ISAIAH 22 - BAIBEL (BSI)

Jerusalem ghenguno Atsape

¹ Hiye Kungunhetsu Khila ghenguno atsape lakhike. Kiu shivepi ani kya? Kushiye aphughilo timiqoye kumtsuno aki kutsuqa lono ahukulu shi alovi akhani kya?

² Aphughi kumtsu muqhumza keuno chhitoi ani. Nowu timi hipau ghushi lono thikeqoye aghushi akelono thike kumoe.

³ Nowu sakiphemi kumtsu koha poveke eno panonguno apiji lakhi likhimu kapuwu mphi lono kugha lukhaveke.

⁴ Itehiye ilikhi qhivelo eno ipelo niwu timi khunoqo thivekeno tipaqo ghenguno kukhukimji shi qalu pelo. Ilokughuno tsunikeu kumsu kevilo.

⁵ Hiye Kungunhetsu Khilalo izuvuvui, halevekeu eno kubangvekeu ghulokike eno AMPEU aqokitikhi Lhou no ningu lau hipau puwutsu anike. Ni phughi bokuthaye kubopiniyivae eno atoghi kumtsu kuphulo pikeu ghughano vekuvava ani.

⁶ Elam yeghi lono ghushimino asuzu ngo apiji peno khurshi shou ikuno chekhani. Kir yeghilo ghushimino panoqo zuto kutopesu ani.

⁷ Juda yeghi aghuma khilaye aghushi khurkuluno nhakhape ani; ghushimino khurshi shou iku puzu Jerusalem Khagho zulo puthughope ani.

⁸ Juda lo mujochilekepu jeli kumtsu ixapinyivae. Kughou ti shiuveni keno nonguno kikepuakeu kilo aghu nanu juwu

⁹ eno nonguno Jerusalem bokuthabo kutomolo ipoveno shikithe kepu shi ithulu nani.

¹⁰ Nonguno Jerusalem lo aki kumtsu kihijuwo eno tipaqo hami hephove eno aphughi bokuthabo ipovekeu shikitheniye atuqo suwuke. Azu pekikenike ghenguno

¹¹ nonguno azukikhe aqau lono azu poiqighi akeulo, aphughi alouno khepuchokeu zukikhe lakhi chhuke. Ikemu nonguye Alhou khuuno hipaqo kumtsu kha-ghino kughuve keu eno khuuno hi shianipe keno pa lau amlo tsukeu kuhake.

¹² Tishiaye AMPEU Aqokitikhi Lhou ye nongu pelo qamlo eno anhezu piji penike eno nongu kutsusa miyeveno yeqhiyephi upenike nongu kuanike.

¹³ Tishinike zuqhu nongu ye nuauve eno ahukulu lokivi shiauve. Nonguno chuniaye bheri ngo amshi heqhi eno nonguno aji sho auve. Nonguno ishi pike, “Ninguye chu sho ani nolo kughengu thiniake.”

¹⁴ Aqokitikhi MPEU Alhou ampino iputsa eno ishi pike, “Panonguno xuake thaqhulo hipau xine lhoksaye khilemu pevetsumo nani. Ni, Aqokitikhi MPEU Alhou no pive anike.”

Shebna Kutughu

¹⁵ Alhou Aqokitikhi MPEU no iputsa eno akukauno kibo peithakutsuu Shebna lau wupuzu pa vilo ishi pilo pike,

¹⁶ “Noye khuu kepi kumsu ani kya? Noye kishipuzu osala naghuto kighijelo atuxu akeulo akumoki yethape qhikepu akuzupu shilu kya?

¹⁷ Noye akhotomi shiaghiluvi ikemu AMPEU no no-khipe vepuwuve nani.

¹⁸ Pano bol lakhi toi no ikhi pesu aghakhu kutau kije lakhilo vepuwuve nani. Noye tilauno khurkulu jupe qheza achekeu phivilono thi nani. Noye ompiu no kibo ghenguno kujomuza kepu lakhike.

¹⁹ AMPEU no nono pe-akeu hiyam lono no ikhive nani eno a-a kuchuqu lono osunheqhive nani.”

²⁰ AMPEU no Shebna vilo ishi pike, “Kughono tipau shini keno ino iqeu Hilkiya nu Eliakim kuwupe nani.

²¹ Nono hiyam lo pepu chekeu phikuzu ngo apokha pesu pa pipe nani eno nono pechekeu agha kumtsu pa tsu nani. Paye Jerusalem apuh lakhi toi shivepe nani.

²² Ino pa pelo David laghami akukau qholo agha kipeu shipeni. Pano hiyam khadu pe nani; pano kiu khaqhi keno khunomu khavemla nani eno pano kiu khavenikeno khunomu khaqhimla nani.

²³ Ino pa pesu ayishu lakhi toi a-a lakhilo yesupe qhive nani eno pano kibo kumtsu pa ghenguno gihukepu shive nani.

²⁴ “Ikemu pano sholokumi ngo pa pukhu pe xuchekemi qoye pa ghenguno ape lakhi shive nani. Panonguye ayishulo ali ngo akhuqo pufupe akeshi pa tshukumghuluve nani.

²⁵ Kughono ti shini keno, ayishu tsatsayi yesu puakeu huye ijove eno ikiqive nani. Tipaulo tshukumghupe akeu thwokha kumtsu kishekhave nani.” AMPEU no pianike.