ISAIAH 21 - BAIBEL (BSI)

Babilon Ikiqikeu Kungunhetsu

¹ Hiye Babilon ghenguno atsape lakhike. Miyitsutsuno asayeqhalo jole ighi keshi akuighupu ghakhu kudauno kutsa kungo keu ighi nani.

² Ayikusapu shiwoni keu kungunhetsu lakhi ino ithuluke, tiye jechukileni keu eno hexapiniyini keu kungunhetsu lakhi ke. Elam ghushimiqo halewulo! Mediyami ghushimiqo, aphughi bothano khathasululo! Babilon no aghime tsuche keu Alhou no kishekhave tsuni cheni.

³ Kungunhetsu lono ino ithulu eno chilu keuno akuighupu eno sakutui keuno ichhitoivae, hiye totimi lakhino punu niaye su akeu kusu toike.

⁴ Ikutsu hevulalai ani eno niye akumsano khokhoshi ani. Niye kijiliu shivepe nishi kutu ake ikemu tino kiumu sughimo puzu akuighupu likhike.

⁵ Kungunhetsu lono aghulhu kije lakhi kutope a; inami iqa kepu aphi kishino qhapua. Panonguye chu shoa. Zuleno ahzakutsu kuigha: “Kijemiqo! Nongu zuto kutolo!”

⁶ Tileno AMPEU no ivilo pi, “Wulo eno aghukheu lakhi qhino pano kiu ithulu keno pewo pipelo.

⁷ Pano juakelo timino khurshi shou ikupuzu ajo kinini shi cheghi eno timino gadaha ngo kemel shou ikupuzu cheghi aye paye akivi shi jukutolo pilo.”

⁸ Aghukheuno ighaghi pi, “Akijeu niye ighukhealo putho pucho puthughope kheake.”

⁹ Zuleno panongu cheghive! Timino khurshi shou iku puzu ajo kinini shi. Aghukheuno asutsa pipuwu “Babilon ikiqivae! Panonguno ajulho mllachekeu kumtsu ayeghi shou kubo kighiniyi ikiqivae.”

¹⁰ Iwu timi Israil, nonguye athi toi qolevae, ikemu itehiye niye asutsa kithe nongu lau pikulha ani tiye Aqokitikhi MPEU, Israil Lhou launo ino chilukeuke.

Edom ghenguno Atsape

¹¹ Hiye Edom ghenguno atsape lakhike. Milakhino Edom lono iku puzu pike, “Aghukheu, kughono putho tsala pai wove nani kya? Kughouno pai hipau taveni cheni keno ivilo pilo.”

¹² Ino khochile, “Inaqhe cheni ikemu putho ghi ighini aphi. Nono inijukide nishi aye itaghi ideghi puzu inijulo.”

Arabia ghenguno Atsape

¹³ Hiye Arabia ghenguno atsape lakhike. Nongu Dedanmiqo, nongu aloji shipuzu Arabia ghakhulo ngoche kemiqo,

¹⁴ Nongu lau tughuthi ighikemi azu piyelo.

¹⁵ Timiqoye azutakihino panoqo ghiqhiveniye, apijino panoqo veqhiveniye kutope akeu lono eno aghukishi kumsapu kumtsu launo povenike kohache khani.

¹⁶ Tileno AMPEU no ivilo pi, “Loi ampe lakhi lono Kedar shiayehqono kije shiachekeu lono kishekhave nani.

¹⁷ Kedar lo asuzu pekithimiye amlo kivimiqoke ikemu panoqo gholo aghulo likhi qhiveni cheni. Ni, AMPEU, Israil Lhou no pi tsu anike.”