ISAIAH 26 - BAIBEL (BSI)

Alhou no Theqhikulu tsu

¹ Tipa tsalalo Juda ghakhulo Timiqono ale hipau phe nani: Niphughiye mutotoike! Alhou ampino tipau putu puakeu sushoke!

² Aphughi khagho khaqhilo eno khipau shiayeh no achipiu shiacheni keno ti amikucho shiayeh pelo ilopelo.

³ Khunoqono oshou kumsupuku acheni eno opukhupe acheni keno, no, AMPEU no alokiqi kuchou tsuke.

⁴ Alhokupujulo AMPEU pukhu chelo; pano pulhapuju nisusholu nanike.

⁵ Khunono qhezakeno pano hedave cheni, panonguno kughuna aghikeu akumto phughi pano kutsavetsu, eno tipau putupuakeu ayeghilo kuluqhiveno ayeghi mukhulo hedavetsu.

⁶ Qodaneda puachekeqono itehiye tipa shouno chewu anike, eno tiye pano pukhuno qoda ani.

⁷ AMPEU, timi kivimi ghenguno nono alaghi muduniyi shi tsuke; panongu laghiye ghuphiyike.

⁸ Ninguno opulou pape eno oshou niwu lajupu beke; Noye nino minemigheyi chekeu ke.

⁹ Putholo imlo kuchopu ohuqhe acheni; kughou nono ayeghi ngo tile akeu shou kughathabeni keno; Panongu kumtsuno achipiu xakuthaye kiukeno ithi nani.

¹⁰ Noye timi kixikilami kupu anamu, panonguye achipiu kiukeno khilemu ithi chemoe. Hi amikuchomi akeu yeghilo thotsu panonguye akumou shi acheni; panonguno okuloghi ithulu chemoe.

¹¹ Noye panongu ghimeqhi nani kepi aghumiqoye mthake. AMPEU, panoqo shikukujolo eno panoqo pelo aghime sholu pelo; nono aghimepu kutopuakeu panoqo pelo iniju pelo. Noye kiutoi owu timiqo kimiye cheni keno panoqo piyejulo.

¹² AMPEU, nono kinikulu ningu tsu nani; ninguno shiqhilukeu kumtsu nono shiakeuke.

¹³ AMPEU, niLhou, kutamino nishou ayehpeke, ikemu olikhino ni MPEU ke.

¹⁴ Itehi panoqoye thivae eno xulumoae; panoqo ghahwuye idethughimoa, Kughengu nono panoqo ghimeqhi eno kutsaqhike. Khunomu panoqo kumsulumoake.

¹⁵ AMPEU, nono nishiayeh thuwulupeke, aqha kumtsu kudau alughi pekho tsuke, eno hipauno ogigihupu sughipeke.

¹⁶ Nono owu timiqo ghimeqhike, O AMPEU, eno panonguno amlo kughutashi ovilo khuinike.

¹⁷ No, AMPEU no ningu pelo totimino apunu kusu suakeshi aghime launo igha peke.

¹⁸ Ninguye sakutui ake eno amlo kughuta shi ake, ikemu ninguye kiumu punuqhimoe, Ninguye nighakhu ghenguno tokuluu kiumu shilu puamoe; ninguye kiumu shiqhilu puamoe.

¹⁹ Niwu timi khunoqo thivea keno itaghi xulu nani! Panongu phimpiye akuxulo ideghi nani. Akumolo zuakemiqo kumtsuno idathughi nani eno alokivishi alephe nani. Atsuzu phuphuyi keuno ayeghi vepuxutsu keshi, khunoqo kha-ghino thive keno tipaqo AMPEU no xukithetsu nani.

Kughakutha ngo Sachilesaghi

²⁰ “Iwu timiqo, nongu kilo ilove puzu nongu hukikha khavelo. Alhou loghu tavemoke kutolo ado kitila ghenguno itshu aghilo.

²¹ AMPEU ye ayeghilo akemiqo shou pano xine ghenguno ghimeqhinike pano ngochekeu kungugha lono cheni. Ayeghilo kusuuno timi ghiqhikeqo hu ashou pephe nani, eno khunoqo ghiqhi puani keno ayeghino kusupuamlove nani.”