James 5 - BAIBEL (BSI)

Kinimi lau Ghuttu

¹ Itehiye nongu kinimiqono inilo! Nongu shou amlo kighishipu wochekeu ghenguno nonguye igha-muku qalo!

² Nongu wu kinikuluye tsu-mavae eno nongu phiminiye apilano love ani.

³ Nongu wu shunayi ngo tsandiyiye ayisano chuvae eno ayisa tipauno nongu shou piqabe nani eno ami toi nongu phiashi chupuha nani. Nonguye kishekhake tsala hipaqolo akini pekutsu ani.

⁴ Ikemu khunoqono nongu lulo ghile hutsukeno tipaqo jume nonguye khilemu tsuchemoe. Panongu ghugha inijulo! Nongu lulo ghile hutsukemiqo ghughaye Aqokitikhi Mpeu kini tovae!

⁵ Nonguye ayeghilo nibonileyi eno aghakiqipu lono xu acheni; ghiqhikepu tsala ghenguno nonguye atha pubeyiluvae.

⁶ Nonguno kiumu shipimimo kemi peve cheni eno ghiqhi cheni; paye omujochile chemoe.

Kheakulu eno Akighini

⁷ Athikuzumiqo, tishiaye Ampeu ighinike kutolo kheakulu shilo. Julo,alukichimi lakhiye pa lulo akughupushi axa ipeghi nikeu khe acheni, paye tsutsughu atughiu ngo ashekhau tsutsughu ithumlake kutolo kheakulushi khe acheni.

⁸ Nongu ghikheakulu shilo. Nongu mlo mtotoi shipesu alo, kughengu Ampeu ighinikeuye kupunu cheae.

⁹ Athikuzumiqo, nongu lakhino lakhi shou muchho kevilo, tishianguno Alhou no nongu shou kughathabemo nani. Julo, Kughakuthauye ahukikhalo puthugho ani.

¹⁰ Athikuzumiqo, tungkupmi khunoqono Ampeu jelono piche keno panoqo kumsululo eno panonguye kishi aghimeshi kheakulu shi chekeno tipau pesu kichekipiye shilulo.

¹¹ Khunoqono puqhekulu shi keno tipaqo lokivipukepi picheni. Job no puqhekulu shikeu nonguno chiluvae, eno ashekhalo Ampeu no kishi shitsukeno nonguno ithuluvae. Ampeu ye kimiyeqhiyi keu eno kupuqhiyi keuke.

¹² Ikemu ithikuzumiqo, kumtsu nguno alauno, nonguye kungugha, ayeghi momu kiukiumu pesu tushoqhi kevilo. Nonguye iye ipikepulo “Iye” ipilo eno moe ipikepulo “Moe” ipilo, tishianguno nonguye Alhou no kughathabe keulo ilomo nani.

¹³ Nongu gholo khualano shilusa ani kesha? Paye inikhulo. Khualaye alovi ani kesha? Paye shekiqhe le phelo.

¹⁴ Nongu gholo khualaye kusukini shi ani kesha? Paye akukuholo kichimiqo kulo, eno panoqo pelo Ampeu jelono suakeu shou teli pesu nutsu puzu pa ghenguno inikhutsu pelo.

¹⁵ Akupulushi inikhukeu lono akusuu viluve nani, Ampeu no atho puthotsu nani eno pano axine shivekeu pevetsu nani.

¹⁶ Tighenguno nongu xine lakhino lakhi vilo piphelo eno lakhino lakhi ghenguno inikhutsulo, tishianguno nonguye viluve penike. Amikuchomi kukhu kighiniye shikulupu kuka kije ani.

¹⁷ Elija ye ningu lhoayeh toikemi lakhike. Pano tsughu pemo nike ghenguno amlo tsuqhiyi inikhuke, eno ayeghilo ampe kuthu aqhi tsugho kutolo ghuqhimove.

¹⁸ Tipathiu pano itaghi inikhu kelo atsutsu lono ghuqhitsu eno ayeghino axatsuni ipeghilue.

¹⁹ Ithikuzumiqo, nongu gholo milakhino kuchou launo alakumolo wuvenikelo kutami lakhino timi tipau sachile saghilu aye

²⁰ hipau kumsululo: khunono axinemi lakhi alakumolo chechekeu lono sachile saghi nikeno axinemi tipau kuxu akithipu lono xalu anie, eno axine kumzapu pevetsulu kepu shilu anipeke.