ISAIAH 19 - BAIBEL (BSI)

Alhou no Ijip Ghimeqhini

¹ Hiye Ijip ghenguno atsape lakhike. AMPEU ye khungkusu shou iku puzu muthuthei Ijip kudauno cheni. Ijip lo ajulho akeqoye pa zulo khokhoshi ani eno Ijip lo akemiqoye amlo kuloghi hauveno ani.

² AMPEU no pi, “Ino Ijip ghakhumi dolo aghukishi xukutho nani eno athikuzuuno athiukuzuu sasu eno akitomino akitomi sasu, aphughi lakhino lakhi sasu, akukaqha lakhino lakhi sasu aghushi nani.

³ “Ino Ijipmino kughupe akeu hexavetsu nani eno panoqo ghuthi pusuvetsu nani. Panonguno ajulho shisu puakeu vilo kuphulepi iniju nani, tumumi vilo iniju eno kithimi ghungu putsau nani.

⁴ Ino Ijipmi pesu ayikusami ulo suvetsu nani eno ayikusa kukami lakhi ulo suveno panoqo shou ayehpe pe nani. Ni, Aqokitikhi MPEU no pi anike.”

⁵ Nayil ghokizu hailove nani eno aghokiye asheshino qhaive nani.

⁶ Tipaulo azulaqoye muthu munashuyive nani eno tipau ghokitiqo ye qhaive nani. Amtubo ngo asaleboye ighuive nani,

⁷ eno Nayil mukulo aluchi chekeqhaye qhai ayeghimukhu ilhoveno amlhuno fusasu wuve nani.

⁸ Nayil lo akha kukha lono apoqechu che kemiqoye ighamuku qa nani; panoqo khakumsupuyi ngo akhameqoye adou shive nani.

⁹ Khunoqono mudunikeu phi mlache nikeno avekusa shive nani;

¹⁰ aghi ghokemi ngo shitsashi akumla shiche kemiqoye akuxu itaququive nani eno thibuyi nani.

¹¹ Zoan lo sakiphemi ye kughuzumiqo ke! Ijip lo kumtsu nguno alokutsumino aghuzu nikha kukumsu pesu tsucheni! Panonguye ighumono kishi puzu akukau vilo panonguye khaghilo kighithimi eno kukamiqo nuli kepi picheni kya?

¹² Ijip kukau, owu muqukini akukumsu otsuchekeqoye khile ani kya? Timthauno panonguno ovilo Aqokitikhi MPEU no Ijip ghenguno kughuchho puakeu pilu nani keni ake.

¹³ Zoan ngo Memfi lo sakiphemiye kughuzumi ke. Panonguye pano shiayeh saphe kepu kelauye tipaqo saphe pusa anike.

¹⁴ AMPEU no panoqo pelo kubang keu kukumsu tsu anipe ke. Ikehu Ijip ye thwokha kumtsu akumou shi ani eno shokumzumi lakhino pano mughule keu nekiphelu akeshi ani.

¹⁵ Ijip lo kinimi kumlhomi, akhotomi, kutamino mthakemi pinamu, khunomu kuphutsuluni chemoe.

Ijip no AMPEU mlla nani.

¹⁶ Tipa tsala loye Ijipmi ye totimi toi kujokighiyi nani. Kughou AMPEU no panoqo ghimeni ke pa-u chhopuwo keu ithuluni keno panonguye thughuyi kelauno msakhokhoi nani.

¹⁷ Juda yeghino Ijipmi shikichiqhi kepu shi nani; Aqokitikhi MPEU no panoqo shou shiniaye kumsupu akeu pike kumtsulo musa nani.

¹⁸ Tipa tsala ighi kelo, Ijipmi phughi pungulo Ibrimi tsauno kuptsa nani. Timiqoye Aqokitikhi MPEU jelono ashoqhi lu nani. Aphughi tipaqo gholo lakhiye “Tsukinhe Phughi” ipi ku nani.

¹⁹ Tipa tsala ighi kelo, Ijip yeghilo AMPEU lau akipti khache lakhi anani eno Ijip lughilo atuno shikeu tsukucho lakhi AMPEU lau ikhiphe tsu nani.

²⁰ Tipaqoye Ijip lo Aqokitikhi MPEU akeu michipu shi nani. Kughono timi tilau akeqo qa qhini eno AMPEU vilo kuphutsu peniye ighamukuni keno pano panoqo xaphelu kepu timi lakhi puwu nani.

²¹ AMPEU ampi no Ijip lo akemi lau pephepiye nani eno tileno panonguno pa ikhilu eno pa mlla nani eno pa lau lhoxu heqhi eno akumllagho peighi nani. Panonguno amlo tsuqhiyi keu shoqhi shi nani eno piqhive keu toi shikupu nani.

²² AMPEU no Ijipmi ghimeqhi nani, ikemu pano panoqo shipivive nani. Panonguno pa lau ideighi nani eno pano panoqo kighini initsuno panoqo shipivi nani.

²³ Kughou tipa tsala ighini keno Ijipmi ngo Asiriyami dolo alaghila auve nani. Ayeghi hikumalo akemiqono pano dolo izu iqho iqi nani eno ashiayeh hikumaye kumtsano mlla nani.

²⁴ Kughono tipa tsala ighini keno, Israil ye Ijip ngo Asiriya sasu aqhejo shi nani eno hipano kuthu shiayeh ye ayeghiqha kumtsu kumghapu shi nani.

²⁵ Aqokitikhi MPEU no panoqo kumghatsu nani eno ishi pi nani, “Iwu Ijipmiqo, no Asiriya ino lhokeu eno no, Israil, ino kisheluve keu timiqo, ino nongu kumghatsuni.”