ISAIAH 24 - BAIBEL (BSI)

AMPEU no ayeghi Ghimeqhini

¹ AMPEU no ayeghi hepho pinyiveni cheni eno kughukughalei qhive nani. Pano ayeghi gi suchighi nani eno tipaulo timiqo kutholeve nani.

² Achinemiqo, aquaxemi ngo ampemi, akuqhumi ngo jechekemi, punakemi ngo nalukemi, kinimi ngo kumlhomi kumtsuno shipeniye kuto puakeu aphiphishi sasu kushoni cheni.

³ Ayeghi kubokighinyive eno ixapinyive nani. AMPEU no pipuani eno tiye tishive nani.

⁴ Ayeghi qhaive eno kimghoive; ayeghi kumtsu miqemileive; ayeghi ngo atsutsu kuma ye tsumauve.

⁵ Timiqono Alhou yehqo hebidevekeu lono eno pano puloshoqhi alhokupuju achepe nikeu hepusakeu lono ayeghi kitiqeveke.

⁶ Ikehu Alhou no ayeghi shou musuini pukuveke ghenguno timiqoye panono mlavekeu lochile anike. Timi aghuloshi likhi xuauve cheni.

⁷ Atsayibono ighuive eno atsayiji ithulunikeu mikhelove ani. Puzuu alokivishi chekemino itehiye amlokusa shiani,

⁸ panoqo kighilebo ngo tur tur lebolo kumzu kivi hauvae.

⁹ Atsayiji pesu alokivishi ale phechekeu kiumu kuhavae; khunomu tipau micheju chemovae.

¹⁰ Aphughilo thwokha kumtsu kupuna kupughai ani eno timiqoye pano kuxu pukhaniaye aki alou khatha ilove.

¹¹ Timiqoye alaghilalo mubumughu igha ani, tiye atsayiji kuhaveke ghengunoke. Alokiviye alhokupuju ghenguno hauve, tiye ayeghi lono hapupoveke.

¹² Aphughiye ixapinyi ani eno tipau liwo kikhaye ipopinyivae.

¹³ Hiye ayeghiqha kumtsulo eno ashiayeh lakhikhi lau kiu shiniye ani keno tipauke. Hiye ghile hukeu ashekha shivekelo oliv lothiqo tipasubo lakhikhi lono sukini qhiluve eno atsayibolo atsayithi ashekhau kutolo xoluveke toive nani.

¹⁴ Khunoqo kuxu ghupe puaghini keno tipaqono alovi alephe nani. Kulolau akeqono AMPEU ye kiutoi kije keno pinani,

¹⁵ kipelaumino pa sheqhe nani. Azughi kighijelo achekemino AMPEU, Israil Lhou sheqhe nani.

¹⁶ Ayeghi shekha kudau akemino amikucho shiayeh Israil shipilikeu le ninguno chilu nani. Ikemu ighenguye lajupu kuhae! Niye tsu-hau wochea! Kughengu axiqhi ghumino ijechu auvae, panoqo muqu lhoksaye vimokithe auvae.

¹⁷ Kumtsu ghano inijulo! Akuighupu, aqoh kuchhu eno alichheno nongu kheani.

¹⁸ Khualano akuighupu sutsa launo poluve namu aqoh kuchhulo ilulove nani, khualano aqoh kuchhu launo poluvenamu alichhe lono meluve nani. Atsutsu lono tsuqhu tsughu nani eno ayeghi boqha ithauve nani.

¹⁹ Ayeghi ipoixu ipopinyi eno ipaipeghi nani.

²⁰ Ayeghi ampino shokumzumi lakhi toi kulokuloyi nani eno pasapagha ighikelo apusho lakhi hutoi nanayi nani. Ayeghiqhaye tipau xine qono tshu nanaiveke; tiye ilaiqive nani eno khilemu ideithughimo nani.

²¹ Tipa tsala ighikelo AMPEU no atsutsulo akeu jeli aqokitikhi kumtsu eno ayeghilo ayehkipemi kumtsu ghimeqhi nani.

²² Panoqo ghimeqhi kepu ghuloki ighimoke kutolo panonguye aqoh kuchhulo akughumi hekutsu kumqo ke toi Alhou no panoqo hakumqo nani. Panoqoye Alhou no akughukilo khathave nani.

²³ Aqhino zumoyi kitheve nani, tsukinheno yepuvu tsumove nani, kughengu Aqokitikhi MPEU no Akukau shive nani. Pano Jerusalem lo Zion toghi lono ayehpe nani eno ayeghilo timiqo sakiphemino pa kimthe jukuvu ithulu nani.