ISAIAH 35 - BAIBEL (BSI)

Akimthe Laghi

¹ Asayeqhano alokivishi nani eno timi kughunamoke-alo axamunu pu nani.

² Asayeqhano alokivi launo ighamuku alephe nani; tiye Libanon naghuto toi jukivi shinani eno Karmel ngo Sharon luqa toi aghuma anani. Milakhi khino AMPEU jukuvu ngo pa kuka kije ithulu nani.

³ Au qeyivekeqo shikumtolo eno miqemileikeu lono akhonhe kho khoive keqo shikumto tsulo.

⁴ Aghuthi suvekemi lakhikhi vilo pilo, “Akumto shilo eno musa kevilo! Alhou no nongu xaphelunike cheni, noghumiqo ghimeqhinike cheni.”

⁵ Anhethi kighichemino ithikulupu shi nani, eno akini kughupomino chilu nani!

⁶ Apukhu kinitave kemino ikaulu eno ilhelu nani, atsa piphemla kemino alovi igha nani.

⁷ Aghokiti zuno asayeqha vechesu qowu nani; asaye shukuthuyi keuye ayizu kucho shive nani, eno qhaike yeghiye azupuki auve nani. Khilehi sherqo achekeno asalebo ngo amuttu ipeghi nani.

⁸ Tilehi alaghila anani, tipau pesu, “Akimthe Laghi” ipi kunani; Axinemi khuumu tipala pulamo nani; aghuzunikhami namu tipalalo chekelo shipimimo nani.

⁹ Tilehi abongushu kuha nani; ayikusa lhoxu lakhimu tipala kathamo nani. AMPEU no khunoqo xapheluvea keno tipala pulasusu akilo izuwu nani.

¹⁰ Panonguno alokivishi Jerusalem tolu nani. Panonguye alhokupuju alokivishive nani, amlo ghime eno amlo ghuju lono alhokupujulo khaqhi pheve nani.