ISAIAH 58 - BAIBEL (BSI)

Kumvu keu Kuchou

¹ AMPEU no pi, “Nono toluke thaqhu asheshulo! Iwu timi Israilmi vilo panoqo xine pilo!

² Panonguye ghulo atsutsu imlla cheni, panonguye ilaghi ithinikeu eno iyezah papelu nikeu khekulhoshi acheni kepi piacheni. Panonguno pikeuno ipelo kuchou yezah pesu panoqo tsupeni shi eno panonguye imllani keulo aloqi cheni kepi acheni.”

³ Timiqono iniju, “AMPEU no khilemu nijuthulu chemo aye kushiye kumvu ani kya? Pano nilau amlo tsumo aye ninguye kushiye achuqupu chumono ani kya?” AMPEU no panoqo vilo pi, “Julepi, nonguye kumvu kemtsa nonguye nonguno shinishikeu puzusu wuvecheni eno nokumla kishimi qodaqhi chenike.

⁴ Nonguno kumvu keu huno nongu pelo muqhomza chenipe eno nonguno mutomushu kichighi cheni. Kumvu keu hikithipuye ipelo nongu kighini initsu pe nani ke pi kumsu cheni kesha?

⁵ Kughou nonguno kumvuni keno, no likhi noghimeqhi cheni eno atsuni nipano ihoiqi akeshi nongu kutsu aqhou pishiqho cheni eno ihozuniaye yeqhiyephi ngo ayevu qha cheni. Tikithipu pesu nonguye kumvukeu ipi cheni kesha? tikithipuno niye imlo kiqishi cheni kepi nonguye kumsu ani kesha?

⁶ “Kumvu keu jeli ino lunishi chekeuye hike: neda qodaqhi chekeu yikichhe ikhivetsulo eno amikucho kumo kuokhasu ikhivetsulo eno neda qodavekemi khaqhipheveno wuve pelo.

⁷ Muzuthi aghikemi sasu nongu chuqupu kusajelo eno akialu kuhakemi kumlhomi nongu kilo sasulo. Kiumu unimi kepu kuhakemi aphimini tsulo eno nosholokumi kuphukileni keu kughuchove kevilo.

⁸ “Tileno inaqhe tsukinhe toi imlo kiqi nongu shou yepuvutsu nani eno nongu ghuzapiyi itheno vive nani. Niye nongu xalunike pulhapuju nongu gholo anani; ijukuvuno sukumxa kumtsu ngono nongu susho nani.

⁹ Nonguno inikhu kelo, ino nongu khochile nani, nonguno iku keulo ino hilau ani kepi pinani. “Nonguno qodaqhi chekeu shimove, aphimuqhu chekeu ghusho ghili qhive eno atsa lhoksa pichekeu pimove ishi aye;

¹⁰ eno muzuthi kemi achuqupu tsu eno kuhakemi mlo vepiqitsu aye akuzu nongu vehope akeuye puchou kuvu shive nani.

¹¹ Pulhapuju ino nongu sapiye eno thime kivi pesu nongu lopiqitsu nani. Ino nongu pelo mutotoi eno akivishi apenani. Nonguye aghutu lakhi azu pofushi akeu toi nani, azupuki khilemu qhaive chemokeu toi nani.

¹² Nowu timiqoye ado kushuwa ixapinyive keu shou aki shiqhepuku kithe nani, aboqha aqau shou itaghi shipuku nani. Nonguye aliwo putukithe kemiqo eno ixapinyi vekeu ki shikithe kemiqo kepi kutamino piwove nani.”

Sabat Pechekeu Saxu

¹³ AMPEU no pi, “Nonguno Sabat akimtheshi peitha puzu tipa tsalalo nonguno pulokeu papewumo aye; nonguno ikimthe tsla ame kuapushi eno tipau tsala ikhilu izuwumo, mlamo momu adou tsa kughamo aye

¹⁴ iqekeu lono alovikepu nonguno ithulu nani. Ayeghiqha kumtsu shou ino nongu gihupe nani eno nonguno ino ayeghi nopuasu Jakob tsukeu alokivishi pe ithalu nani. Ni, AMPEU no pianike.”