ISAIAH 28 - BAIBEL (BSI)

Ahuu Kukaqha Kutughu

¹ Israil kukaqhaye ahakusapuke! Tipaulo sakiphemi shomzupu akemiqo kutsulo axamununo akutsukuqho shipu aketoi tipau jekipiye idem-muyive nani. Panongu qhekuzapu kutsulo axokutsungu supu aghiluvi ikemu panonguye shomzu cheive no ihozu anike.

² AMPEU no timi khami pelo panoqo leighi peniaye akumtomi eno akuka akemi kuto ani, khunokela tipauye pasapaghalo murasu qikeutoi ighi nani, tsutsughu zale ketoi, atshunazu toi ayeghi yimve nani.

³ Shokumzumi sakiphemi hupaqo qhekuzaye apukhuno qodave nani.

⁴ Aqhekuzami sakiphemi hupaqo jekipi idem-muyiveniye akeu huye khughuthi pithi tughiu niveke mtsa xopesu papashi chuluveke toi nani.

⁵ Tipa tsalalo Aqokitikhi MPEU ye pawu timi ghupe puaghikeqo ghenguno axamunu jukivi pesu akimthe jekipi kutsukuqho lakhi toi shive nani.

⁶ Khunoqono kughakuthami shini keno pano amikucho xakutha kukumsu tsu nani eno aphughi liwo kikha leighi kelo tipau mujochile akemi lau amlo kuloghi pesu tsu nani.

Isaya eno Judia lo Shomzu Tungkupmi

⁷ Tungkupmi ngo achinemi ghi shishe shomzuve kehu panonguye kulokuloyike. Panonguno atsayiji ngo aji kumka shishe shove kehu panonguye izuvulai puzu kupuxa kupunaike. Tungkupmiye shomzuve kehu Alhou no kungunhetsu puwukeu ithikuthu mlave eno achinemiye shomzuve kehu atsa kughathatsu peniye sughikeulo kupuxakupunai auveke.

⁸ Panonguno ngoakeu akibepu kumtsu mughule puku keuno chhitoive eno a-a lakhimu niqhunighulai mokeu kuhave.

⁹ Panonguno ishou muchho ghi pike, “Timi hupauye paye khuu kutsupiye anikepi kumsu ani kya? Khuno pa sutsa avehupu shi ani kya? Hiye anga anileshi khoveno akeqo ghengu likhino aloke!

¹⁰ Paye lakhi khi, ajo lakhi khi eno akiphi do lakhikhino ningu shikaniye pukaputsaju anike.”

¹¹ Nonguno itsa initsumo aye inaghami pakutakeu tsa pichekemi Alhou no peitha puzu nongu putsa nani.

¹² Pano alokughuno eno akulho kiqhipu pesu nongu kumtsu lau tsuke ikemu nonguno pa gholuni keu milive ani.

¹³ Ikehu AMPEU ye akiyethi lakhikhi, ajo lakhikhi akiphido lakhikhino nongu shikani cheni. Tileno nonguno apukhu pukawukeu kumtsulo kupuxalu nani. Nongu ghuzave nani, khasuluve eno akughushi sawuve nani.

Zion lo Achekeu Tuqu

¹⁴ Itehi nongu Jerusalem lo akuchhomashi timi hipaqo shou ayehpe chekemiqo, AMPEU no kiu piani keno inijulo.

¹⁵ Nonguno akithi sasu kuptsape qhiveapi eno akithi yeghi sasu pulokilepe qhive akepi qheza acheni. Kutsakungo ighikelo nongu phepuwuve nani kepi mutsuqhei shipe acheni kughengu nonguno nongu xalu apenike akimki eno kichileu pukhu acheni.

¹⁶ Tighenguno AMPEU Alhou no ishi piani: “Zion lo tsatsayi keu eno akumto boqha lakhi ino qhi ani. Tipaulo akicheku tuqu lakhi ino qhi ani eno tipau shou atsa ishi yepuku puani, ‘Mutotoikeu kupuluye lhelheimo nani.’

¹⁷ Achipiu xakuthano aboqha mighikeu kighi shi nani eno amikuchono tipau jokumtsakeu kighi shi nani.” Murasu ngo pasapaghano nonguno akimki pukhupe achekeu jole sawuve nani eno atsuhnazu nonguno kusuqhope akeu yipewuve nani.

¹⁸ Nonguno akithi sasu kuputsape akeu xave nani eno nonguno akithi yeghi sasu pulokilepe qhipuakeu ikhive nani. Kughou kutsakungokeuno jole iqighini keno nongu haluve nani.

¹⁹ Tipauno anguno anguno, ina-atsutsu nongu ghaqhi nani eno nonguye putho pucho tipau puqhe amasa nani. Alhou launo asutsa kithe ighikeulo akuighupu akithe sughi nani!

²⁰ Aholetsa lakhilo timi lakhino zuniye kelauye azua kughukho ghenguno chhomla eno aphino mughulo kehu pa nhawotomoke, ike nonguye tipaphi shive nani.

²¹ AMPEU ye Perazim Toghilo shikeshi eno Gibeon khilalo axuide keshi pano aghu shinani, pano shiniaye kiu kumsupu anikeno tipau shikupuniyeke, pano shiche keuye akumzaqhiyi kepuke! Pano pa kumla shikhave nani, pa kumla ye tuqho tugho kumzapuke.

²² Ino nongu piputo akeulo nukevilo! Nonguno tishi aye, nongu ghenguno pokulupu ighono shove nani. Aqokitikhi MPEU no aghakhu kumtsu kutsavenikeu shi kughathave keu ino chiluvae.

Alhou Lokutsu

²³ Ino kiu piani keno inijulo; ino nongu vilo piakeu tsaqu tsaleyi inilo.

²⁴ Alukichimi khunomu axa yisunike ghenguno pulhapuju ayeghi holekeu likhi hole auve chemoe; paye pulhapuju alu ghu-auve chenikesha?

²⁵ Pano ateni shiveno ayeghi kutove kethiuye ayetsuni piti, napa lothi ngo pulakhu lothi pesu yisu cheni eno ashothi ngo akithi pesu ajoshi yisu cheni eno aluphelo axapiti kutau yisu cheni.

²⁶ Paye pa kumla kishi shikepu keno ithi ani kughengu Alhou no pa shikapiyeke.

²⁷ Paye khilemu asuthalu pesu napa lothi momu pulakhu lothi qophe chemoe; ikemu tipau lothi qhemi lono asuta kumthu peitha cheni.

²⁸ Paye tamomitheno asho thi qophe apuzu tipau shipusavekepu shichemoe; pano pawu khurkulu tipaqo shou ilusawu kelo athi hephomo kepu shi sawu cheni.

²⁹ Alokutsu hipaqo kumtsu Aqokitikhi MPEU launo ighike. Alhou no kughu keqoye alokutsuke eno tipaqoye alhokuthu tolu cheni!