ISAIAH 30 - BAIBEL (BSI)

Ijip sasu Kulashikeu Adou

¹ AMPEU no piveake; “Khunoqono Juda lo ayehpe cheni keno ahaksapuke, kughengu panonguno ihebideke. Panonguno ino shimokeu kukughu papewu cheni eno axine lakhino lakhi shou heqabeghi panonguno ino pulosutsumo amu kulakishi shi acheni.

² Panonguye ikukumsu inijumo puzu akukuphu ghenguno Ijip lau wuke. Panonguye Ijip pelo panoqo susholu penishike ikehu Ijip kukau shou pukhuke.

³ Ikemu akukauye panoqo kuphukulupu kuka have nani eno Ijip no susho chekeuye kutsakungo keu lono kishekha nani.

⁴ Panoqo wu lashikamiye Ijip phughi Zoan ngo Hanes tove aghi pinamu

⁵ mutomokeu shiayeh khileno pukhu chekelapi Judamiye amlo sa nani; panonguno akukuphu laju akelauye panoqo phevekeu huno akukujopu shiayeh shi aghiveke.”

⁶ Hiye apeu asayeqhalo tughashi akeqo ghenguno Alhou sutsake: “Lashikamino akumsapu ghakhu kathawu eno khilehi abongushu acheni, khileno tughukupu pighi ngo yewukeu Dragon acheni keno tipa-alo wucheni. Panongu kuphumlakeu shiayeh lau agho tsunike ghenguno panonguno amekusho nhemgha pesu gadaha ngo kemel xapipe cheni.

⁷ Ijip no kuphukeu huye adouke, ikehu ino Ijip pesu ‘ghuzamlakeu Dragon’ ipi aje kupuatsu ake.”

Agholumokemi

⁸ Timiqoye kiutoikemi keno kaku lakhilo yepe qhilo pi Alhou no ivilo pike, tishianguno panonguye kiutoi alhoksa kela haumo kepushi yekithipe qhipeniyeke.

⁹ Panonguye pulhapuju Alhou hebide acheni, pulhapuju miki acheni, pulhapuju AMPEU kukutsu ininikeulo mopi acheni.

¹⁰ Panonguno tungkupumi vilo inaqhoivelo ipicheni. Panonguno ishi pi, “Nivilo khuno achipiu keno pikevilo nino kiu ininishi keno tipau nivilo pilo. Nipelo kuma kuma akepushi pitsulo.

¹¹ Nilaghi lono wuvelo eno nilaghi lakha kevilo. Ninguye nowu Israil Lhou akimtheu ghili chilunishi movae.”

¹² Ikemu hiye Israil Lhou akimtheuno ishi pikeuke: “Nonguye ino nongu vilo kiu pikeno phimoveke eno aka-agha vesukeu ngo pishikiqhi pukhuke.

¹³ Nonguye kuquke. Nonguye atu pesu qhemghai putupuakeu lakhilo kunguuno aqhou kutolo ipoipeghi akeu toike; zuleno nonguye iluqive nani.

¹⁴ Nonguye ayeghili toi kubopinyive nani, eno tiye ighono kubopinyive kehu alitsa lakhimu amibalu pelukepu qhemighi kuhave nani, momu azukikhe lono azu sholukepu qhemi kuhave nani.”

¹⁵ AMPEU Alhou, Israil Lhou akimtheuno timiqo vilo piani, “Ideghilo eno tsaqui shieno ipukhulo. Tishianguno nonguye mutotoi eno sushokulu anani.” Ikemu nonguno tishimopi milive!

¹⁶ Tishinike zuqhulo, nonguno khurshi kumthu shou ikupuzu noghumiqo launo kajo ipeveniaye kughuke. Nonguye koha pokeuno achipi shiniake! Taun khurshiye shishe muthu ani kepi nonguno kumsu ani, ikemu nongu hachekemi ye nongu nguno akumthuu shi nani!

