ISAIAH 41 - BAIBEL (BSI)

Alhou no Israil Shikumto

¹ Alhou no ishi pi, “Inaqhoivelo eno ino pikeu inilo, O azumukulo ayeghiqo! Kughakilo nowu kughakuthapu tsunike kutolulo; Nonguno pipenike adokivi nongu tsu nani. Khuuno achipi keno ningu xatha nike kumtsa kumqoni nolo.

² ‘Kipelauno aghutou saighikeu hiye khuno kya? eno pano khila wuni keno tokulu shipekeuye khuno kya? Khuuno kukami ngo ashiayehqo shou tokulupu pesu tsu kya? Pa zutakihi pesu ayeghimukhu toi panoqo ghiqhike. Amlhu zulo aghijini toi pa pijino panoqo kaqhi.

³ Pano panoqo hawuke eno akivishi chesusu wuke, shishe muthu wukehu pa pukhu ayeghi nemoke toike!

⁴ Khuuno hikithipushi shilu ani pe kya? khuuno xuighikeu kishi wokepu keno kumsupusu akya? Ni, AMPEU ye abothu lono tilehi ake, eno ni, AMPEU ye ashekhalo tilehi anani.

⁵ “Ayeghi putou akemino ino kiu mlakeno ithuluve. Panonguye thughuive eno musa khokhoiveke; Ikehu panonguno kumqono ighi.

⁶ Atshamgha kishimino lakhino lakhi kuphukile eno shikumtokile.

⁷ Asu kumlamino shunayi kumlami vilo ishipi, ‘Aloqhi shivetsuake!’ Ajulho hekumudu chekeuno tipau yekumtsa chekeu shikumto. Panonguno pi, ‘Medakile keuye alo ani’ eno panonguno tipau ithape monike ayishu pe yetsave.

⁸ ‘Ikemu no, Israil iqeu, noye ino kisheluvekemi timiqoke, ishou Abraham laghamike.

⁹ Ino ayeghi shekha kudauno osaghike; tipau cheku kudauno ino okuluke eno ovilo pike, “Noye iqeuke.” Niye omilivemoke ikemu okisheluke.

¹⁰ Ino osasu anike musa kevilo! niye oLhou ke kiu pelomu oshikichi pekevilo! Ino opelo mutotoilupe nani eno kuphu nani; ino osusholu nani eno oxalu nani.

¹¹ “Khunoqono oshou amlo ide anikeno tipaqoye tomovekeu kukujo ithi nanike. Khunono osasu aghushiani keno thi nani

¹² eno ayeghilono hauve nani.

¹³ Niye AMPEU, oLhou ke; ino oshikumtoke eno pi, ‘Musa kevilo; ino okuphu nanike.’ ”

¹⁴ AMPEU no pi, “Musakevilo, kitila eno miqemileyi keu, Jakob, Israil timiqo; ino okuphu nanike. Ni, Israil Lhou akimtheu, ino oxalu chenike.

¹⁵ Ino opesu ashu mutsusuyi eno tsughaminhei keu athiqoche keu lipa shini. Nono naghutoqo qoqhi puzu tipaqo kutsave nani; atoghiqo amukhu kughulhove nani.

¹⁶ Nono amlhulo elepukuve nani; amlhuno tipaqo xapuwuve nani, eno pasapaghano tipaqo kutho leve nani. Tileno nono alovi nani kughengu niye oLhou ke; nono ni Israil Lhou akimtheu sheqhe nani.

¹⁷ ‘Kughou iwu timi kumlhomi ngo kuhakemino azu phuwuni keno, tileno ni, AMPEU no panoqo kighini khochiletsu nani; ni, Israil Lhou ye khilemu panoqo qhivemoke.

¹⁸ Ino naghuto qhemghaikelo aghoki qowupe nani eno akhilalo azupuki ipeghipe nani. Ino asayeqha pesu azukucho-a kughulho nani eno qhaike yeghi pesu azupuki qowukeu-a shipe nani.

¹⁹ Ino asayeqhalo Kedar subo ipeghi pe nani, akasia subo ngo murtel subo eno oliv subo ipeghi pe nani. Asaitsumokeu yeghilo ghasughave ipeghi nani, Ghasughave tipaulo asahubo, juniperbo eno kupra subo anani.

²⁰ Timino hipau jupuzu ithi nanike, ni AMPEU no hipau shipuanike. Israil Lhou akimtheuno hipau shipe puanikepi panonguno ithithaive nani.’

Alhou no Kichile lhouqo khuke

²¹ AMPEU, Israil Kukauno hipau piani: ‘Nongu ashiayeh lhouqo, nowu atsa kughakepu peighi julo. Atsa lakulupu jeli kumtsu sughijulo!

²² Hila ighilo eno kiu shive nani kela asheazushi pijulo, tishianguno kughono tishini keno ino ithinike. Kughakutha-alo wovekeulo kishive keno chixechilei pitsulo, eno tipaqo kiqiye kiu keno ivilo pilo.

²³ Ighinikeulo kiu shini chenikeno ivilo pilo tishiaye nonguye alhouqo kepi ino ithinike! Kiwala akivi shijulo momu kutsakungo keu sughijulo; Akumsa ngo apuchopungo keu pesu ivenhajulo!

²⁴ Nonguye kiumu kumoe eno nongu kumlaye kiumu kuhae; khunono nongu mlla cheni keno aphikumqhupuke!

²⁵ “Kipelau achekemi milakhi ino kishelu puani; Ahuu kudauno leighi penike ino pa saighi nani. Alikishiuno aghani qoda akeshi pano ayehkipemi aniba kumlhoshi qodae.

²⁶ Nongu khuuno hipau shini cheni kepi asheazushi pi, tishianguno nonguye achipi kepi ino pikepu shikya? Nongu milakhimu tipau vehu atsa lakhimu pimoe; nonguno pikeu timi milakhimu chimlake!

²⁷ Ni, AMPEU no atughushi Zion vilo hipa sutsa kithe pike; Ino Jerusalem lo aqemi lakhi puwuno ishi pipeke, ‘Nowu timiqo cheni! Panonguye akilo cheni!’

²⁸ Kughou ino alhouqo gholo jukelo, milakhimu kiumu pikepu lakhimu kuhaveke; milakhimu ino inijukeu khochilemla.

²⁹ Hi alhouqoye kumtsu adouke; panonguye kiumu shimlake, ajulho kimihi hipaqoye miqemilei eno akuka kuhake.”