu lau ashoqhi shipuakeu penikeu shike, tipau shoqhi ye - ino kinikulu eno aghuma kua yeghi panoqo tsunikeu shike, tipau yeghilo panonguno ngo anike.” Ino pi,”Iye, AMPEU.”

⁶ Tileno AMPEU no ivilo pi, “Juda lo aphughiqolo eno Jerusalem laghilalo wulo. Itsape pesu tilau asheshulo eno timiqo vilo puloshoqhilo akeu tsa inilo pilo eno tipaqo papelo pilo.

⁷ Kughou ino pano puasu Ijip lono saipe ghikeno igholupe nike ino tsaquino panoqo piputo puanike eno ishi tsala kutolo ino timiqo kutughu achenike.

⁸ Ikemu panonguye initsumoe momu agholumoe. Tishinike zuqhulo, kumtsu pututa shelo kuthovi ghi eno pulhapuju alhoksa shi achenike. Puloshoqhi pape penike ino ahza tsuvae ikemu panonguno miliveke. Tighenguno tipaulo aghimepu pipuakeuqo kumtsu ino panoqo shou ikughipeke.”

⁹ Tileno AMPEU no ivilo pi, “Juda ngo Jerusalem lo akemiqono ishou hebide ithughi anike.

¹⁰ Panonguye pano puasu xinelo idewove ani, tipaqoye ino pikeu shini ke miliveke; panonguye kutau lhouqo mllauveke. Israil ngo Juda kuma kinikujo ino pano puasu sasu puloshoqhi shikeu kubovae.

¹¹ Tighenguno itehiye, ni AMPEU no panoqo kutughu ani niye panoqo shou kutsakungo keu sughini cheni eno panonguye povemla nanike. Kughou panonguno kuphupe nike ilau ighamukuni keno niye panoqo ghugha initsumo nani.

¹² Tithiu Juda ngo Jerusalem lo kuamiqoye panoqono akumllagho heqhipe mllache keu lhouqo lau wu nani eno tipaqo vilo kuphulepi ighamuku pi nani. Ikemu kughou kutsakungo keu hipau ighini keno alhou tipaqoye panoqo xamla nani.

¹³ Juda lo akemiqoye pano phughi khije akeno tijejehi alhou kutomo ache eno Jerusalem lo akemi ghi pano phughilo alaghila khije akeno tijejehi aphikumqhupu Baal lhou lau heqhi mllakepu akipti-a kutomo ake.

¹⁴ Jeremiya, noye timi hipaqo ghenguno ilau khuini momu qhuiniju kevilo. Kughou panonguno shiluksa sholu puzu kuphupe nike ivilo pini keno niye panoqo sutsa chilutsumo nani.”

¹⁵ AMPEU no pi, “Ino kimiye chekemiqoye alhoksa kumla shi ani. Panonguye kishi puzu ichinekilo akepushi ani kya? Panonguno ashoqhi shikeu eno aghashi keu lono kutsakungo keu lakha kulupu shinani kepi kumsu ani kesha? Tipauno panoqo lopivilu nani kesha?

¹⁶ Ghuthu lakhi loye ino panoqo pesu oliv suminipho, axathi jukivino chhitoi akeu pi picheke; ikemu itehiye tsutsu kusu ghugha toi shipuzu ino tipau nipaqolo ami suni cheni eno tipau loka hechheni cheni.”

¹⁷ “Ni, Aqokitikhi MPEU no Israil ngo Juda shosu ke ikemu itehiye kutsakungo keu pesu ino panoqo shikichike. Panonguno hipau pano likhi pano shou sughi ani kughengu panonguno alhoksa shiveke; panonguno Baal lau akumllagho heqhi tsupuzu ipelo aloghu idevepeke.”

Jeremiya Pithivenike Phu

¹⁸ Ighumiqono ipithive nike kuchughu akeu AMPEU no ipithivae.

¹⁹ Niye bheriti lakhi ghiqhiveniye akeu mtha puzu pulube akeu toike, panonguye ishou alhoksa jeli kughupe akeu niye muthano ake. Panonguye ishi piacheke, “Asubo akivishi aphi lono ninguno yeqhiveni nolo; ningu pa ghiqhiveni nolo tishianguno khunomu pa kumsuchile mlave penike.”

²⁰ Tileno ino inikhu, “Aqokitikhi MPEU, noye achipishi xathachekeu lakhie; nono timi kukumsu ngo alou ithikeu jeli kumtsu peju cheni. Ino o-ulo ivehu kulhuqhivetsu ani, ike nono timi hipaqo shou amukhulu keu ipelo jukuto khe pelo.”

²¹ Anathot lo akemiqono ipithive penishi acheni, eno panonguno ivilo pikeuno ino AMPEU tsape pesu asheshu aye panonguno ipithiveni pike.

²² Ikehu Aqokitikhi MPEU no pike, “Ino panoqo ghimeqhini! Pano wu lhothemiqo ye aghushi lono thi nani; pano tianuliqo ye akhuava lono thi nani.

²³ Anathot lo akemiqo shou kutsakungo keu sughi nike ghenguno ino ado lakhi kutope puani, eno kughou tipa ghuloki ighini keno panoqo milakhimu puxumo nani.”