ISAIAH 18 - BAIBEL (BSI)

Alhou no Sudan Ghime nani

¹ Sudan ghokiqo nguno hukudau ayeghi lakhi anike tilauno achishibo kukhukeu sutsa chilu.

² Ayeghi tikudauno amutubo shukalo ikupuzu Nayil ghoki basusu lashikami iqi cheni. Idewovelo, aghinikishimi akumthumiqo! Aghokiqono noyeghi kothapuakeqo lau eno nongu chuqumughai kemi eno ayiko hipuleyi kemi, ayeghiqhano nongu musa chekeqo lau asutsa lakhi pesu idewolo.

³ Nongu ayeghiqhalo achekemi kumtsuno inilo! Naghuto qo kutsuqalo amichi piyeakeu michiphi sunheqhe keu julo! Aghukishi fulili kuyighakeu inilo!

⁴ AMPEU no ivilo hitoi pike, “Ino kungugha lono jupiqi nani tiye ghile ghulokilo akulu tsala putholo atsuzu qi akeshi, atsala shukuthuikeulo tsukinheno tsuni akeshi nanike.

⁵ Atsayithi xomphi lo kughou akupu ighiqiveni keno eno atsayithi ni ipeche kelono aghumino Sudanmi kutsave nani, tiye azutachino atsayibo lono mulalei aloka michelukeu toi nani.

⁶ Ghushimi kithi kumoye aghau ngo tughashi salashi ashou tishi qhive nani. Mutsutsalalo aghauno tipanoqo mighichu nani eno susu tsala lono tughashino chu nani.”

⁷ Tipa ghulokiloye aghokiqono kijetha akeu yeghi kudauno, akuka akumto shiayehqono, hi chuqumughai keu eno ayiko hipuleyi kemi ayeghiqha kumtsuno musaighu chekemiqo launo aqokitikhi MPEU lau akumllagho peighi nani. Panonguno Zion toghi, khilehi Aqokitikhi MPEU mlla cheni keno tilehi ighi nani.