ISAIAH 15 - BAIBEL (BSI)

Alhou no Muab Kutsani

¹ Hiye Muab ghenguno atsape lakhike. Ar ngo Kir phughiqoye kijili lakhino kutsaveke eno kughu kughalei keuno Muab yeghi nhaluveke.

² Dibon lo kuamino chiniche keu alo qa-mloni aye naghutolo iqhoke. Muabmino Nebo ngo Medeba phughi shou amlo kusashi qahke; panonguno amlokusa launo akutsusa ngo akichimhi miyeveke.

³ Alaghilalo akemino thoilaphi pepuluve; aphughi mtalo eno aki kutsuqalo timiqono kunotshutshu shi qahke.

⁴ Heshbon ngo Eleale lo kughuna akemino igha qahke eno panoqo kuqah ye Jahaz kutolo chiluke. Ghushimi ghi msakhokhoshi; panoqo mlo kumto hauve.

⁵ Imlo lono Muab lau igha qahwu! Timi qoye Zoar taunlo ngo Eglat lo eno Shelishiya lo kuhapove. Khamiye qah susu Luhit laghi kudau iqhoke; khamino ighamuku amlo kusashi Horonaim kudau pokawuve.

⁶ Nimrim ghokiti ye qhaive, tipau phivilo atsuniqo thizumuive eno kiumu xuthilei move.

⁷ Timiqono Mulo suboli khila kathasu su panoqo wu tinhemgha kumtsu pesusu pokawunike pukaputsa ke.

⁸ Muab sukumxa aqha kumtsulo qahkeu sutsa chiluke. Tiye Eglaim ngo Berelim taunqo loghi chiluke.

⁹ Dibon taun lo aghokiye ajihno huchuyi ake, eno timi tile akeqo ghenguno Alhou ye tinguno alhoksapu kutau kutopuake. Iye, Muab lo ghupe puaghikeqo kumtsu aji pele ghiqhikhave nani.