ISAIAH 64 - BAIBEL (BSI)

¹ Kushiye atsutsu suxuveno aqhou iqighimo kya? Naghutoqono ojuthulu puzu musa khokhoshive nanike.

² Tipanoqoye ami kushu shou azu muqho akeshi itha nani. Ighilo eno oghumi lau okuka pephepiyelo eno ozulo ashiayehqo pelo khokhoshi musave pelo!

³ Aghuloki lakhilo nono ighikelo eno akuighupu kumla nino huqhemono akeu lono tile naghutoqono ojuthuluke eno akumsano khokhoshiveke.

⁴ Timi khunomu otoikeu lhou ithulu momu chimla aphike, opulube chekemi ghenguno nono mlatsukeu toike kutami kuhae.

⁵ Khunoqono achipiu shikeu lono alovi cheni keno tipaqo nono salu cheni nono khunoqo pelo xupenishi acheni keno kumsulu chenike. Noye nishou aloghu ideke ikemu ninguye axine shiacheuve, ologhu kije akeu phimo puzu khaghi ghuloki lono ninguye akumou shikibe achenike.

⁶ Ningu kumtsuno axine toiva eno ni mikucho kumla kumtsu niqhunilai keu phinhe toike. Nixine ghenguno ninguye asunipa thizumyive puzu amlhuno fupewuvekeu toike.

⁷ Milakhimu akighini lono olau ideghimoe, milakhimu opelo kuphu penike wumoke. Noye nilauno itshuluve eno nixine ghenguno niqhiveke.

⁸ Ikemu noye nipuh AMPEU ke. Ninguye aghani toi ke eno noye alikishiu toike. Nono ni lhoqhike,

⁹ tighenguno nishou ighono aloghu idetsu kevilo momu alhokupujulo nixine nishou betsukevilo. Ninguye owu timiqoke; nikupuqhiyi tsulo.

¹⁰ Okimthe phughiqoye asayeqha toike; Jerusalem ye ixapinyi kughukughaleyivae,

¹¹ ni Achine ki, akimthe eno jukighilepu-a lakhi khile nipuasuno osheqheche keno amino ghuleveke. Nino kimiyechekeu-a kumtsu ixapinyi ani.

¹² AMPEU, noye hipaqo jupe amlo shimo kesha? Noye kiumu shitsumoni kesha eno nipelo puqhemlano alau aghimeshi apeni kesha?