ISAIAH 65 - BAIBEL (BSI)

Hekibidemi Alhou no Ghimeqhi

¹ AMPEU no pi, “Niye iwu timiqo kighini khochile tsuniye kutope ake ikemu panonguno inikhumoke. Niye panoqo pelo iphulu peniye kutope ake ikemu panonguye pukaputsaju keughi kuhake. Aghakhumino ivilo inikhu moke niye panongu khochile nike ishi kutope anamu, ‘Niye hila ani, ino nongu kuphunike.’

² Ihekibidemiqo salu nike tsala kupujulo iu sukhope laju ke, panoqoye ala kivi kumolo chechekemi eno pano lhoksa pape chekemiqoke.

³ Panonguye kujomomitheno imlo shikighide acheni. Panonguno chinichekeu ghutulo lhoxu heqhipe tughachine shike eno tughachine khachelo tsungquikeu-ta pitike.

⁴ Putholo panonguno atukilo ngo akumokilo kithimi ghungu sasu kusutsa kileniye wucheni. Panonguye awoshi chucheni eno tughachinelo lhoxu heqhi pe mllakeu shilhokeu zu yecheni.

⁵ Tileno panonguno kutami viloye, ‘Nilauno putosuluvelo; ninguye akimtheke nidilunosake!’ ipi cheni. Niye titoikemi juamla, iloghuye tipaqo shou ami kuiqu toi acheni.

⁶ “Niye panoqo ghimeqhinikeu xatha pesu kutovae eno panoqo shou kiu shikepu keno yepesu qhivae. Panonguno kiu mlakeno niye juzuveni chemoe ikemu pano xineqo eno pano puasu xineqo ghenguno panoqo shou lochile nani.

⁷ Panonguno tughachine naghutolo tsungquikeu ta piti kumna cheni eno ilhoksa picheni. Tighenguno wovekeulo panonguno mlapuakeu qhemi niye panoqo ghimeqhi nani.”

⁸ AMPEU no pi, “Timi khuumu atsayithi akivi kutsave chemoe, tishike kumono tipaqo pesu atsayiji mla cheni. Nighi iwu timi kumtsu kutsavemo nani, khunoqono iqechekeno tipaqo ino xalu nani.

⁹ Israilmi khunoqono Juda laghami keno ino panoqo kumghatsuni, panoqo laghano iyeghilo naghutoqha amheghi shi iyighilu nani. Ino kisheluvekemi timiqo; khunono iqechekeno panonguno tilehi kughuna nani.

¹⁰ Panonguno imlla nani eno panowu bheri ngo amshi sawu puzu kulolau Sharon Khilalo eno kipelau Kupuna Khilalo achukmza nani.

¹¹ “Ikemu nongu iqhiveno Zion ikimthe toqhi gihumoveno anguksa lhou Gad ngo Meni mlla chekemiqoye pakutakeu anani.

¹² Nonguye ghuilo wokeu kithi shi akishelo yepuakeu shipe nani, kughengu kughou ino nongu kukelo nonguye khochilemo momu ino pikelo inimoke. Nonguno ighobide eno alhoksa shinikeu kisheluke.

¹³ Ikehu ino nongu vilo pinike khunoqono igholu eno imllani keno lukumkhashi chu shokepu anani, ikemu nonguqoye muzuthi, tughuthi nani. Panonguye alokivishi ikemu nonguqoye kujomzakepu shi anani.

¹⁴ Panonguye alovi alephe nani ikemu nonguye amlo itapinyi igha nani.

¹⁵ Ino kisheluvekemi timiqono nongu je peitha puzu musuini nani. Ni AMPEU Alhou no nongu pithive nani. Ikemu khunoqono igholu keno tipaqo lau ino aje kithe lakhi tsu nani.

¹⁶ Ikehu aghakhulo timi khuno kukumgha khuni keno kuchou Lhou pelo kumghatsu penike iniju nani. Khuuno ashoqhi shini keno kuchou Lhou jelono tushoqhi nani. Wovekeulo shiluksaqo huye cheve nani eno kumsumave nani.”

Lhophekeu Akithe

¹⁷ AMPEU no pi, “Julo, niye kungugha kithe eno ayeghi kithe lhophe ani; wovekeulo shivekeqo kumtsu kumsumave nani momu akukumsulo ighimove nani.

¹⁸ Ino lhophekeulo pulhapujulo alokivi eno alokiqi shiachelo. Jerusalem akitheu ino lhophe akeuye alokivino chhitoi nani eno li timiye alokivimi shi nani.

¹⁹ Ni ampi ghi Jerusalem eno tile akemiqo ghenguno alokivi shi nani. Tilehi qamlokeu kuha nani eno kuphulepi ighakeu sutsa kuha nani.

²⁰ Angaqoye akughunu aphilono thivemo nani eno timi kumtsu khitohi xukepu shipuani keno titohi xu nani. Khunoqono ampe 100 xunikeno tipaqoye lhothemi aphikepi kihi nani. Tipa zuuno thikemiye ino ghimeqhi keu michipu shiniake.

^21-22 Timiqono aki shisuno pano ampino tile ngo nani, tipaqoye kutamino ngokeu shimo nani. Panonguno atsayilu chi nani eno atsayiji tipau peitha nani, tiye kutamino peithauvekeu shimo nani. Asuboqo toi iwu timiqoye akuxu kushuwo xu nani. Panonguye panonguno kiu mlalu keno tipaqo kumtsu panowu shi peithakulupu shi nani.

²³ Panonguno akumla mlakeulo shiwotolu nani eno panoqo tianuliye kutsakungokeu kusholumo nani. Ino ighinikeu ado kumtsulo panoqo ngo pano tikughukomi kumghatsu nani.

²⁴ Panonguno ilau inikhu tavemphi lonomu, ino panoqo kighini chilutsu nani.

²⁵ Atine ngo bheritiqo kumtsa chu nani; abongushuno amshi toi aghijini chu nani eno apighiye akumsapu kuhave nani. Ikimthe toghi Zion lo kiumu shikupusapu momu alhoksapu kuha nani.”