ISAIAH 13 - BAIBEL (BSI)

Babilon Ghimeqhi

¹ Hiye Babilon ghenguno asutsa sughikeu lakhi khikhi Amuz nu Isaya no Alhou lau ithulukeu ke.

² Asutsuni kuhakeu naghuto shou aghushi michiphi peqheke! Ghushimi vilo ighamuku pilo, eno panoqo pelo aqhekuza phughi liwokikha lewu penike ou peqhe pesu kichetsulo.

³ AMPEU ampino pawu aqhekuza eno alikhi apukhu chekemi ghushimi kusasu akimthe ghushi shipuzu pamlo shikighide kemiqo ghimeqhini.

⁴ Naghuto shou asutsa shiakeu inijulo - timi aqokitikhi kije sutsake, ashiayehqo eno ayehkipeqhaqo kumqo akeu sutsake. Aqokitikhi shou AMPEU no pawu ghushimi sasu aghushiniye kuto anike.

⁵ Panonguye ayeghi aghache lono ighi, ayeghi shekha lono ighi ani. Pa loghu lono AMPEU ye ayeghi kumtsu hexa pinyive nike cheni.

⁶ Aghime launo ighalo! AMPEU tsalaye kupunupe ani, Akughushuuno kutsakungo keu sughikeu tsalanike.

⁷ Timi kumtsuno a-u qeyive nani eno timi kumtsu mlo hauve nani.

⁸ Panongu kumtsu thughuive nani eno akusu ghimeno panongu tshuluve nani tiye totimino apunu kusu suakeshi nani. Panonguno musaqhiyi lakhino lakhi junani eno akukujono panoqo gi pitiqhi nani.

⁹ Jualo, AMPEU tsala cheni, amlo kighide ngo aloghuno ayikusa pushi cheni. Ayeghiye yenguyelei vetsu nani eno axinemi kumtsu kutsave nani.

¹⁰ Ayepu ngo ayesu jeli qono yevuqai tsumove nani, tsukinheno ipeghi puzu zumoive nani eno aqhino akuvu tsumove nani.

¹¹ AMPEU no pi, “Ayeghilo aghimepu ino sughi nani eno kixikilami axine shikeu ghenguno shikighimeqhi nani. Aqhekuzami kumtsu ino shikuchunive nani eno lake lahi shi xuchekemi ngo ayikusami ghimeqhi nani.

¹² Puxu puaghi kemiye shunayi nguno akighipiu shi nani.

¹³ Ni AMPEU Akughushuno iloghu piyenike tsalanilo ino kungugha sukughutha nani eno ayeghiye pa-a lono sukini kiqeve nani.”

¹⁴ “Babilon lo inami kughunache kemiye ashihami launo asheno pochekeshi eno bheriqono akheu kuhano akeshi panonguye pututa yeghilo pove nani eno pano timiqo lau kohave nani.

¹⁵ Khukhumu kughaluve keuye qhuqhi pithive nani.

¹⁶ Panonguno kiumu shimlaveno juapulaghi panoqo tianuliye munuda pithive nani, panoqoki xupuwuve nani eno panoqo nipuye sazuve tsu nani.”

¹⁷ AMPEU no pi, “Babilon leluve penike ino Mediyami xuputho ani. Panoqoye tsandiyi ngo shunayi pesu panongu ghujuqhiluve mla nani.

¹⁸ Panoqo suzu ngo apiji pesu lhothemi kaqhi nani. Panonguye ititunu jupe amlo ighiqhiyimo nani eno timiqo kupuni chemo.

¹⁹ Babilon ye kumtsu nguno jukivi kukaqha lakhike; tipaulo jupesu timiqono akijivilo cheni. Ikemu ino Sodom ngo Gomora shou shikeu toi ni, AMPEU no Babilon kutsaleve nani!

²⁰ Timi khumu tipaulo kughuna kithe move nani. Arabmi itsu itsuchekemi namu tilehi pa phiki shipe ngomo nani, eno bherikhemi khumu tilehi atsu-aqu loji achu kumzau move nani.

²¹ Tiye asayeqhalo achekeu lhoxu kungo-a shive nani eno aqhaqhono apusu pesu keu-a shive nani. Ostrik no tile acheuve nani eno aghalo netsuno aki ipopinyi akeqo ikhuche acheuve nani.

²² Aliwo ghukhualo ngo akighikilo tungtugha ngo atine ghughano vekuvava nani. Babilon ghulokiye kupunu khoivae eno li ghulokiye kushuwa tishi auvepemo nani.”