James 1 - BAIBEL (BSI)

Jems Yesu

¹ Alhou ngo Ampeu Jisu Khristo qeu Jems no ashiayeh chighikini Apanaghavekemi lau yehani. Petha tsu ani.

Akupulu eno Alokutsu

² Ithikuzumiqo, kughou nonguno akijikusa jeli sholuni keno tikumtsulo nonguye mughashe ani kepi kumsululo,

³ kughengu nongu kupulu pejukeu lono tsaqutsaleyi keu ipeghi chenikepi nonguno ithi ani.

⁴ Ikemu tsaqutsaleyi keuno ala kupujulo nongu sasu chepelo, tishianguno nonguye kiulomu kupumove mono viwotolu eno kupukulu shilupenike.

⁵ Nongu gholo khamino alokutsu kuha aye Alhou vilo khulo eno tipau pa tsu nanike; kughengu Alhou ye ngukughi sakiyimo puzu letha bethamono kumtsu lau tsu cheni.

⁶ Ikemu paye amlo lipimono akupulu shi inikhu pelo, kughengu khunono amlo lipini keno panonguye azughilo amulhuno azufukucho pesu tukucho sawuve keu toike.

⁷ Tipaphi timiye Ampeu launo kiumu ithulu nani kepi kumsukepu kuha.

⁸ Timi tipauye amlo kini puchekemi, eno pa kumla kughutha kumtsulo suniyikeu kuhae.

Aquagha eno Kinikulu

⁹ Aquaghau athikuzuu huye Alhou no kughou pa sunheqhi nikeno akijivi pelo,

¹⁰ kinimi athikuzuu ghi Alhou no pa shikuchu nikeulo akijivi pelo, kughengu tsunikupu toi paye hauve nani.

¹¹ Tsukinhe kulu-kushuno ipeghi puzu atsuni phuqhi cheni; tipau kupu ighiqive cheni eno tipau jukivi hauve cheni. Tihutoi kinimiye pa kumla puzucheke lono hauve nani.

Ghukuju eno Pekuju

¹² Ghujukelo puqhekulumi lokivipue; kughengu pa pejukeulo puthugholu kemiye Alhou no khunono pa kimiye chenikeno tipano tsuniepi puakeu kuxu saxu pa tsu nani.

¹³ Tikithipu pejukeuno timi lakhi ghujuaye paye, “Alhou no ighuju anike” ipi pikepu kumoe. Kughengu alhoksaye Alhou ghujumlae, eno pa ampiye khumu ghuju chemoe.

¹⁴ Ikemu kughono alikhi ampi wu shinishikutu keu lhoksano pa musu sawuve eno pa zuluveni keno tileno pa ghuju cheni.

¹⁵ Tileno pawu shinishi kutukeu lhoksano mishipuluve puzu axine punuqhi cheni; eno kughou axine chhikhoi thuwuveni keno akithipu sughi cheni.

¹⁶ Ino kimiyechekemi athikuzumiqo, nongu pishiqhivepe kevilo.

¹⁷ Aghokivi jeli eno viwotokulu kumsagho jeli kumtsu kunguuno ighi cheni, tipaqoye kungughalo akuvuqo lhokeu Apu launo ighi cheni. Paye kilive chemoe momu paye iqekeu eno yekukhu kuha.

¹⁸ Pa likhi pa puloushi kuchou tsa pesu ningu pelo aghilupeke, tishianguno pano lhokeqo gholo amusuu xathi shilupeke.

Chikulu eno Shikulu

¹⁹ Ino kimiyechekemi athikuzumiqo, hipau ithilo! Kumtsuno pai chilu nikeu shimasae, ikemu akipi loye asheshilo eno asheshino amlo idekemi shilo.

²⁰ Kughengu timi mlo kighideye Alhou mikucho kumla shilu chemoe.

²¹ Tighenguno aphi kumqhupu eno kusakugha suqesuli kumtsu pevelo eno akuchuniu shipuzu khikhi nongu xakulupu tsa Alhou no nongu lolo xusu puatsuakeno tipau ikhilulo.

²² Pa tsa inike likhi inipuzu nolikhi nongu pishiqhi kevilo, ikemu tipau toi mlakemi shilo.

²³ Kughengu khunono atsa likhi ini puzu tipau shichemo keno paye timino ayinalo jusu puzu paye kiukela pa likhi pa ju ithulukeu toike.

²⁴ Pa likhi pa ithulu puzu wuveno pa likhi paye kiutoikela kumsumave cheni.

²⁵ Ikemu khunono timi kuqhophelu chekeu yezah ti viwotolukeu yezahlo jusuni eno khuno tipau kumsukutoju cheni keno, paye inike likhi ini puzu kumsumavekemi kumoe ikemu paye akumla shikichekemi ke. Timi tipanoye pano mlaithakeulo Alhou no kumghatsu cheni.

²⁶ Timi khuno paye achineyehlo amlo tsuqhiyikemi kepi kumsu cheni ikemu pa mili ghasumo nikeno pa chineyehye avehupu kuhae eno pa likhi pa pishiqhi anike.

²⁷ Apu Alhou zulo mutsumisheyi keu eno tukutiye kuhakeu chineyehye hike: mighimugha chikamujo keu, chimemino aghimeshi akelo tuchoheju keu eno ayeghilomi pelo pa kitiqeve pemono ngo lukeu huno achineyeh kuchouke.