ISAIAH 17 - BAIBEL (BSI)

Alhou no Siriya ngo Israil Ghimeni

¹ AMPEU no pi, “Hinguno hilauye Damaska ye aphughi shimove nani; hiye shipusape qhive nani.

² Siriya phughiqoye alhokupuju ghenguno piyighive nani. Tipaqoye bheri ngo amshiqo kumza-a shive nani eno khunomu lhoxu hipaqo hapupomo nani.

³ Israil ye sushokulupu kuhave nani, Damaska yehkipe ye hauve nani. Siriyami khipaqo ghupe puaghini keno tipaqoye Israil lo akemi toi kujomzakepu shive nani. Ni, Aqokitikhi MPEU no pi ani.”

⁴ AMPEU no pi, “Tipa tsalalo Israil jekipiye ashekha shive nani, eno tipaulo kinikulu zuqhulo aquagha shive nani.

⁵ Israil ye alu lakhilo ghile hupuwovekeu toi nani, Refaim luqalo athi muduniyi lupuwuveke toi yenguyeleive nani.

⁶ Timi aghulo likhi ghupuaghive nani eno Israil ye oliv subo lakhilo athi kumtsu xoluveno akkelo kinia kuthua likhi ghuvekeu toi nani momu aloka aqhou akeulo alothi lakhia kinia ghuvekeu toi nani, Ni, AMPEU Israil Lhou no piani.”

⁷ Kughou tipa tsala ighini keno panoqo Lhokeu Israil Lhou akimtheu pelo panoqo kuphupenike ideighi nani.

⁸ Panonguno tinguno tilauye pano uno akipiti khache mlapuakeu pukhumo nani momu panoqo u-kumla, ti Ashera lhouliuki kimihi ngo axokutsungu kipti khacheqo shou pulubemo nani.

⁹ Kughou tipa tsala ighini keno, sushokulupu shiakeu phughiye piyighive eno ixapinyive nani, tiye Havimi ngo Amarimino Israilmi zulono kuhapoveno aphughiqo qhivekeu toi shive nani.

¹⁰ Israil, noye oxaphelukeu Lhou kumsumavae eno khuno akughutshu tuqu toi osusholukeu phevae. Tipau zuqhulo, inaghami lhou mllaniaye akimthe ghutu shipe qhike.

¹¹ Ikemu nono tipaqo kutope qhiwo thanau tipaqono ani minino puile ipeghive pinamu tipaqo xathi xolupemo nani. Shiluksa ngo vimlakeu kusu likhi shivepe nani.

Aghumi Shiayehqo Haleve

¹² Akuka kumto shiayehqoye azughi ghugha toikeu sutsa lono eno azu fukukucho kuloghino kugha akeshi muqhumza itha ani.

¹³ Azu fukukucho iluche keshi ashiayehqono azuu hacheni, ikemu Alhou no panongu hakhake eno naghuto kighijelo ayeghi mukhu fupuwu ke toi eno miyitsutsulo no aghijini fupewuve ketoi panonguye athiu shochileve ani.

¹⁴ Avelauye panonguno timi shikichi ikemu inaqhe panonguye povae. Niyeghilo xule puwuvekemi kumtsu sala hikithipu kutopuanike.