JEREMIYA 1 - BAIBEL (BSI)

¹ Hipauye Hilkiya nu Jeremiya no pikeu tsa kishekulushi yekutsukeu kakuke. Paye Benjamin ghakhulo Anathot taun lo achinemi lakhike.

² Amun nu Josiya no Juda lo akukau shikeu ampe chighi akuthuu shiake lono AMPEU no Jeremiya putsake.

³ Josiya nu Jehoiakim no akukau shiake lono AMPEU no pa putsa eno Josiya nu Zedekiya no kakeu mpe chighi aqhaqhiu kutolo AMPEU no ghuthu kutomo pa putsa cheke. Tipa mpe aqhi apunguu lono Jerusalem lo akemiqoye kugha sawuve ke.

Jeremiya Kukulu

⁴ AMPEU no ivilo pi,

⁵ “Apolo azu ghomphi lono ino noithi ake, opunu mphi lono opelo ashiayehqo lau tungkupu shipe nike ino okutashi kisheluke.”

⁶ Ino ishi khochile, “Akughushu MPEU, niye atsa kishi pikepu keno mthae; niye lhothemi lakhi shiaphike.”

⁷ Ikemu AMPEU no ishi pike, “Noye lhothemi kepi pikevilo ikemu ino opuwu kemiqo lau wulo eno ino ovilo pilopi ahza tsukeu kumtsu pesu panoqo vilo pilo.

⁸ Noye panoqo jupe msa kevilo kughengu ino ogholo anani eno osusho nanike. Ni, AMPEU no pianike!”

⁹ Tishieno AMPEU no pau chhopuwo puzu imtsu ditsuno ivilo ishi pi, “Julo, nono pimayesakeu tsa pesu ino otsu anike.

¹⁰ Ishi tsala lono ashiayehqo ngo akukaqhaqo nhuvepe eno tulevepe nikeu, kutsave eno halevepe nikeu, shipuku eno shosupenikeu kuka ino otsu ani.”

Kungunhetsu Kini

¹¹ AMPEU no ivilo ishi iniju, “Jeremiya, noye kiu ithulu ani kya?” Ino ishi khochile, “Almon suloka lakhi ithulu ani.”

¹² AMPEU no pi, “Noye achipishi ithuluvae, itsaye kuchouno shikupuni malaye ino huqheju ani.”

¹³ Itaghi AMPEU no iputsa ghi ishi iniju, “Noye kutau kiu ithulu ani kya?” “Ahuu kudau ali lakhi muqhole akeu ino ithulu ani eno tiye hikidiu kugho ighiniye kuto anike,” ipi ino khochile.

¹⁴ Tileno AMPEU no ivilo ishi pi, “Ahuu kudauno kutsakungo keu hipa yeghilo akemi kumtsu shou muqhole ikughi nani,

¹⁵ kughengu ahuu ashiayeh akemi kumtsu ighipe nike ino ku anike. Tipaqo shou ka akemi qono Jerusalem khaghoqo ngo tipau puwu puakeu homxa pesu akuka lakhu qhiwo nani, eno Juda lo aphughi kutau akeqo loghi qhiwo nani.

¹⁶ Ino iwu timiqo ghimeqhi nani kughengu panonguno axine shike; panonguno ipheveno kutau lhouqo lau akumllagho heqhi tsuke eno ajulho shisuno tipaqo mllake.

¹⁷ Jeremiya, kutolulo, wulo ino ovilo pilopi ahza tsukeu kumtsu pesu panoqo vilo pilo. Noye panoqo musa ichi kevilo tikumo aye nono panoqo zulo akelo ino opelo alau msa ichivepe nanike.

¹⁸ Julo, Juda yeghiqhalo akemi kumtsu kukami, kijemi, achinemi eno timiqono omujo nani. Ikemu ino ishi tsala lono panoqo mujochile kulupu kumto otsu ani eno noye aphughi veho putupuakeu phughi lakhi toi nani, ayino shikeu tsukucho toi nani eno alazayi pesu putupuakeu toi nani.

¹⁹ Panonguye otheqhi mla nani kughengu ino osusho nike ogholo ani. Ni, AMPEU no piqhi ani.”