ISAIAH 14 - BAIBEL (BSI)

Halevekeu lono Ideighi

¹ AMPEU no pawu timi Israilmi shou itaghi kimiye qhiyikeu anani eno itaghi panongu kishelu nani. Panoqo pelo itaghi pano yeghilo kughunalupe nani eno inaghamino ighi puzu panoqo gholo kughuna nani.

² Ashiayeh kutomono Israilmi kuphu puzu AMPEU no panoqo tsupuakeu yeghilo idewolupe nani eno tilehi ashi ayehqo Israilmiqo quaxemi shi ghi panoqo qe nani. Khunoqono ghuthu lakhiloye Israilmi khasulu puakeno Israilmino tipaqo khasuluve nani eno Israilmi no panoqo nedaqhi chekemi shou ayehpe nani.

Kithighalo Babilon Kukau

³ AMPEU no Israilmi aghime ngo akusu launo akulhoqhi lupe nani eno anguka lono panongu pelo akuaghashi mla chekeu lono akulhoqhi lupe nani.

⁴ Kughou pano hipau shini keno panonguno ishi pi-ghi Babilon kukau thaigha nani: “Ayikusau kukauye ikiqivae! Paye khilemu kutami qoda kithelumo nani!

⁵ AMPEU no lhoksa kughami kuka hephove tsu, ayehkipemi kusu hechhevetsu,

⁶ ti aloghu ide tamono panonguno leluvekeu shiayehqo shikighimeqhi cheke.

⁷ Itehi ashekhaloye ayeghiqha kumtsu akulhoqhi eno alakishi shilupesu ani eno kumtsuno alokivi aluno alephe ani.

⁸ Libanon lo kedar ngo kupra suboqono ikiqivekeu kukau shou alovi ani kughengu paye kuhavea eno cheveake eno khunomu panoqo yeqhimoake!

⁹ “Kithimi yeghiqhaye Babilon kukau salunike kuto kughoipe ani. Ayeghilo akuka kumtoshi achekeqo ghahwuqoye xukutho puthulu ayeake. Kukami ghahwuqo ye pano kuka lakhu kudauno ithughi ayeake.

¹⁰ Panongu kumtsu pa vilo ighamuku pi, ‘Itehiye noghi ningu toyi miqemileivae! Noghi nigholo lakhi ake!

¹¹ Akighilebo lejo lono oshipili gihu cheke ikemu itehiye noghi kithimi yeghilo hilau auvae. Noye tubatuzu pitheno ozua shipuzu zuke eno apitheno okuzukhoi onhaluvae.’

¹² “Babilon kukau, inaqhe yepu vuqai chekeu, noye kungugha lono ikiqivae! Wovekeu tsalaloye nono ashiayehqo leluve cheke ikemu itehi noye ayeghilo kughape veqhivae.

¹³ Noye kungugha kutolo mili ikuniye pukaputsake eno okuka lakhu pesu ayepu akiqheu shou qhiniye shike. Nono kumsukeuno ahuu kudau khilehi alhounoqo kumqo chenikeno tipau naghutolo noye akukau lakhi toi iqaniye shike.

¹⁴ Nono pikeuno noye khungkusu kutsuqa shou mili iku puzu Akughushuu toi shiniye shike.

¹⁵ Ikemu tipa zuqhulo kithimi yeghiqha akuthou kudau osunhe saqighiveke.

¹⁶ “Kithimino kutuxoxo pesu eno abaxa mukupe oju nani. Panonguno ishi iniju nani, ‘Ayeghi sukini eno ayehkipeqha pelo khokhoshive pechekeu timi hu hipau kesha?

¹⁷ Aphughi kutsachekeu eno ayeghiqha tule pesu kughuna moke-a shivetsu chekeu timi hu hipau kesha? Akughushi akemi khilemu achuqu tsumo momu panoqo pelo akilo wope chemokeu timi hu hipau kesha?’

¹⁸ Ayeghilo kukami kumtsu pututa kumoki aghilepulo zuani,

¹⁹ ikemu noye akumoki kuhae eno osukumoye tsu muna peniaye vephevae. Osukumoye aghushilo ghushimi thivekeqo sukumono venhaluve, tipaqo gholono atuxulo aqohlo vesuve eno nedaqodave.

²⁰ Nono noyeghi hexapinyive eno nolikhi nowu timiqo heqhi pithi keghenguno noye kukami kutamiqo toi akumo shiqhomo nani. Olhoksa kibolomi milakhimu puxumove nani.

²¹ Ghiqhikeu huthuve pelo! Panoqo puasu xineqo ghenguno akukau hipau nuliqoye thi nani. Panongu lakhinomu ayeghilo ayehpeu shipemo nani momu ayeghilo aphughi shiwo pemo nani.”

Alhou no Babilon kutsaveni

²² Aqokitikhi MPEU no pi, “Ino Babilon lewu nani eno tipau hexa pinyivetsu nani. Ino kiumu qhitsumove nani, ititunu pinamu khumu puxupe qhitsumove nani. Ni, AMPEU no pitsu ani.

²³ Ino Babilon pesu ayizukucho shivetsu nani eno aqhaqhono tile auve nani. Ino achhophe pesu Babilon khuve nani eno thwokha kumtsu khusawuluve nani. Ni, Aqokitikhi MPEU no pitsu ani.”

Alhou no Asiriyami Kutsaveni

²⁴ Aqokitikhi MPEU no ashoqhi lakhi shi ghi tushoqhivae: “Ino kiu kughuvea keno tiye shi nani putsa. Ino kiu kumsu kutovea keno tiye shive nani.

²⁵ Ino Israil yeghi lono Asiriyami kutsave nani eno iwu naghuto lono panoqo qodaneda nani. Ino iwu timiqo Asiriyami makho pu chekeu lono eno ape puchekeu lono khaqhipheve nani.

²⁶ Hipauno ayeghiqha ghenguno ino kughupe akeu eno ashiayeh ghimeqhi nike i-u chhope ani.”

²⁷ Aqokitikhi MPEU no hipau shinike kumsupupe ani; ghimeqhi nike pa-u chhope auvae eno khunomu pa lakhave mlake.

Alhou no Filistiyami Kutsani

²⁸ Akukau Ahaz thiveke mipe lono atsape hipau asheshuke.

²⁹ Filistiyami, nongu ghaqhichekeu kusuye icheuve ake ikemu nongu alokivi shikepu akiqi kuhae. kughou apighi lakhi thiveni keno tinguno alhoksau tipa alo ighi cheni. Apighi yikhu lono tughakixi khophe cheni.

³⁰ AMPEU no pawu timi kumlhomiqo shou akheu shive nani eno panongu pelo ighumono xulupe nani. Ikemu nongu Filistiyami shou pano kixikila puqumiyekeu puwu nani eno tishikeulo nonguye milakhimu puxumove nani.

³¹ Ighamuku muloqalo, nongu Filistiyami phughiqo! Nongu kumtsu musa khokhoshivelo! Ahuu kudauno ayeghi mukhu phoboleyi ipeghi ani, tiye ghushimi muqoke eno tipanoqo gholo musa ichikemi lakhimu kuhae.

³² Filistiya yeghi lono aghini kishimi nilau ighikemi vilo kishi khochileveni kya? AMPEU no Zion xaqheputhu puani eno pawu timi aghimeshi chekemiqoye tilehi sushokulu ani kepi nonguno panoqo vilo pini.