ISAIAH 36 - BAIBEL (BSI)

Asiriyamino Jerusalem Shikichi

¹ Hezekiya no Juda lo akukau shikeu ampe chighi abidiulo, Asiriya kukatou Senakerib no Judia ghakhulo aliwo shipe puakeu phughiqo leighi eno tipaqo khasuluve.

² Tileno pano pawu kijemi atou vilo ahza tsukeuno paye aghukishimi aqo kije sasu Lakis lono Jerusalem lo wuno akukau Hezekiya vilo thwokha phesuve lopi khuwupeni keu shi. Ike kijemi atou huno aphi kibemi yeghiqha laghilo lashou zukikhe zula phivilo ngoluve.

³ Judiami mikuthuno pa sasu kushoniye ipeghi, tiye akukau-ki peithatsu chekeu kijemi Hilkiya nu Eliakim eno kughakutha alo akiyeu Shebna ngo yekithipua chekeu shou ampiu shighi kijemi shiakeu Asaf nu Joa ishi ke.

⁴ Asiriyami kijemi atou no panoqo vilo pikeuno akukau Hezekiya no amlo ithamono akeuye kiu shou bepe ani kela akukatouno ithinishi akeu tsa pi.

⁵ Pano ishi pi, “Nonguye atsa lono aghukishi kumto eno aghukishi muqu alo qhilu nani kughashi kumsu ani kesha? Khuuno nongu kuphu nani kepi kumsu puzu nonguye Asiriya hebide ani kya?

⁶ Ijip no nongu kuphu nani kepi laju ani, ikemu tiye alachekelo ayeghu kusu peithakeu kimihike, tiye icheve cheni eno tipau pechekeu u-qhuve cheni. Timi khunono Ijip kukau pukhubeni keno paye titoike.”

⁷ Asiriyami kijemi atouno highi pi, “Moaye nonguye AMPEU nongu Lhou pukhube ani kepi ivilo pinani kesha? AMPEU wu chinichekeu-a ngo akipti khacheqo tulavekeu huye Hezekiya no ke kumo kesha? Paye Judia ngo Jerusalem lo akemiqo vilo akipti khache lakhilo likhino mllalo pike kumo kesha?

⁸ Ino akukatou jelono nongu sasu kuptsa xathani ke. Nongu gholo khurshi shou ikuthikemi 2,000 aghi aye ino khurshi tijehi nongu tsunike.

⁹ Nonguye Asiriyami kijemi gholo aqhou qhejomu kumoe ikeghi kishi puzu Ijipmi no khurkulu ngo khurshimi nongu tsupuwu nani kepi laju ani kya?

¹⁰ Tilikhi kumono, ino noghakhu leighi puzu tipau kutsale akeuye AMPEU kukuphu sumono shiani kughashi nonguye kumsu ani kesha? AMPEU ampino tipau lewu eno kutsa velopi ivilo pike.”

¹¹ Tileno Eliakim ngo Shebna eno Joa pano kuthuno kijemi atou vilo pi, “Aramaik tsauno niputsalo, ninguye tipatsa ithi anike. Ibrimi tsauno pikevilo kughengu aliwo kuptulo timi kumtsu iniju akhanike.”

¹² Kijemi atouno ishi khochile, “Nonguno kumsukeuye akukatouye nongu eno akukau vilo likhi hipaqo pipeniye ipuwu kughashi kesha? Moe, niye timi aliwo kuptulo iqa akemiqo vilo ghi pianike, nongu toi panongu ghi pututa aba chupeni eno pututa pujo yepeni chenike.”

¹³ Tishieno kijemi atou no puthugho puzu Ibrimi tsauno ighamuku pi, “Asiriya lo akukatouno nongu vilo kiu piani keno inilo.

¹⁴ Pano nongu piputo ani ike Hezekiya pelo nongu pishiqhi pekevilo. Hezekiya ye nongu xamlake.

¹⁵ Pa pelo nongu zusasu AMPEU pukhube pekevilo. AMPEU ye nongu xalu nani kepi kumsu kevilo eno pano ni Asiriyami aghushimino nophughi leluve nikeu lono lakhave nani kepi kumsu kevilo.

¹⁶ Hezekiya tsa inikevilo! Asiriya lo akukatouno nongu vilo aphughi lono ipeghiveno thwokha kumtsu phesuvelo pi ahza tsuani. Nongu pelo notsayibo lono atsayithi xochulupe nani eno nowu khughuthibo lono khughuthi xolupe nani eno nozukikhe lono azu yepe nanike;

¹⁷ tiye akukatouno nongu sawo noyeghi toikeu alo kughunapemoke kutolo tishi aghipe nani; tilaghi atsayi ji shilukepu atsayilu akeu-alo eno asho shilu kepu athi ithulu kepu yeghilo nongu pelo kughunape nani.

¹⁸ Hezekiya pelo nongu shikughuzu pe AMPEU no nongu xaphelu nani kepi nongu pelo kumsupe kepu kumoe. Ashiayeh kutami khunoala pano lhouqono Asiriyami kukatou ulono pano ghakhu xaphelu apekesha?

¹⁹ Hamat ngo Arpad shiayeh qo lhouqoye itehiye khilavea kya? Separvaim shiayeh lhouqoye khilavea kya? Tipaqoye ni ulono Samaria xaphelu kesha?

²⁰ Kughou aghakhu hipaqo lhouqono ni ulono pano ghakhu xaphelu akya? Tishiaye kiuno nongu pelo AMPEU no Jerusalem xaphelu nani kepi kumsu anipe kya?”

²¹ Timiqoye akukau Hezekiya no panoqo vilo pipuakeu toi inaqhoive; eno atsa lakhimu kijemi atou khochilemove.

²² Tipathiu Eliakim ngo Shebna eno Joa pano kuthuye amlo ghime launo aphimini suxuve eno Asiriyami akijeuno kiu pikeno tipau pesu wupuzu akukau vilo pivetsu.