James 2 - BAIBEL (BSI)

Agiju pemonike Kutughu

¹ Ithikuzumiqo, nonguno niMpeu Jisu Khristo, Akimthe jukuvu Mpeu lono akupulu tsuqupe akeulo, nonguye khilemu ashou koghekughu jupesu timi peitha kevilo.

² Kumsujukelo kinimi lakhi shuna nguthi ngo aphimini kivi pepusu no kukuholo iloghiaye eno kumlhomi lakhi ghi aphimini itajumughuyi pepusu ighiaye,

³ nonguno aphimini kivi pepusu ighikeu jukuto auveno pa vilo, “Alakhu kiviu hipaulo iqa tsunima?” ipini, ikemu kumlhomi viloye, “Tila puthugholo momu ipukhu phivilo iqalo,” ipi piaye,

⁴ nonguye nolikhi nongu gholo kutuqukeu shipesu qhiani eno alhoksa kumsupuno kughathabe anike kumo kesha?

⁵ Ino kimiyechekemi athikuzumiqo, hi inilo! Alhou no ayeghi hipaulo kumlhomi kisheluno akupululo kinikulu shilupeke eno pa kimiyekemiqo tsunikeushi piqhipuakeu Akukaqha hu panongu wu shilupeke kumo kesha?

⁶ Ikemu nonguno kumlhomi phimo gihumo chenie! Kinimino nongu nedaqoda cheni eno nongu sunhe sasu kughakutha alo wuchenike kumo kesha?

⁷ Alhou no aje kivi khipau pesu nongu tsukeno tipau je kinimino thaigha chenike kumo kesha?

⁸ Nonguno kuchou Akukaqha yezah khikhi kuchoyesulo, “Okusami olikhi otoi kimiyelo,” ipi puakeu shikupulu aye nonguye achipiu shilu ani.

⁹ Ikemu nonguno ashou koghekughu jupesu timi peitha aye nonguye axine shiani, eno nonguye ayezah hexakemi kepi Ayezah no nongu kileqhive ani.

¹⁰ Kughengu khunono Ayezah kumtsu peluni ikemu lakhi likhimu qhive nikeno paye tipau kumtsulo kuqu auvae.

¹¹ Kughengu khuno, “Salha kevilo” ipi pikeno, pano, “Timi ghiqhi kevilo” ipikeughi pike. Noye salha puaghimo namu, nono timi ghiqhi aye noye ayezah hexakemi shivae.

¹² Kuqhophelukeu yezah pesu kughathabe tsupenikemi shilukepushi atsa toi akumla ghi shilo.

¹³ Kughengu khunono timi kipimi pevetsumo nikeno Alhou no kughathakelo pa kipimi pevetsumo nani; tishimu akipimi qhivetsukeuno kughathabe keu shou tolu cheni.

Akupulu eno Akumla

¹⁴ Ithikuzumiqo, timi lakhino paye akupulu ani kepi namu akumla sumo aye tiye kiu alla ani kya? Pa kupulu tipauye pa xaluni kesha?

¹⁵ Athikuzumi momu achelimi lakhino aphimini avehupu shi aghi kelo eno chukepu kuha kelo,

¹⁶ nonguno tipaqo vilo, “Alhou no okumgha tsupeni! U-mini alo eno akivishi chusho alo” ipi puzu akuxulo avehupu akhotoshi akeu nonguno panongu tsumo aye, kiu alla ani kya?

¹⁷ Tihutoi akumla sumo aye akupulu likhiye akithie.

¹⁸ Ikemu khamino ishi piluvi, “Nono akupulu ani eno ino akumla ani.” Ino tipau khochile nikeuye, “Okumla sumono okupulu ipiyejulo, niye ikumla lono ikupulu opiyelu nanike.”

¹⁹ Alhou ye lakhi likhi ani kepi nono pulu cheni, tiye alo anie! Tughami ghi pulu acheni eno akumsano khokhoshi cheni.

²⁰ Noye mbomuzumi kena! Akumla sumokelo akupuluye abokumsa kepi opiyepe nishi ani kesha?

²¹ Nisu Abraham ye akumla vechewo Alhou lau achipikaluke kumo kesha? Tiye panu Isak pesu akumllagho shi-ghi akumllagho kiptialo bekeu lonoke.

²² Noye tijulo, pa kupulu ngo pa kumla kumtsa mlakuqhae; pa kumla vechewo pa kupulu shikuputsuke.

²³ Kuchoyesulo ishi pipuakeu shikupuluveke: “Abraham no Alhou shou pulubeke eno pa kupulu ghenguno paye amikucho kepi kihiluveke.” Alhou no pa vilo “Abraham ye ishouke” ipi pa kue.

²⁴ Tishiaye, timi lakhiye pa kupulu likhi kumono pa kumla supuzu Alhou lau achipikalu cheni kepi nono ithilo.

²⁵ Titoikeu ghola lono asalhaliu Rahab ghi lino Israilmi pukujumi sasuthi puzu ala kutauno panoqo puwuvekeu kumla vechewo Alhou lau achipikaluke

²⁶ Tighenguno aphimpiye anguagha kuhakeloye akithike, tihutoi akupulu ghi akumla sumokeloye akithike.