¹⁷ Kughou nonguno aghumi ghushimi lakhi ithuluni keno nongu qhethonhe kutolono pove nani eno nongu kumtsu pelo koha povepe nike aghumi ghushimi pungu likhi lumkhake. Atoghilo amchiphi shopuakeu likhi thono nowu ghushimi lakhimu ghumove nani!

¹⁸ Ikeghi AMPEU ye nongu kimiyenike kheanike. Paye nongu shou amlo ighiqhiyinike kutope ani kughengu paye pulhapujulo kiuno achipi keno tipau shi achenike. Khunono AMPEU shou pukhube cheni keno tipanoye alokivipuke.

Alhou no Kumghatsuni

¹⁹ Nongu Jerusalem lo achekemiqoye mloqah kithemo nani. AMPEU ye kuchouno kupukiniuke eno kughou nonguno kuphulepi ighani keno pano nongu ghugha initsu nani.

²⁰ AMPEU no nongu pelo ado lhoksa sholupe nani ikemu pa ampino nongu shikanike tilehi anani eno nonguye pa phuwu kithemove nani.

²¹ Nonguno alaghi lono ajeu momu piyiu tsughu wuveaye nongu thikhau pa sutsa ishi pikeu chilu nani, “Ala hilake, hila che chelo!”

²² Nongu tsandiyino ajulho shikeu ngo shunayi pesu ajulho kuzukeu ikhipesu tubatuzu toi ishi pi-ghi vepuwu peve nani, “Chevelo!”

²³ Kugho kughomu nonguno apiti yisu kelo AMPEU no tsutsughu puwutsu nani eno tipaqo pelo thuwu pe nani tishianguno kinikulushi ghile hulupe nani eno nongu mishiqono muzakepu lukumkhashi alupe nani.

²⁴ Nongu luqa holechekeu mishitsu ngo gadahaqo achuqupu aghile eno akiviu chulu nani.

²⁵ Kughou noghumiqo liwo khasuluve eno tile akemiqo pithiveke tsala lono naghuto ngo atoghi kumtsu lono aghokiti zu qowu nani.

²⁶ Aqhino tsukinhe toi vuqaleive nani eno tsukinheno puzuu nguno ghuthu tsuni vuqalei kitheve nani, tiye ghulo tsuni kuvu ghulo lakhi lono ipeghikeu toive nani. Hipaqoye kughou AMPEU no pawu timiqo ghuzavekeu khavetsuno shipivini keno tileno hi kumtsu shinani.

Alhou no Asiriya Ghimeni

²⁷ AMPEU kuka ngo akimthe jukuvuye putouno ithuluve nani. Ami ngo amichhino pa loghu piye cheni. Pano pikeulo pa tsano ami toi iquke.

²⁸ Azukuqono thwokha kumtsu yipewu ke toi pano pa zulo amlhu puwu cheni. Tino ashiayehqo josasu kutsakungopu shicheni eno panonguno alhoksa kughupe akeu kishekhave tsucheni.

²⁹ Ikemu nongu, Alhou wu timiqoye nonguno akimthe ghulhu jilo shicheketoi alokivishive nani eno alephe nani. Nonguye Israil sushokuluu, AMPEU Achine kilo xuchekelo fulili ghugha kiqi lono alache chekemiqo toi alokivishi nani.

³⁰ AMPEU no timi lakhikhi pelo pa sutsa kumgha chilu pe eno pa loghu kighide ithipe nani. Tilehi pitimulakeu mi kuyiqu, tsuqhutsughukeu, pasapagha eno muraqi nani.

³¹ Kughono Asiriyami qono AMPEU sutsa chilu eno pano aghime tsukeu kimshi ithinikeno panonguye thughuive nani.

³² AMPEU no panoqo anguno anguno ghaqhi akelo paw timiqono turtur lebo ngo akighi lebo pesu qhaqha ighakumtsa anani. Alhou ampino Asiriyami sasu aghushi nani.

³³ Asiriya lo akukatou ami lono piti kepushi kha-ghino a-a lakhi kutope auvae. A-a tipauye thonhei eno kijeke eno asu ghekisheqhe puani. Tipaulo ami sunike AMPEU no ami kuyiqu amuqo lakhi fupuwu nani.