ISAIAH 48 - BAIBEL (BSI)

Alhou ye Ighinikeu MPEU

¹ Israil lo timiqo, hipau inijulo, nongu Juda lagha lono iko ighikemiqo: Nonguye AMPEU jelono tushoqhi cheni eno Israil Lhou mlla cheni kepi piacheni, ikemu nonguye nonguno pikeutsa pechemoe.

² Tishikeghi nonguye aqhekuzashi akimtheu phughilo kihikusumi kepi picheni, eno nonguye Israil Lhou, pa jeye Aqokitikhi MPEU shou bepe acheni kepi picheni.

³ AMPEU no Israil vilo pi, “Kiu shiveni cheni keno kha-ghino ino ashe-azu tsa pike; zuleno ino tipau shivepeke.

⁴ Nonguye shio shighai nani kepi ino ithi ake, ayi toi tsatsayi eno alazayi kumka toike.

⁵ Ikehu kha-ghino ino ighinikeulo noye kishive nani keno pivae, shiniye akeu tipaqo shimphi lono ino pesu asheshuke, tiye nowu ajulho ngo aju kughulho keu qono tipaqo shipe chenikepi opelo pipemo niyeke.”

⁶ “Ino ashe-azushi pikeu kumtsu shikupuvae; ino ashe-azushi pi keuye achipi kepi noye ikhilu kepushivae. Itehiye thime akithe ighiniye akeu ino ovilo pini, kiu shini cheni keno niye puzuu piyemphi keuke.

⁷ Itehi likhino tipaqo ino shipenikeu shiani; wovekeulo hikithipu shipua mphike. Tishike aye nono tipaqo kumtsu ithikhavea kepi piaghini cheke.

⁸ Ino ithianike noye pukhube kumlami ke, alhokuthulo noye hekibidemi kepi ithi achekemike. Ikehu noye hipau khilemu chilu chemoke, kha-ghinomu hipatsa okinilo ighimphike.”

⁹ “Timiqo pelo ije sheqhepe nike ghenguno, niye ixu kighide suchile pesu ani; niye tipau qhipe puani eno nongu kutsale vemo nanike.

¹⁰ Ino ami pesu aghime tsukeu lono opeqhejuvae, tiye amiphoki lono tsandiyi ghukutsughu ketoike. Ikemu noye ame kuhakeu ino ithuluvae.

¹¹ Ino kiu shiani keno tiye isala shi anike, niye kutami pelo ije gihumove keu shipemoke momu kutami pelo ijekipi kusaje pemoke, tiye iwuke eno iwu likhi shi nanike.”

AMPEU no Cyrus Kishelu

¹² AMPEU no pi, “Ino kuluvekemi Israil timiqo, inilo! Niye Alhou ke, atughiu, ashekhau, ilikhino Alhou ke!

¹³ I-uno ayeghi boqha mulake eno kungugha sukhope qhike. Kughou ino ayeghi ngo atsutsu kuni kelo tipaqono payi ighi puzu puthughope ngoluve cheni.”

¹⁴ “Nongu kumtsu kumqoluvelo eno inilo! Kiu lhou nomu ino kisheluvekeu timi huno Babilon leighi nani kepi ashe-azu tsa piluchemoke; ino pa pelo shipenishi keu pano shi nani.

¹⁵ Piqhikeu huye ino ke, ino pa kuluveke; ino pa sasu wuno aghu tokulupu pa tsuke.”

¹⁶ “Itehi ipunu ighilo eno ino kiu pini keno inilo. Inahuu abothu lono ino aqha zulono pivae eno pulhapuju itsaye kuchou shi aghipe cheni.” (Itehiye Alhou AMPEU no pa kuka itsuke eno ipuwuke.)

AMPEU Kukughu

¹⁷ Israil Lhou akimtheu, AMPEU khuno nongu xalukeno pano pi: “Niye nongu Lhou AMPEU ke, nongu shikapiye nishi chekeuke, tiye nongu kivipushi eno nonguye khipalalo wukepu keno nongu kichetsu chekeuke.”

¹⁸ “Nonguye ino ahza tsukeu chiluke aye nongu ghenguno kukumghano aghoki khilemu qopuhamla keshi qoighini cheke! Azu fukukuchono azu mukulo kuzu susu ighikeshi tokulupu nongu lau ighini cheke.

¹⁹ Nongu lagha kughukono asaye jejehi shive aghini cheke, eno niye khilemu tipaqo kutsavekeu shipemoni cheke.”

²⁰ Babilon lono ipevelo, khaqhiphe pesu wuvelo! Alokivishi asutsa kithe pesu asheshulo; aqha kumtsu tipau ithipelo: “AMPEU no pa qeu Israil xaluveake!”

²¹ Kughou AMPEU no pawu timiqo sasu shukuthuyi eno qhayikeu sayeqha vechesu wukeno, panonguye tughuthikeu lono imevemoke. Pano atuqu lono panoqo ghenguno azu ipeghipe; pano atuqu suphono lhaphe eno azuno qoipeghike.

²² “Axinemi ghenguye xakulupu kuhake” ipi AMPEU no pi.