ISAIAH 53 - BAIBEL (BSI)

¹ Timiqono khochile, “Nino kiu chilu keno khuno nitsa pulu tsu kya? Hipaulo khuno Alhou no pa-u chhosu anikepi ithi kena -!

² Hiye AMPEU pulou shiaghive ike pa qeuye ayeghi qhaikeulo asubo lakhino akuhu qusu pesu thuwu akeu kimihi shiaghi kepu shive. Paye ningu pelo paju michilu penike athinibei keu momu jukivipu kuhae Kiu lonomu paye koghe kughu kivi kuhae, pa kudau nimusu sawukepu kiumu kuhake.

³ Ninguno pa jumithike eno pa miliveke; paye aghichhe ghime eno sakutu keu puqheke. Milakhinomu pa kudau jupuwu moke - paye kiumu kumo kehutoi ninguno pa phimoke.”

⁴ “Ikemu nino aghichhe ghime shia kepu pano puqheluvetsuke, akusupu nino xapu akepushi akeu hu pano puqheluve tsuke. Tishiake kutolo pano ghichhe ghime shiakeuye Alhou no pa ghimeqhi anikepi nino kumsuveke.

⁵ Ikemu nixineqo ghenguno pa ghuzaveke, nino alhoksa shikeu ghenguno pa heqhike. Pano aghichhe aghime shikeu huno ni shipivike, chishiqhikeu pano puluvetsu keu huno nipelo vithai luvepeke.

⁶ Ningu kumtsu bheri puhavekeqo toikhave, ningu milakhi khino pututa lalo wukhave. Ikemu AMPEU no pa shou ghichhe ghime betsu, nino ithukulupu shiakeu ghichhe ghimeke.”

⁷ “Mughachhoi pa peithake, ikemu akumtsa shi puqheluveke; paye atsa lakhimu piqhimoe. Bheriti lakhi ghiqhiniye akelo toi, bheri lakhi amhi gholuveniye akelo toi paye atsa lakhimu piqhimoe.

⁸ Paye kughaluve, pithive nikeu shi kughathave eno pithinike sawuveke; timi milakhimu paye kishive nani kela jukutokeu kuhave. Paye ni timiqo xine ghenguno pithiveke.

⁹ Paye akithipu alo alhoksami sasu qhiveke, paye kinimi gholo qhoveke, tishiepimu paye heqhi buqhi keu lakhimu shipe puamoe momu akimki tsa lakhimu pipuamoke.”

¹⁰ AMPEU no pi, “Pano aghime shikeuye ipulou ke; pa kithiye peve tsukile keu sughinike aghashikeuke. Ikehu paye pa laghami ithulukha nani; paye akuxu kushuwa xu nani, eno pa vechewo ino kimji pesu akeu tokulupu shi nani.

¹¹ Ghichhe ghime kuxu thikhauno, paye itaghi alovilu nani, paye adou lono imepuamo kepi ithilu nani. Iqeu amlo tsuchekeu, khuu shou ilokiqipu acheni keno timi kutomo ghimepu pano pepuluve nani eno pa ghenguno ino pano xine pevetsu nani.

¹² Ikehu ino agigihupu-a lakhi pesu pa tsuni, kijemi ngo kushumi gholo a-a lakhi tsunike. Pano puloniqhiyi pa kuxu tsuve eno alhoksami kishi akuxu shekha shivecheni keno tipau kusajeke. Pano axinemi kutomo alo ngoluvetsu eno panoqo xine pevetsu penikeu shi inikhuke.”