ISAIAH 27 - BAIBEL (BSI)

¹ Tipa tsalalo AMPEU no pa zutakihi akuka akeu eno akithipu akeu pesu ihoghulai itikicheu Dragon ghimeqhi nani eno Aghahwu azughilo achekeu ghiqhi nani.

² Tipa tsalalo AMPEU no pa tsayilu aghileu pesu ishi pinani,

³ “Ino tamono hipau jukuto eno azu suacheni. Ino putho pucho hipau khekuto acheni, tishianguno khunomu hipau shipusa pemoniyeke.

⁴ Niye atsayilu lau aloghu ide chemovae. Asahu ngo aghusahu sasu aghushi kepushi tile likhino ino tipaqo qhoi pitivenike.

⁵ Ikemu iwu timiqo ghumino ipelo sushope nishi aye panoqoye isasu kulashilu pelo.”

⁶ Ighinikeu tsalalo, Israil lo akemi, Jakob lagha qoye asubo lakhi toi akuhu qusu nani eno panonguye mini puzu apishe ipeghi nani. Panonguno axathi pithikeuno ayeghi nhakhaluve nani.

⁷ AMPEU no Israil ghumiqo aghime kitikhi tsukeu toi Israil ghimeqhi mphike, momu liye tipaqo jehi timi puha mphike.

⁸ AMPEU no pawu timiqo halevekeulo wuvepekeu pesu panoqo ghimeqhike. Pano kipelauno amlhu yikusa pelono panoqo pewuve peke.

⁹ Ikemu kughono Alhou kumthamino mllachekeu khache tuquqo amukhu shiveni keno eno tsungqui keu kipiti khache kuhave eno alholiu Ashera julho kuhave kethiu likhino Israilmi xineqo pevetsu kepu shi nani.

¹⁰ Aliwo shipepuakeu phughiye ixapiniyi ani. Hiye timi kughunamove keu-a toi qhivae. Hiye amshino akulhoqhi puzu achukumza qha shiauvae.

¹¹ Asubo lokaqoye thizumuivae eno icheuvae eno totimino sukughupusu shiniye tipaqo ghelu anike. Timiqono kiumu vethamlake ghenguno Alhou panoqo lhoqhikeuye panoqo jupe amlosani chemo momu amlo ighiqhiyini chemoe.

¹² Tipa tsalalo, timino am-u gholono athicho kututa shive akeshi, Eufrati ghoki lono Ijipmi lughi kutolo AMPEU no pawu timi lakhi khino hekutsukumqo nani.

¹³ Tipa tsalalo, Asiriya lo ngo Ijip lo Israilmi khije halepuwu puakhani keno tipaqo kuchilekeu shi ghi afuko lakhi kuyigha nani. Panonguno ighino Jerusalem lo, pa kimthe toghilo AMPEU mlla nani.