ISAIAH 39 - BAIBEL (BSI)

Babilon lono Aghinikishimi

¹ Hipa ghulokilo, Babilon kukau Baladan nu Merodak Baladan no akukau Hezekiya kusu ghili chilu ikehu pano yekili lakhi eno agho lakhi pa lau tsupuwu.

² Hezekiya no aghini shi ighikemiqo akivishi sasu eno pawu kinikulu tipaqo sawo piye - pawu tsandiyi, shunayi, vekuju mukhu, vekutsungqui keu mukhu eno aghushi nanu kumtsu piyeke. Pekutsukilo akeu na momu pa kukaqhalo akeu pinamu panoqo piyemokeu-a lakhimu shimoe.

³ Tileno tungkupu Isaya no akukau Hezekiya lau wupuzu iniju, “Timi hipaqoye khilauno ighikemi eno panonguye ovilo kiu pikya?” Hezekiya no khochile, “Panonguye ala kushuwalo akeu Babilon ghakhu kudauno ighike.”

⁴ “Panonguye akukau kilo kiu piye kya?” “Panonguye thwokha kumtsu piyevae. Pekutsukilo ino panoqo piyemokeu kiumu kuhavae.”

⁵ Isaya no tileno akukau vilo pi, “Aqokitikhi MPEU tsa inilo.

⁶ Julo, aghuloki wocheni, ghulo lakhiye okighikilo akeu opuasu qono hipatsala kutolo pekutsu pe puatsukeqo kumtsu Babilon lo pusu wuve nani. Kiumu qhitsumove nani.

⁷ Olagha alimi kuchou khamiye tilau sawuve nani eno panoqoye pichih vetsu puzu Babilon kukau kilo aqemi shivepe nani.”

⁸ Akukau Hezekiya no pa kuxu tiviloye iquighayikeu eno sushokulu anani kepi vethaluve ikehu pano ishi khochile “AMPEU nono ivilo pivekeu huye aloke.”