ISAIAH 61 - BAIBEL (BSI)

Xaphelunikeu Sutsa kivi

¹ AMPEU Alhou Ghungu ishou ani. Pano ikishelu eno kumlhomi lau sutsakivi sughi penike ipuwuke, amlo itajumughuyi akemi shipivi peniyeke, Tshusawuvekemi kuqhophekeu eno akughukilo akemi khaqhi phekeu kutughu peniyeke.

² AMPEU no ipuwuke eno pano pawu timi xalunikeu eno pano ghumiqo haleve tsunikeu ghuloki ighivekeu asheshu peniyeke. Pano ipuwuke eno muloqa akemi kumtsu lokughunotsu,

³ Zion lo muloqa akemi vilo amlo ghime thelilo alokivi eno aloino keu tsupeniyeke, amloksa thelilo sheqhekeu le tsupeniye ke. Panonguye AMPEU ampino shosu keu subo toive nani. Panongu kumtsu kiuno achipi keno tipau shi nani, eno Alhou no kiu shitsukeno tipaqo ghenguno pa sheqhe nani.

⁴ Aphughi ado kushuwolo ixapinyi achekeu panonguno shiqhekithe nani.

⁵ Iwu timiqo, inaghamino nongu qe nani. Panonguno no tsu-aqu khetsu nani eno nolu kumlami shi nani eno notsayilu chitsu nani.

⁶ Nonguye AMPEU chinemi kepi ithipe nani, Ni Lhou qemiqo shi nani. Nonguno ashiayeh kutamiqo wu kinikulu peitha nani, eno tiye nowu kepi nokijivilo nani.

⁷ Nokukujo eno niqhinilai keu kishekhavae. Nonguye noyeghilo kughunalu nani, eno nowu kinikuluye ghuthu kini alau shive nani; Nolokiviye alhokupujulo acheuve nani.

⁸ AMPEU no pi, “Niye achipi xakutha kimiyeke eno nedaqodakeu ngo ghiqhi heqhi keu mithi cheni. Ino kuchouno iwu timiqo asaxu tsu nani. Panoqo sasu lhokta puloshoqhi lakhi shi nani.

⁹ Panonguye ashiayehqo gholo ajekipi shi nani; Panoqo ithulukemi kumtsuno iwu timiqoye ino kumghatsu kepi ithikha nani.”

¹⁰ Jerusalem ye AMPEU no kiu mlatsu keno tipaulo alovi akhani. Liye kulaliu lakhino kulakupu ghenguno aphimini pepu pesu aketoike. Alhou no xakulu ngo tokulu pesu li puuke.

¹¹ Mutsuqheyino ayeghilono apitino lho ipeghi puzu thuwu keshi AMPEU Alhou no pawu timiqo xalu nani, eno ashiayeh kumtsuno pa sheqhe nani.