ISAIAH 50 - BAIBEL (BSI)

¹ AMPEU no pi, “Niye timi lakhino pa nipu jumuve ketoi iwu timiqo puwuve kughashi nonguye kumsu ani kesha? Tishiaye, jumu kilevekeu kaku khile ani kya? Nonguno kumsukeuye niye timi lakhino pa tianuli aquaxe shi penike jevekeshi nongu akughu shikeulo jepuwuve kughashi ani kesha? Moe, nonguno akughu shiwuve keuye nongu xineqo ghengu noke; Nonguno heqhi buqhikeu ghenguno nonguye hapuwuveke.

² ‘Kushiye ino xaluniye ighikelo iwu timi khumu aghimove kya? Kushiye ino kuju kelo panonguye khochilemo kya? Panoqo xakulupulo niye miqemileyive kesha? momu panoqo xaphe lunikeu kuka niye kuhave akesha? Ino ahza lakhi tsupuzu azughi pesu qhaiyivelu nani, aghoki pesu asayeqha kughulhovelu puzu azukuha kelauno akha tile akeqo thivepelu nani.

³ Ino atsutsu pesu zumoive kepu shilu nani eno tiye kithimi ghenguno muloqa akeshive pelu nani.’

AMPEU Qeu Ghokulu

⁴ AMPEU Alhou no kiu pikepu keno ishikapiyevae, ikehu ino kulho kughomi shikumtolu nani. Inaqhe atsu-tsu pano kiu ishika piyeni keno azukini shi iniche nipe.

⁵ AMPEU no vethakulu pesu itsuke, niye tipau hebide chemoe momu pa launo tsughuwuve chemoe.

⁶ Iheqhi akemi lau ino imqa mighe tsuke. Panonguno ithaighakeulo niye pano qo lakhamoke, panonguno ikichimhi phivetsu eno igilo musute keulo niye panoqo lakhamoke.

⁷ Ikemu panonguno ithaighakeuye ighuza mla kughengu AMPEU Alhou no ikuphuke. Tighenguno niye agi teqhiteleyi tipaqo kutuu kutu-o luke.

⁸ Ino ithiani, niye kujo mzavemo nani, kughengu Alhou ye ikupunukhoi ani, eno pano niye pimi puamo kepi xathavetsu. Khuuno ighumo puzu ishou ngukubelu nani kesha? ningu kughakutha alo kumtsa wunie! Pa pelo nguku kepu sughiju pelo!

⁹ AMPEU Alhou ampino isushope ani, tishiaye, khuuno niye kuquve akepi pilu nani kya? Inguku akemi kumtsu hauve nani; panonguye apilano chupuhavekeu phimini toi hauve nani.

¹⁰ Nongu khunoqono AMPEU gihu cheni eno pa qeu tsa aghokulu shicheni keno, nonguno pula chekeu laghiye kuchouno zumoi aghiluvi, ikemu AMPEU pululo eno no Lhou shou mumubepe alo.

¹¹ Nongu khunoqono kutami kutsa veniye kuchughu cheni keno nowu kuchughu puakeu lono okutsave nani. AMPEU ampino tipau shivepe nani; noye angukusa lhoksa lono aghime sholu nani.”