ISAIAH 49 - BAIBEL (BSI)

Israil ye Ashiayehqo Kuvu

¹ Ashiayeh tusumiqo, nongu khunoqo putou acheni keno tipaqono, itsa inilo! Ipunu mphi lono AMPEU no ikishe luke eno pa qeu shipe nike ni sukusu shipe qhike.

² Pano itsa pesu azutakihi toi tsughaminhei shitsuke. Pa-uno isushope ngoke. Pano ikughape apiji toi tsugha minhei shitsu eno peithakulupu shike.

³ Pano ivilo pike, “Israil, noye iqeuke; oghenguno timino isheqhe nani.”

⁴ Ino pi, “Ino mula itha ikemu adou lono shike! niye ika aghashi shiju ikemu kiumu shiqhimlake.” Ikeghi isusholupe nike niye AMPEU pulube cheni; ino kiu shipuani keno pano asaxu tsu nani.

⁵ Ipunu mphi lono AMPEU no isukusu shipe qhiveke; pano pa qeu pelo pawu timiqo sachilesaghi penikeu shi mlatsuke, Israil lo apanaghave keu timiqo sachile saghipe niyeke. AMPEU no agigihupu itsuke; paye ikumto ighichekeu pukike.

⁶ AMPEU no ivilo pike, “Iqeu, niye oghenguno akumlapu saje kije lakhi ani. Noye Israilmi puxu puaghikeqo kije shikepulo sachilewoni keu likhi kumo, ikemu ino opelo ashiayehqo lau akuvu lakhi shipeni cheni, tishianguno ayeghiqha kumtsu xaluvepe nike.”

⁷ Israil Lhou akimtheu eno xaku luuno Ashiayehqono mithi achekeu eno shishe jukunatha achekeu eno ayehkipemiqo qeu vilo ishi pi: “Okuqhopheve keu kukamino ithulu nani eno ithughino panoqono agigihu tsu nani kukapumi ghi tipau ithulu nani, eno panongu ghi aqhou shi itsaiqi puzu ogihu nani.” Hipau shi nani putsa kughengu AMPEU no pa qeu kisheluve ake; Israil Lhou akimtheuye pano tushoqhivekeu pecheni.

Jerusalem Tsuchile

⁸ AMPEU no pawu timiqo vilo pike, “Kughono nongu xalukepu ghuloki ighini keno, ino nongu kupuqhiyi keu piye nani eno nonguno kuphulepi ighakeu khochile tsu nani. Ino nongu kheni eno nongu sushoni eno nongu vechewo timi kumtsu sasu puloshoqhi lakhi shi nani. Itehi noyeghi peveno adoushi akeulo itaghi nongu pelo ngolupe nani.

⁹ Ino akughumiqo vilo, ‘khaqhiphe veake wolo!’ ipi nani; eno khuno qono akuzulo ani keno, ‘ akuvulo ipeghivelo!’ ipi nani. Panonguye bheriqono aluzalo achumuza akeutoi nani;

¹⁰ Panonguye khilemu muzuthi tughuthimo nani. Tsukinhe ngo asayeqha kushuno panoqo shipusamo nani, kughengu panoqo kimiye kicheuno pano ngu tughushi sawu nanike. Pano panoqo azupukilo sawu nani.”

¹¹ “Naghutoqo kathasu alaghila lakhi mlani eno iwu timiqo pelo wukepu laghi lakhi kuto tsu nani.

¹² Iwu timiqoye putouno ighi nani, ahuu kudauno, kulola kudauno eno apeu Aswan kudauno ighi nani.”

¹³ Kungughaqo alephelo! Ayeghi, alokivi launo ighamukulo! Naghutoqo pelo vekipighi ale phepelo! AMPEU no pawu timiqo lokughuno tsu nani; pawu timi aghimeshi akeqo jupe amlo ighiqhiyi nani.

¹⁴ Ikemu Jerusalem lo akemino pike, “AMPEU ye niqhivae! paye ningu kumsumlavae.”

¹⁵ Ikehu AMPEU no khochile, “Topumi lakhiye li likhi linga qhivelu nani kesha? eno lino punukeu nga kimiyemoni kesha? Aza lakhino linga qhive kepushi namu niye khilemu nongu qhivemo nanike.

¹⁶ Jerusalem, niye khilemu nongu qhimoke! niye nongu je i-u bokhulo yepe qhipuanike.

¹⁷ “Oshiqhepuku kitheni kemiqo itheno cheni, eno nongu kutsakemi qoye cheve nani.

¹⁸ Vehomxa julo eno kiu shiani keno julo! nowu timiqoye kuhokumqo anike eno panonguye aki kudau cheake! Kuchouno niye xuakeu Lhou keghenguno nonguye nowu timi jupesu akijivilo nani, tiye kulaliuno liwu achila jupesu akijivilokeu toi nani.”

¹⁹ “Noghakhuye xalepinyive eno kughukughaiveke, ikemu itehiye tilehi kughunaniye chekemiqo ghenguno ngozula nani. Khunoqono nongu xalepinyive tsu keno tipaqoye nongu launo putosulo ikhikiqeve nani.

²⁰ Nowu timi hapiyepighive kelono punukemino ghulo lakhiye nongu vilo ishi pinani, ‘Ayeghi hiye tulaloke, ninguye hinguno aqha akijeulo ngokepu shi anike!’

²¹ Tileno nonguno nolikhi novilo ishi pinani, ‘khuuno nighenguno atianuli hijejehi lhotsu kya? Niye itianuli haukhaveke eno tinguno kutau lhomla kepu shiveke. Niye hapiye pighiveke - khuuno ati anuli hipaqo saghitsu kya? Niye ilikhiveke, atianuli hipaqoye khilauno ighikha kya?’ ”

²² AMPEU Alhou no pawu timi vilo ishi pike: “Ino ashiayehqo vilo i-upesu kiche tsu nani eno panonguno otianuli akilo saghi nani.

²³ Kukamiqoye olau apuh lakhi toive nani; kukaliuye olau aza lakhi toi shive nani. Panonguno ogizulo itsaqino pishi qhope agigihu otsu nani; panonguno aqhokigheu shiveno osumsakeu piye nani. Tileno nonguno niye AMPEU kepi ithi nani; ikukuphu lunishiye khea chekemi milakhimu amlo shipusa vetsumo nani.”

²⁴ Nonguye ghushimi lakhino lepusu ighikeu luvelu nani kesha? momu nonguye pa ghokumoaye mokeu ayehkipemi lakhi launo akughumi lekhokulupu kesha?

²⁵ AMPEU no kuchouno piani, “Tipaphi shini chenike, ghushimi akughumiqo ikhi suwuve tsu nani, eno pa ghokumoaye mo keu ayehkipemino lepuwo pua ghikeu muxaluve nani. Khuuno nongu sasu aghushini keno ino tipau sasu kumjo nani, eno ino otianuliqo lekholuve nani.

²⁶ Ino nongu qodaneda chekemiqo lakhino lakhi pithivepe nani; Panonguye ghiqhikile keu ngo muqhomzakeu shomzu nani. Tileno timi jeli kumtsuno niye AMPEU kepi ithi nani, nongu xaluchekeu eno nongu kuqhophe chekeu kepi ithi nani. Panonguno niye Israil Lhou akuka kumtou kepi ithi nani.”